Rot Bilong Bosim Gut Bel na Tingting
OLSEM WANEM? Sampela taim ol tingting i bagarapim bel i bosim laip bilong yu? Yu save kros o bel hevi hariap? Ol hevi bilong laip i save daunim yu? Wanem samting inap helpim yu?
Pasin bilong pilim ol samting long bel em wanpela samting yumi ol man i save mekim. Taim yumi bosim gut ol tingting bilong bel, ol inap givim sampela amamas moa long laip bilong yumi. Tasol Baibel i tok: “Taim ol i mekim nogut long wanpela man na daunim em, maski em i gat gutpela tingting, em bai kirap mekim pasin kranki.” (Saveman 7:7, NW ) Pasin bilong pait na nogutim narapela na ol bikpela bagarap i save kamap planti tumas long dispela graun, na dispela i save bagarapim bel bilong yumi olgeta. Tasol Baibel i tok tu olsem: “I gat wanpela pasin i win tru. . . . Yumi mas amamas long olgeta samting yumi mekim.” (Saveman 3:22) Olsem na bilong yumi ken i stap amamas, yumi mas lain long amamas long ol samting long rot bilong kisim pasin bilong tingim ol gutpela samting. Olsem wanem yumi ken tingting long ol gutpela samting na sakim ol tingting i save bagarapim bel?
Planti taim i gat sampela samting yumi ken mekim bilong helpim yumi long daunim ol tingting i save bagarapim bel. Olsem: Taim yumi wari long wanpela hevi samting em yumi no inap stretim, em i gutpela moa long mekim sampela samting yumi no save mekim long olgeta taim o go long narapela hap; em i no gutpela long yumi tingting tasol long dispela hevi na wari i stap. Sapos yumi go wokabaut, harim musik i save mekim gut bel, mekim sampela eksasais, o mekim gutpela pasin long wanpela i sot long ol samting, dispela inap helpim yumi na givim sampela amamas long yumi.—Aposel 20:35.
Tasol nambawan gutpela rot long rausim ol tingting i save bagarapim bel, em yumi mas bilip long Man Bilong Wokim yumi. Taim yumi wok long tingting long ol samting i save bagarapim bel, yumi mas ‘putim olgeta hevi yumi karim i go long han bilong God’ long rot bilong beten. (1 Pita 5:6, 7) Baibel i tok promis: “God i save stap klostu long ol manmeri i gat hevi. . . . Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:18, 19) Olsem wanem yumi ken save olsem tru tru God em i ‘man bilong helpim yumi, na i save kisim bek yumi’? (Song 40:17) Yumi ken save long dispela long rot bilong stadi long Baibel na skelim long bel ol stori i kamapim klia pasin bilong God long tingim tru i stap bilong ol wokman bilong em.