Autim Tok Wantaim Ol Magasin

¹ Tupela magasin Wastaua na Kirap! i gutpela samting tru bilong helpim ol Witnes Bilong Jehova long mekim gut wok bilong ol. I gat planti tausen magasin ol i stori long kain kain samting, tasol tupela magasin tasol i tokaut long Kingdom bilong God em rot tru bilong pinisim ol hevi. Olsem na yumi mas wok long tilim dispela tupela magasin long planti man.

² Olsem wanem? Olgeta taim yu save tilim magasin? Namba wan samting yu mas mekim em yu mas kaunim olgeta wan wan magasin, na bilip olsem ol tok bilong en inap helpim ol man ol i laik bai God i ken orait long ol long kisim laip. Sapos yumi gat dispela tingting, bai yumi amamas long tilim ol magasin.

³ Mekim Wok Long Kain Kain Rot: Yumi mas wok long painim kain kain rot bilong tilim magasin. Nau bai yumi stori long sampela rot yumi ken mekim wok long en na bai yumi inap tilim planti magasin moa.

⁴ Long Ol Haus: Olsem wanem? Yu bin makim wanpela de long wik bilong tilim ol magasin? Redi gut pastaim. Redim wanpela sotpela tok tasol long magasin yu laik tilim. Givim bel long mekim tok na tingting strong olsem ol man bai kisim! Yu ken tok olsem: “Mi save bai yu amamas long kaunim dispela stori. Mi laik lusim dispela tupela nius long yu. Pe bilong tupela wantaim, em 50 toea.”

⁵ Long Rot: Gutpela sapos long olgeta wik yu autim tok long rot, maski em inap sotpela taim tasol. Yu yet yu mas kirap na go toktok wantaim ol man​—⁠no ken wet long ol i kam long yu. Wasman bilong wok autim tok i mas stretim rot bilong helpim ol brata sista long autim tok long rot.

⁶ Long Ol Stua: Wokman bilong kongrigesen i save helpim wasman bilong wok autim tok, em i mas stretim rot na bai ol brata sista i ken mekim wok magasin planti taim long ol stua. Ples bisnis olsem ol faktori, na ples bilong kisim bensin, na haus pasindia, ol i olsem hap teritori bilong yumi.

⁷ Kisim Ol Nupela Magasin i Go Long Man Long Olgeta Taim: Taim yumi go long ol haus o stua na man i kisim magasin, yumi mas go bek lukim em wantaim ol nupela magasin. Olgeta man yumi stadi wantaim ol long Baibel, sapos ol i no kisim sabskripsen, orait, kisim ol nupela nupela magasin i go long ol.

⁸ Ol Pren na Wanblut: Olsem wanem? Yu save kaunim gut olgeta wan wan magasin na bai yu inap save wanem ol stori bai i gutpela long ol pren na wanblut bilong yu? Ating i gat sampela stori long ol Kirap! yu save bai i gutpela long ol.

⁹ Autim Tok Long Kain Kain Taim na Ples: Ol magasin i stori long kain kain samting, olsem na ol i gutpela bilong tilim long ples wok bilong yu o long skul o long taim yu raun long PMV samting o long taim yu go long ol kibung. Yu mas karim sampela magasin i go wantaim yu na bai yu inap tilim long kain taim olsem.

¹⁰ Wasman bilong wok autim tok i mas lukim ol tok i stap long olgeta wan wan magasin na bai em i ken save, i gat sampela stori i gutpela bilong ol dokta o tisa samting o ol narapela lain long hap bilong yumi o nogat. Em i ken makim sampela brata na ol i ken i go lukim ol dispela man wantaim ol dispela magasin i stret long ol.

¹¹ Planti brata i save i gutpela sapos ol i makim hamas magasin ol i laik tilim long olgeta mun. Tasol nogut yu putim mak i antap tumas na yu no inap winim. Mipela laik kirapim ol painia tu long mekim olsem, na gutpela sapos sampela taim namel long mun ol i tingim hamas magasin ol i bin tilim. Olgeta wan wan magasin yumi tilim inap helpim man long save long rot bilong kisim laip.

This article is unique to PNG.