God Bai Kisim Bek Olgeta Kain Man
1 Jehova i laik “kisim bek olgeta manmeri” na em i laik “ol i ken save long as bilong tok tru.” (1 Ti 2:4) Pasin ol man i kisim long papamama, na samting ol i lainim taim ol i pikinini, na pasin bilong ples, ol dispela samting i save stiaim ol, tasol ol yet i gat tingting na olgeta wan wan inap tingim wanem rot ol i laik bihainim. Ol i ken mekim gutpela pasin na stap laip, o ol i ken mekim pasin nogut na bagarap olgeta. (Mt 7:13, 14) Dispela save i givim wanem tingting long yumi long ol man yumi autim gutnius bilong Kingdom long ol?
2 Yumi no ken ting, sapos man i bilong wanpela lain o wanpela kain sindaun, dispela i makim olsem em i laik harim tok i tru, nogat. Man i skul gut o nogat, o em i insait long wok politik, o em i wanpela loya o dokta samting, o em i ting i no gat God, o em i no bilip tumas long God, o em i man bilong mekim rong, ol dispela kain man inap laikim tok i tru. Ol man bilong olgeta kain sindaun ol i lusim pinis pasin bilong ol long bipo na nau ol i gat tingting long kisim laip long nupela taim God bai kamapim. (Snd 11:19) Olsem na yumi no ken surik long autim tok bilong Kingdom long ol man bilong kain kain sindaun.
3 Tingim: Wanpela man i bin tingting long kilim i dai waspapa bilong em, tasol em i no mekim. Bihain em i tingting long kilim i dai skin bilong em yet, tasol em i no inap. Em i go kalabus, long wanem, em i bin stil na maketim ol drak. Bihain marit bilong em i bagarap. Nau dispela man i mekim wok mani, na marit bilong em i kamap gutpela na em i pas gut wantaim waspapa bilong em. Wanem samting i bin helpim em? Em i stadi wantaim ol Witnes Bilong Jehova long Baibel na em i bihainim ol tok em i lainim. Jehova i no ting dispela man i nogut pinis na em i no ken kisim bek em, nogat.
4 Wanpela yangpela meri i gat biknem long televisen, tasol em i no stap amamas. Em i laikim stretpela pasin bilong ol Witnes, olsem na em i orait long stadi long Baibel, na bihain liklik em i kirap long autim gutnius bilong Kingdom. Taim em i go long ol haus na autim tok, olgeta man i luksave long em, tasol em i amamas long tokim ol olsem ol i mas tingim em i wanpela Witnes Bilong Jehova, na i no olsem meri i gat nem long televisen.
5 Taim wanpela Witnes i stretim tok long mekim Baibel-stadi wantaim wanpela meri i bin kisim sabskripsen bilong Wastaua, wanpela meri i stap klostu em i kisim save long dispela na em i kam long stadi. Kwiktaim em i save dispela em i tok i tru em i bin wok long painim! Em wantaim man bilong em ol i senisim tingting bilong ol long katim marit, na marit bilong tupela i kamap gutpela gen. Maski meri i insait tru long pasin bilong lukluk long ol sta bilong painim save, na em i insait long wanpela liklik lotu i mekim pasin bilong ol spirit nogut, em i redi long rausim ol buk i gat bikpela pe long en wantaim olgeta narapela samting bilong mekim ol wok bilong ol spirit nogut. Bihain liklik em i kirap long kam long ol miting na toktok wantaim ol wanblut na ol pren bilong em long nupela bilip bilong em. Nau em i givim bel long autim tok.
6 Yumi no ken skelim ol narapela. Yumi mas wok strong long autim gutnius long ol man long olgeta hap. I gat planti as na yumi ken bilip olsem, Jehova i “save lukim tingting na laik bilong man” na em bai kamap “man bilong kisim bek olgeta manmeri.”—1 Sml 16:7; 1 Ti 4:10.