Riviu Bilong Skul Tiokratik Bilong Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Ogas 30, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Julai 5 i go inap long Ogas 30, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius samting bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Olsem wanem yumi inap kamapim klia as bilong ol gutpela samting yumi wetim na mekim long “pasin isi na long pasin bilong soim rispek.” (1 Pi. 3:15, NW ) [2, be p. 192 par. 2-4] Taim yumi autim tok, em i no gutpela long yumi kamapim long ples klia olsem tingting bilong man bilong haus i kranki na yumi mekim long wanpela rot i semim em. I gutpela yumi askim em long wanem as na em i pilim olsem, orait nau toktok gut wantaim em long ol tok bilong Baibel. Taim yumi mekim tok long pletfom, yumi no ken sutim tok long odiens, yumi mas tingim olsem ol i laikim God na ol i laik mekim wok bilong em.
2. Bilong wanem em i bikpela samting long mekim tok i soim olsem yu bilipim tru tok yu mekim? (Ro. 8:38, 39; 1 Te. 1:5; 1 Pi. 5:12) [3, be p. 194] Ol narapela inap luksave olsem yumi bilipim tru tok yumi mekim. Taim yumi bilipim tru tok yumi mekim, dispela i gat bikpela strong long kamapim olsem tok yumi givim long ol i bikpela samting, na dispela bai kirapim ol narapela long tingting gut long tok bilong yu na kirap bihainim.
3. Olsem wanem yumi inap kamapim olsem yumi bilip tru? [4, be p. 195 par. 3–p. 196 par. 4] Ol tok yumi kolim inap kamapim olsem yumi bilipim tru tok yumi mekim. (Hab. 2:3; Jo. 5:19, 24, 25; Ro. 8:38; 14:14; 1 Ti. 2:7) Sapos yumi bilipim tru tok yumi mekim na pilim olsem dispela tok inap helpim odiens, orait dispela bai kamap klia long pes bilong yumi, pasin bilong tromoi han, na pasin bilong yumi long meknaisim bodi.
4. Pasin bilong mekim tok long gutpela pasin i makim wanem samting? Bilong wanem em i bikpela samting? Olsem wanem yumi inap mekim tok long gutpela pasin tasol yumi mas tok stret tu wantaim? (Ro. 12:18) [5, be p. 197] Pasin bilong mekim tok long gutpela pasin i olsem yumi mekim tok long pasin i no skrapim bel bilong ol narapela. Sapos yumi mekim tok long gutpela pasin, ating ol man bai i gat laik long harim gutnius. Yumi mas tingim olsem maski yumi mekim tok long wanem kain pasin sampela man bai bel hevi kwik long tok yumi mekim. (1 Pi. 2:7, 8)
5. Paslain long toktok, man bilong mekim tok long gutpela pasin bai mekim wanem? (Snd. 15:23; Jo. 16:12) [7, be p. 199] Bilong mekim tok long gutpela pasin, yu mas skelim wanem taim stret bilong mekim tok. Ating yumi no inap wanbel long olgeta tok narapela i mekim, tasol yumi no gat wok long tok pait wantaim em long olgeta tok em i mekim i no wanbel wantaim tok bilong Baibel. Yumi ken kisim tingting olsem dispela em i rot bilong kisim save long tingting bilong narapela. Long taim i stret long mekim, yumi ken tok amamas long em i kamapim tingting bilong em long lotu. (Ap. 17:22)
TOK NAMBA 1
6. Olsem wanem ol samting yumi toktok long en na pasin bilong yumi long stadi long Baibel bai kamapim klia yumi kamap gutpela moa long ol samting bilong spirit o nogat? [2, be p. 74 par. 3-p. 75 par. 2] Ol man i “kamap nupela manmeri” ol i sakim pasin bilong tok giaman, tok doti o tok i makim olsem ol i ting gutpela samting i no inap kamap. Toktok bilong ol i save “bringim marimari bilong God i kam long ol man i harim.” (Ef. 4:24, 25, 29) Ol man husat i kliagut long tok i tru i no save lusim sampela wok bilong spirit bambai ol inap kisim ol nupela kain tingting, o go insait long wanpela lain i strong long helpim ol man o wanpela wok samting, o painim kain kain amamas em ol man bilong dispela graun i wok long kamapim. (Ef. 3:18; 4:14) Pasin yumi mekim long ol narapela man inap makim olsem yumi kamap gutpela moa long ol samting bilong spirit o nogat. (Ef. 4:32)
