Sakim Ol Pasin Bilong Ples Em Ol Spirit Nogut i As Bilong En
1 Long bipo, pasin na lo bilong ples na bilong ol tumbuna i bin bosim sindaun bilong yumi. Olsem na oltaim yumi mas skelim pasin bilong yumi, nogut yumi mekim sampela samting i helpim bilip giaman Satan i kamapim, olsem ol man i dai pinis ol i gat strong inap long helpim o bagarapim yumi.—2 Ko. 13:5.
2 Satan wantaim ol spirit nogut ol i gat kain kain rot bilong pundaunim yumi. Wanpela rot, em ol i save kirapim famili na ol wanblut bilong yumi long sutim bel bilong yumi na givim hevi long yumi. Olsem na Jisas i tok: “Ol famili bilong man yet bai i kamap birua bilong en.” (Mt. 10:36) Sapos yu laik i stap gut long God na sakim ol samting bilong Satan, orait, nau yu ken skelim sampela traim ol inap painim yu.—1 Jo. 5:3; Kl. 2:8.
3 Taim Wanpela Man i Dai: Long sampela hap bilong Papua Niugini taim wanpela man i dai ol famili na wanples bai ol i bung long haus bilong em. Ol bai krai krai na mekim singsing sori na paitim garamut na kundu na mekim ol narapela pasin bilong ples. Na sampela i save larim ol wanblut na wantok i mekim singsing lotu bilong Kristendom. Ol bai wasim na bilasim em gut na nau ol wanples i kam lukim em, na bihain ol i planim em.
4 Tru, taim wanpela wanblut o wantok i dai yumi save bel hevi na krai. Jisas tu, taim pren bilong em Lasarus i dai pinis Jisas i bel hevi tru na em i krai. (Jo. 11:33, 35) Tasol planti man ol i save pret long tewel bilong man i dai pinis, o ol i pret long famili bilong ol na ol i save bung na krai na singaut na mekim ol singsing bilong man i dai pinis. Em dispela pasin i no stret long tok bilong God na Em i no orait long en. Taim ol i krai singsing ol i save mekim ol tok olsem ol i toktok wantaim dispela man i dai pinis o ol tumbuna bilong bipo. As bilong ol dispela samting ol i mekim, em ol i pret long tewel bilong man i dai pinis. Tru, i no gat rong long bung wantaim ol bilong planim man, tasol ol man i pret long Jehova ol i mas tingting gut pastaim na tingim tok bilong Baibel i tok: “Yupela i mas lusim ol . . . nogut yupela i pas long ol samting i no klin long ai bilong God.” (2 Ko. 6:17) I gat planti samting yumi ken mekim bilong helpim famili bilong man i dai pinis, na ol dispela samting i stret wantaim tok bilong Baibel. Taim wanblut i dai, lain bilong Jehova i no ken larim bel hevi i daunim ol na bel bilong ol i bagarap tru. Long wanem, ol i save, ol man i dai pinis bai ol i kirap bek, olsem Baibel i tok: “Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis. Nogut yupela i sori tumas, olsem ol arapela manmeri i no bilip long God na i no wetim taim bilong kirap bek long matmat.”—1 Te. 4:13.
5 Tru, ol man bilong narapela narapela hap ol i gat pasin na tambu bilong ol yet long planim man. Tasol planti taim ol dispela pasin i gat wanpela as tasol—em dispela bilip olsem man i dai pinis em inap lukim yumi. Olsem na planti pasin ol i mekim taim man i dai pinis ol i pait wantaim lo bilong God. Ol man i lotu tru long God ol i klia long ol dispela pasin na ol i no laik kisim doti long en. Long sampela hap bilong Papua Niugini, taim ol i planim man ol i save putim kaikai, mani na klos samting long ples matmat o insait long matmat wantaim em. Inap planti wik ol wanhaus i mas kaikai ol samting bilong paia tasol, na papa i no save sev, na sampela i save slip long ples matmat. Ol i ting tewel bilong daiman bai stap sampela wik wantaim famili bilong em, olsem na ol i save putim kaikai bilong em long matmat na long haus bilong em bilong mekim gut bel bilong em, nogut tewel bilong em i kam bagarapim ol. Orait, bihain ol i kilim pik na mekim bikpela bung na kaikai. Ol i ting, long dispela taim tewel bilong man bai lusim ol na i go long ples bilong spirit, na sapos ol i no kilim pik na mekim kaikai bilong em, bai sik na bagarap i painim ol. Sampela lain bilong ol misin tu i save mekim olsem.
6 Long Song 106:28, 29, Baibel i stori long lain Israel ol i lusim lotu tru bilong Jehova na ol i mekim kaikai olsem ofa bilong ol man i dai pinis na ol i kaikai ol dispela ofa. Olsem na Jehova i gat kros long ol na i no laikim ol.
7 Olsem na taim ol i wokim bung bilong man i dai pinis, na long bung bilong marit, na taim meri i gat bel, na taim nupela pikinini i kamap, na long ol narapela taim olsem, yumi mas lukaut gut. Baibel i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.” (1 Pi. 5:8) Ating ol wanples bai strong long yumi putim paspas o hangamapim tanget o salat samting long haus. Tasol yumi mas tingim tok bilong Baibel i tok, Jehova ‘i no inap larim wanpela god giaman i senisim em.’ (Kis. 20:4-6) Sapos sampela lain bilong Jehova i stap “namel” na i holim yet dispela bilip giaman, Jehova i no ken orait long ol.—KTH 3:16.
