Pasin Bilong Bung Wantaim Ol Kristen i Bikpela Samting Olsem Wanem?

¹ “I no gutpela long man i stap wanpis.” Dispela tok bilong wanpela man bilong raitim ol stori em i bin stap long yia 1650 samting, i wankain liklik olsem tok Baibel i mekim long wanpela samting ol man i gat laik long mekim, em pasin bilong bung wantaim. (Snd. 18:⁠1) Pasin bilong bung wantaim ol wanbilip Kristen i save inapim dispela laik. Long wanem ol rot dispela inap helpim yumi?

² Long Wok Autim Tok: Wanpela bikpela helpim yumi kisim em taim ol brata bilong yumi i strongim na helpim yumi long taim bilong autim tok. Jisas i salim ol disaipel bilong em i go “tupela tupela” bilong autim tok. (Mk. 6:7; Lu. 10:⁠1) Yumi bihainim dispela pasin taim yumi wok wantaim ol narapela long wok autim tok, na yumi pilim truim bilong tok bilong Saveman 4:​9, 10. Taim yumi wok wantaim long wok autim tok, orait pasin bilong bilip, na bihainim tok, na laikim ol narapela bai givim nupela strong long yumi na helpim yumi long givim bel long mekim wok.

³ Helpim Yumi Yet: Ol brata spirit bilong yumi i save strongim yumi, na soim rot bilong karim ol hevi na sakim ol traim. Ating ol brata Kristen bilong yumi bai kamapim sampela tok bilong Baibel i toktok long ol hevi bilong yumi yet. Ating ol bai beten bilong helpim yumi, wankain olsem yumi save beten bilong helpim ol. (2 Ko. 1:11) Na gutpela pasin bilong ol i save kirapim yumi long mekim ol gutpela wok na i save strongim yumi.

⁴ Long Ol Miting: Taim yumi bung oltaim long ol miting bilong kongrigesen wantaim ol wanlain Kristen, yumi save kisim ol gutpela samting. (Hi. 10:​24, 25) Long ol dispela bung i gat planti tok bilong skulim yumi long ol samting bilong spirit, na taim yumi go long ol miting dispela i mekim na yumi pas gut wantaim ol wanbilip. Long ol dispela bung yumi inap harim ol brata na sista bilong yumi i kamapim bilip bilong ol, long taim ol i mekim tok long pletfom o long taim ol i bekim tok long miting. (Ro. 1:12) Bai yumi pas gut moa wantaim ol brata sista taim yumi toktok wantaim ol paslain na bihain long ol miting. Long kain taim olsem yumi inap kamapim ol ekspiriens i bin strongim bilip bilong yumi. Na pasin bilong yumi bai kamap gutpela moa taim yumi bung wantaim ol man i laikim tru Jehova, Tok bilong em, ol wok bilong em, na ol manmeri bilong em.​​—⁠Fl. 2:​1, 2.

⁵ Yumi mas bung wantaim ol wanlain Kristen. Sapos yumi no mekim olsem, wokabaut bilong yumi long rot i go long laip bai i hatwok tru. Tasol pasin bilong ol long laikim na strongim yumi inap helpim yumi long wok yet bilong i go long stretpela nupela graun Jehova i laik kamapim.​​—⁠Mt. 7:14.