“Gutpela Presen Tru Bilong Yu”

WANPELA man, bipo em praim minista bilong Beljam, em i mekim dispela tok taim em i stori long buk Nambawan Man Tru i Winim Olgeta Narapela Man.a Long gutpela pasin pren wanpela neiba i go lukim dispela praim minista, na praim minista i kisim wanpela buk long em. Bihain, dispela praim minista i raitim wanpela pas bilong tok tenkyu, na em i tok: “Mi pilim tru gutpela pasin bilong yu long kam lukim mi, na moa yet mi amamas long gutpela presen tru bilong yu: em buk i stori long ‘Nambawan Man Tru.’ ”

Dispela praim minista i bin skelim gut buk na i tok: “Sapos ol man i gat bikpela laik long save long tok bilong Gutnius na bihainim ol stiatok bilong Jisas Krais, pasin bilong ol manmeri bilong graun long nau bai i senis olgeta. Bai yumi no gat wok long Sekiuriti Kaunsil; na bai i no gat pasin teroris, na bai i no gat tru pasin bilong pait na bagarapim man long graun.” Maski em i tokaut olsem em i ting dispela gutpela samting i no inap kamap, em i tok em i amamas long gutpela pasin bilong neiba bilong em long i kam lukim em.

Pas i tok moa olsem: “Yupela i insait long wanpela gutpela lain i save tingim tru ol man, yupela i no save tingim ol gutpela samting tasol bai kamap bihain, na tu, yupela i no save tingim ol samting nogut tasol bai kamap, nogat. Yupela i ting ol man na ol samting inap senis na i kamap gutpela.”

Ol Witnes Bilong Jehova i bilip olsem God bai i kamapim gutaim long graun, na gutaim bai i no kamap long strong bilong ol man. Ol i wok strong long bihainim pasin bilong nambawan man tru, Jisas Krais. Olsem wanem? Ol Witnes Bilong Jehova i bin kam lukim yu? Ating bai yu amamas long toktok wantaim ol long dispela nambawan man tru i winim olgeta narapela man i bin stap long graun. Na ol bai amamas long givim yu dispela buk i bin amamasim dispela praim minista.

[Futnot]