Yiabuk—Em Gutpela Samting Tru Bilong Strongim Yumi
1 Taim ol wokboi bilong God i harim ripot na stori bilong ol gutpela samting Jehova i mekim, dispela i strongim bel bilong ol. (Jop 38:4, 7; Snd 25:25; Lu 7:22; Ap 15:31) Olsem na yiabuk bilong ol Witnes Bilong Jehova (tok Inglis) em wanpela gutpela samting tru bilong strongim yumi.
2 Olgeta wan wan yiabuk i kamapim ripot bilong ol Witnes Bilong Jehova na wok ol i mekim long olgeta hap, na ol dispela ripot i save strongim yumi. I gat ol ekspiriens i strongim bilip bilong yumi na i kamapim klia ol samting Jehova i bin mekim bilong stiaim lain bilong em, na lukautim ol, na mekim gut long ol. Yiabuk i stori long ol strongpela brata sista ol i bin lusim famili na ol pren na kantri bilong ol bambai ol inap bringim ol tok i tru bilong Baibel i go long ol man long ol narapela kantri na ailan long olgeta hap.
3 Yiabuk i bin kirapim planti man long mekim bikpela wok moa bilong God. Wanpela meri i tok: “Mi wok long kaunim hariap. Ol hap mi kaunim pinis i bin strongim mi tumas. Taim mi save long ol samting ol narapela i mekim, maski ol i gat hevi, dispela i mekim na mi pilim olsem mi inap mekim bikpela wok moa long autim gutpela tok.”
4 Kirap long 1927 i kam inap nau, yiabuk i bin kamapim planti gutpela ripot na ekspiriens bilong strongim ol brata sista. Olsem wanem long yu? Yu save mekim ol samting na bai yiabuk hia i ken helpim yu? No gat narapela buk i gat planti ripot na ekspiriens olsem bilong strongim yu. Tasol taim yu kisim pinis yiabuk yu mas kirap kwik long kaunim na bai em inap helpim yu. Na namel long yia, gutpela sapos yu kaunim gen sampela hap bilong en bilong strongim yu na famili bilong yu.