I Stret Olgeta Man i Mas i Gat Nem

OLGETA wan wan man ol i gat rait long i gat nem. Long Tahiti, ol i save givim nem tu long wanpela nupela pikinini em papa na mama i lusim em na ol i no save long papa na mama bilong em. Ofis bilong gavman long rejistaim ol nem i save givim nem long ol dispela kain pikinini.

Tasol i gat wanpela man em yumi ken tok ol man i no tingim rait bilong em long i gat nem, em dispela rait olgeta manmeri i gat. Yumi kirap nogut, long wanem, dispela man em i “Papa bilong olgeta lain i stap long heven na long graun, na em yet i givim nem long olgeta dispela lain.” (Efesus 3:​14, 15) Tasol planti manmeri i no laik yusim nem bilong Man Bilong Wokim olgeta samting olsem i stap long Baibel. Ol i save rausim nem bilong em na ol i putim ol biknem olsem “God,” o “Bikpela.” Orait, wanem nem bilong em? Man bilong raitim song i bekim dispela askim olsem: “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.”​​—Song 83:​18, NW.

Long ol yia namel long 1800 na 1850, taim ol misineri bilong London Misineri Sosaiti i kamap long Tahiti, ol lain Polinisia i save lotuim planti god. Olgeta wan wan god i gat nem bilong ol yet. Ol nambawan god em Oro na Taaroa. Bilong soim olsem God bilong Baibel i narapela kain long ol narapela god, ol dispela misineri i mekim bikpela wok long yusim nem bilong God, em ol i bin tanim long tok ples Tahiti olsem Iehova.

Planti man i kisim save long dispela nem na ol i save yusim taim ol i toktok wantaim ol narapela long olgeta de na taim ol i raitim pas. King Pomare Namba 2 bilong Tahiti em i kirap mekim wok king long yia 1803, em i bin yusim dispela nem planti taim long ol pas bilong em. Pas em mipela i putim piksa bilong em long hia i gat dispela nem. Em i bin raitim long tok Inglis na dispela pas i stap long Haus Tumbuna Bilong Tahiti na Ol Ailan Bilong En. Dispela pas i soim klia olsem long dispela taim bipo ol man i bin yusim nem bilong God. Na tu, nem bilong God i stap planti tausen taim long namba wan Baibel ol i bin tanim long tok ples Tahiti na ol i pinisim long yia 1835.

[Piksa long pes 32]

King Pomare Namba 2

[Piksa Kredit Lain long pes 32]

King and letter: Collection du Musée de Tahiti et de ses Îles, Punaauia, Tahiti