“Mi Laikim Tru Lo Bilong Yu!”
BUK Song 119 em wanpela singsing i kamapim tingting bilong man bilong raitim song long ol tok bilong God. Em i singsing olsem: “Mi putim tok bilong yu i stap long bel na tingting bilong mi.” “Mi laikim tumas ol lo bilong yu.” “Bel bilong mi em i dai tru long bihainim stretpela pasin bilong yu long olgeta de.” “Mi laikim tumas tok yu givim mi bilong stiaim lek bilong mi.” “Mi laik bihainim olgeta lo bilong yu.” “Mi belgut tru long bihainim ol lo bilong yu long wanem, mi laikim tumas ol dispela lo.” “Bai mi tingting oltaim long stretpela tok bilong yu.” “Mi laikim tru lo bilong yu. Mi save tingting long en long san na long nait.”—Song 119:11, 16, 20, 24, 40, 47, 48, 97.
Man bilong raitim song i pilim tru long bel ol tok bilong God! Yu gat wankain tingting long ol Tok Bilong God, em Baibel? Yu laik kisim pasin bilong laikim tru ol tok bilong Baibel? Sapos olsem, namba wan samting yu mas mekim em yu mas kisim pasin bilong ritim Baibel long olgeta taim, sapos inap long olgeta de. Jisas Krais i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4) Namba tu samting, yu mas tingim tingim long bel ol tok yu ritim. Pasin bilong tingim ol tok tru long God, ol pasin bilong em, laik bilong em, na ol samting em i tingting pinis long mekim, dispela bai helpim yu long laikim moa yet ol tok bilong Baibel. (Song 143:5) Na bikpela samting moa, bihainim ol gutpela tok bilong Baibel long ol samting yu mekim long olgeta wan wan de.—Luk 11:28; Jon 13:17.
Taim yu wok long kisim pasin bilong laikim ol tok bilong Baibel, dispela bai helpim yu olsem wanem? Song 119:2 i tok: “Ol man i bihainim tru olgeta tok bilong God, ol i ken amamas.” Ol gutpela tok bilong Baibel bai helpim yu long karim ol hevi. (Song 1:1-3) Yu bai kisim savetingting na kliagut long ol samting, na dispela bai helpim yu long “surik long bihainim pasin nogut.” (Song 119:98-101) Taim yu kisim save long God na ol samting em i tingting pinis long kamapim long dispela graun, dispela bai mekim na laip bilong yu i gat as tru bilong en na bai yu inap wetim gutpela samting bai kamap bihain.—Aisaia 45:18; Jon 17:3; KTH 21:3, 4.
Ol Witnes Bilong Jehova i amamas long helpim ol man long save gut long Baibel na long kisim pasin bilong laikim ol tok bilong en. Mipela i laik singautim yu long bihainim dispela tok daunbilo.