8 Taim Man i Gat Sik: Sampela man, taim ol i gat sik ol i save go long haus sik, tasol dokta i no inap oraitim sik bilong ol. Olsem na ol i ting em sik bilong ples na ol i go lukim wanpela man bilong ples bilong oraitim sik bilong ol. Dispela man i save kisim kawawar o gorgor o lip na kulau samting na wokim olsem marasin. Tru, ol dispela samting yet i no nogut. Tasol ol bai mekim marila samting long dispela marasin. Dispela em i wok bilong ol spirit nogut. Long Kamapim Tok Hait 21:8 Baibel i kolim dispela tok, “ol man i wokim posin.” Long tok Grik dispela tok “posin” em phar-ma-kiˈa. Long Tok Pisin em olsem “mekim wok long drak” olsem marasin. Bipo ol glasman na ol man bilong mekim wok bilong ol spirit nogut ol i save wokim na yusim dispela marasin.
9 Na sampela taim sikman i mas givim wanpela kakaruk o pik samting long marilaman na em bai kilim na mekim marila samting long en na mekim olsem ofa long masalai samting. Long hap bilong Afrika wanpela man tit bilong em i pen na em i go long wanpela meri bilong kisim marasin bilong ples. Meri i givim long em na i tokim em, ‘Yu no ken lukluk long marasin. Sapos yu lukluk long en, bai strong bilong marasin i pinis.’ Tasol olsem wanem dispela marasin i save man i lukluk long en? Marasin i no gat ai, a? Olsem na yumi save, dispela meri i ting ol spirit yet i givim strong long marasin na nau marasin inap long oraitim sik.
10 Sampela “dokta bilong ples” ol i tok ol i no save mekim wok bilong ol spirit nogut. Tasol ol i no tok stret, long wanem, taim ol i wok long oraitim sik bilong man, ol i save wokim marila samting bilong ol. Sampela taim ol bai putim hap graun malumalum samting long skin na bihain ol i tekewe na ol i soim man long wanpela liklik hap mambu o ston samting na ol i tok ol i kamautim long skin bilong man na dispela i as bilong sik bilong ol.
11 Nau yumi save pinis long tingting bilong God, em i no laik tru long marila posin na kain samting olsem. (Lo 18:10-12) Planti taim wok bilong marasin ol dokta bilong ples i wokim em bilong amamasim masalai samting. Ol bai mekim singsing long dispela marasin, na kilim kakaruk samting na singaut long masalai i mas strongim dispela marasin. Tasol yu mas tingting: Dispela kakaruk o pik em i wanpela ofa bilong amamasim husat? Baibel i tok: “Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ ”—1 Ko. 10:20-22.
12 Taim yumi lusim pinis kalabus bilong ol spirit nogut, orait, nogut yumi kirap bihainim gen sampela bilip giaman bilong ol tumbuna. Tasol sapos yu traim pinis stretpela rot bilong oraitim sik bilong yu na sik i stap yet, orait yu ken mekim wanem? Baibel i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Sng. 55:22) Olsem na yu mas beten long Jehova. Tru, yu no ken askim em long wokim mirakel na oraitim yu. Tasol yu ken beten askim em long givim tingting long yu na yu inap painim gutpela haus sik na marasin. Na bikpela samting, yu mas beten askim Jehova long strongim bilip bilong yu na yu ken i stap bel gut. Na yu ken putim ol pikinini bilong yu tu long han bilong Jehova. Em yet i bin givim laip long ol. Olsem na em inap lukautim ol. Tasol em i no ken mekim long rot bilong ol samting bilong marila, olsem buai, gorgor, kawawar, na skin diwai samting.
13 Yumi save pinis, ol man bilong wokim marila posin samting na ol dokta bilong ples ol tu i save sik na ol i save dai. Na lain bilong Jehova wantaim pikinini bilong ol, ol i klia long ol samting bilong marila na ol wok bilong ol spirit nogut, tasol sampela taim bikpela sik i painim ol tu na ol i no inap orait. Tasol ol i save, Jehova i makim pinis taim bilong pinisim olgeta sik na pinisim i dai tu. Ol man i stap gut long lo bilong Jehova bai ol inap kisim laip oltaim long wanpela rot, em Baibel i tok piksa long en olsem “wanpela bikpela wara, em wara bilong givim laip,” na long arere bilong wara ol diwai i sanap, na “lip bilong diwai ol i bilong mekim orait ol manmeri bilong olgeta lain man.” (KTH 22:1, 2) Olsem na sapos bikpela sik i painim yumi na yumi laik bagarap, yumi ken tingim tok bilong Jisas, em i tok: “Sapos wanpela man i laik holimpas laip bilong em yet, laip bilong em bai i lus. Tasol, sapos wanpela man i ting long mi na i lusim laip bilong en, em bai i kisim laip bilong en.” (Mt. 16:25) Olsem na nogut yumi pret long i dai na yumi mekim sampela pasin bilong ol spirit nogut. Yumi ken putim laip bilong yumi long han bilong Nambawan Strongpela God, na bihain em bai kirapim bek yumi na yumi no ken sik moa.
14 Jisas i tok, “ol manmeri i stap strong inap long las de, God bai i kisim bek ol.” (Mt. 24:13) Long olgeta de yumi mas wok long sakim ol samting i laik pulim yumi i go bek insait long umben o kalabus bilong ol tumbuna na bilong ol spirit nogut. Sapos yumi pas yet long ol dispela bilip giaman bai yumi stap nogut long ai bilong God.
This article is unique to PNG.