Yu Wok Yet Long Stap Strong?
1 “Taim mi harim tok long ol pikinini bilong mi i bihainim tok tru, orait mi save amamas tru, na dispela amamas i winim ol arapela kain amamas bilong mi.” (3 Jon 4) Jon i bin kisim bikpela amamas taim ol pikinini bilong em long spirit ol i bin stap strong long tok i tru. Papa bilong yumi long heven em i amamas tru long lukim planti milion manmeri em ol inap kamap pikinini bilong em, ol i wok yet long “bihainim tok tru”!—Snd 23:15, 16; 27:11.
2 Klostu olgeta bilong lain bilong God ol i wok strong long givim bel long mekim wok Kristen, tasol isi isi sampela ol i bin kamap slek long mekim wok. Ating taim ol i bin kisim tok i tru nupela ol i givim bel long mekim wok, tasol inap sampela yia bihain ol i save mekim liklik wok tasol o long wan wan taim tasol ol i mekim wok bilong kamapim disaipel.
3 Ating sampela ol i no mekim bikpela wok moa olsem ol i bin mekim long bipo, long wanem, ol i gat bikpela sik o ol i go lapun. Tasol yumi mas tok amamas long pasin bilong ol long sanap strong na mekim yet dispela wok. Ol i mekim wok long skel bilong ol. Tasol olgeta man i bin dediketim laip bilong ol long God ol i mas askim ol yet olsem: ‘Mi larim ol samting bilong mi yet i kamap nambawan samting long i stap bilong mi na long dispela as mi mekim liklik wok tasol bilong Kingdom? Mi kamap olsem ‘mi no kol na mi no hat,’ o mi save “taitim bun tru” long mekim wok bilong Kingdom?’ (KTH 3:15, 16; Lu 13:24) Gutpela sapos yumi olgeta i beten na skelim wok bilong yumi na mekim ol samting bambai wok bilong yumi i ken kamap gutpela moa. Tingim tok promis bilong Jehova olsem em bai givim “biknem na bel isi long olgeta man i save mekim gutpela pasin.”—Rom 2:10.
4 Rot Bilong Stap Strong: Wanem samting i bin helpim Jisas long stap strong? Pol i tok: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai.” (Hibru 12:1-3) Amamas Jisas bai kisim long bihain em i bikpela samting tru, winim ol hevi em i mas karim inap sotpela taim tasol. Taim yumi tingim ol gutpela samting yumi bai kisim long bihain, dispela bai helpim yumi tu long i stap strong. (KTH 21:4, 7; 22:12) Sapos yumi askim Jehova long givim strong long yumi long rot bilong stadi bilong yumi yet, na go oltaim long ol miting, na beten oltaim, orait bai yumi inap stap strong long mekim dispela wok em i bin givim long yumi.
5 Jehova i save amamas taim lain bilong em ol i strong long mekim wok. Olsem na yumi ken mekim amamas bilong Jehova i go bikpela moa taim yumi wok yet long “bihainim tok tru.”