Yumi Inap Mekim Samting Jehova i Laik Bai Yumi Mekim
1 Nambawan gutpela wok long i stap bilong yumi em long bihainim ol lo na stiatok bilong Jehova, na dispela i helpim yumi long mekim ol samting long nau bilong kisim laip oltaim long bihain. (Sng. 19:7-11; 1 Ti. 6:19) Tasol dispela graun Satan i bosim i save putim planti hevi long yumi. Yumi no gutpela olgeta na dispela tu i mekim na i hatwok. Taim yumi wok long truim ol wok bilong spirit yumi mas mekim, yumi inap pilim olsem yumi no gat strong. (Sng. 40:12; 55:1-8) Ating yumi inap kisim tupela tingting olsem yumi inap mekim olgeta samting Jehova i laik bai yumi mekim o nogat. Long kain taim olsem, wanem samting inap helpim yumi long holim gutpela tingting?
2 Ol Lo Bilong Jehova i No Givim Hevi: Jehova i no save askim yumi long mekim samting yumi no inap mekim. Ol lo bilong em i no givim hevi long yumi, ol i save lukautim yumi. (Lo 10:12, 13; 1 Jo. 5:3) Em i luksave olsem yumi ol man bilong graun na “em i tingim yumi i olsem das tasol.” (Sng. 103:13, 14) Yumi traim bes bilong yumi long mekim wok bilong God na long pasin marimari em i save orait long dispela, maski sindaun bilong yumi i mekim na yumi no inap mekim planti samting. (Wkp. 5:7, 11; Mk. 14:8) Em i singautim yumi long putim olgeta hevi bilong yumi long em, na em i tokaut olsem em bai helpim yumi long stap gut long em.—Sng. 55:22; 1 Ko. 10:13.
3 Yumi Gat Wok Long Sanap Strong: Ol stori bilong Baibel long ol man i bin stap gut long God, olsem Elaija, Jeremaia, na Pol, i soim olsem yumi gat wok long sanap strong. (Hi. 10:36) Jehova i bin strongim ol long taim bilong hevi na taim ol i bel hevi. (1 Kin. 19:14-18; Jer. 20:7-11; 2 Ko. 1:8-11) Na pasin bilong ol brata bilong yumi long nau long i stap gut long God i kirapim yumi. (1 Pi. 5:9) Taim yumi tingim tingim long bel ol dispela samting, dispela inap helpim yumi na bai yumi no bel hevi.
4 Yumi bilip na wetim ol samting God i promis long en na dispela i olsem “strongpela anka bilong laip bilong yumi.” (Hi. 6:19) Dispela i bin kirapim Abraham na Sara long bihainim tok bilong Jehova long lusim ples bilong ol na go “sindaun long dispela graun bipo God i tok long givim em.” Dispela bilip i bin strongim Moses na em i no pret long sambai long tok i tru. Bilip i strongim Jisas na em i stap strong na karim pen long diwai pos. (Hi. 11:8-10, 13, 24-26; 12:2, 3) Taim yumi wok long tingim promis bilong God long kamapim nupela taim, dispela bai helpim yumi long sanap strong.—2 Pi. 3:11-13.
5 Taim yumi tingim bek ol samting yumi yet i bin mekim bilong i stap gut long God, givim yumi yet, na no ken pret, dispela tu inap strongim yumi long wok autim tok bilong yumi. (Hi. 10:32-34) Dispela i save kirapim yumi long tingim amamas yumi kisim taim yumi mekim samting Jehova i laik bai yumi mekim—em pasin bilong givim bel olgeta long em.—Mt. 22:37.
[Askim Bilong Stadi]
1. Sampela taim yumi inap kisim wanem kain tingting? Bilong wanem kain tingting i save kamap?
2. Olsem wanem Jehova i save bihainim stretpela tingting long ol samting em i laik bai yumi mas mekim?
3. Olsem wanem Jehova i save strongim yumi long sanap strong?
4. Bilong wanem em i bikpela samting long tingting long ol promis bilong God?
5. Sapos yumi tingim bek ol samting yumi yet i bin mekim bilong i stap gut long God, olsem wanem dispela inap strongim yumi?