7. Wanem insait bilong dispela tok ‘yumi gat taim bilong mekim pasin bilong God, tasol nogut dispela taim i lus nating’? Olsem wanem yumi inap long mekim olsem? (Ef. 5:16) [5, w02 11/15 p. 22, 23] Dispela i makim olsem yumi no ken lusim taim long ol samting i no bikpela samting. Taim yumi no lusim bikpela taim long lukim TV o Intenet, o ritim ol buk nating, o lusim bikpela haptaim long painim ol amamas, bai yumi gat bikpela haptaim long mekim “ol samting i bikpela samting tru.” (Fl. 1:9, 10, NW ) Em ol samting olsem stadi bilong yumi yet long Baibel, em long rot bilong en yumi kamap strong long ol samting bilong spirit na yumi go klostu moa long Jehova. (Sng. 1:1-3)
8. Olsem wanem Baibel i kamapim klia olsem long ai bilong God olgeta man i wankain? Dispela i mas mekim wanem long wok bilong yumi long autim tok? [6, w02 1/1 p. 5, 7] Aposel 17:26 i tok: “Long wanpela tumbuna tasol [God] i bin mekim olgeta lain manmeri i kamap.” Man Bilong Wokim olgeta samting i no save tingim ol man bilong wanpela kain skin o sindaun tasol, nogat. (Jop 34:19) Taim yumi dai, yumi olgeta i wankain tasol. (Sng. 49:10; Sav. 9:5, 10) Olgeta man i bilip long Jisas Krais ol i gat rot bilong i stap gut oltaim oltaim. (Jo. 3:16) Ol dispela samting i mas kirapim yumi long autim tok long “olgeta manmeri” na i no wanpela lain tasol. (1 Ti. 2:4)
9. Wanem insait bilong nem bilong Man Bilong Wokim olgeta samting, em Jehova? [7, w02 1/15 p. 5] Insait bilong nem bilong God i olsem, “Em i Mekim i Kamap.” Dispela i makim olsem em inap kamap wanem wanem kain em i laikim bambai em i ken kamapim laik bilong em. (Kis. 3:14, NW ) Yumi ken luksave long dispela long ol nem em i holim. (Het. 11:27; Sng. 23:1; 65:2; 73:28; 89:26; Ais. 8:13; 30:20; 40:28; 41:14) Trupela God tasol inap tru long holim dispela nem Jehova, long wanem, em tasol inap long mekim laik bilong em i kamap tru. (Ais. 55:10, 11)
10. Wanem samting i mekim na “God i laikim ofa bilong Abel” winim bilong Kein? Yumi inap lainim wanem samting long dispela taim yumi laik “givim biknem” long God? (Hi. 11:4; 13:15) [8, w02 1/15 p. 21 par. 6-8] Tru Kein na Abel i luksave olsem ol i sinman na ol i laik bai God i orait long ol, tasol Abel i bilip na i mekim ofa. Yumi ken ting Kein i no tingim tumas ofa bilong em na em i givim nating tasol long God. Ofa bilong yumi long autim tok bilong “givim biknem” long God i mas kamapim klia yumi laikim God na bilip long em na yumi no mekim nating tasol, God bai amamas long kain ofa olsem. (Ro. 10:10)
BAIBEL RITIM BILONG WIK
11. Olsem wanem Wok Pris 18:3 inap helpim yumi long abrusim tingting kranki bilong ol man long wanem samting i stret na wanem samting i no stret? (Ef. 4:17-19) (1, w02 2/1 p. 29) Yumi no ken wokabaut long pasin bilong ol man bilong graun, dispela i makim olsem yumi no ken larim maus bilong bel bilong yumi, em Baibel i skulim pinis, long larim tingting kranki bilong ol man long wanem samting i stret na wanem samting i no stret i bagarapim dispela samting.
12. Dispela “tupela bret” em hetpris i holim long han na i save mekim i go i kam long ai bilong Bikpela long taim bilong Bikpela De Bilong Amamas Long Kisim Kaikai Long Gaden (Pentikos) i makim wanem samting? (Wkp. 23:15-17) [2, w98 3/1 p. 13 par. 21] Dispela tupela bret i gat yis em ol i wokim long namba wan wit ol i bin kisim long gaden. Ol dispela bret i gat yis i olsem piksa na i makim 144,000 manmeri bilong graun ol i gat sin, em Jisas ‘i bin baim ol bilong givim ol long God’ bambai ol i ken mekim wok olsem “pris bilong lain bilong king . . . na bai ol i stap king na bosim ol manmeri bilong graun.” (KTH 5:9, 10; 14:1, 3) Ol dispela king long heven ol i bilong tupela lain bilong ol sinman bilong graun, em ol Juda na ol narapela lain, na ating dispela tupela bret i gat yis i makim dispela samting tu.
13. Taim meri marit i mekim pasin pamuk olsem Namba sapta 5 i stori long en, olsem wanem “samting bilong en bai i slek”? (Nam. 5:27) [5, w84-E 4/15 p. 29] Dispela tok “samting bilong en” i makim hap bilong meri long kamapim pikinini. Dispela tok “slek” i makim olsem dispela hap bilong meri long kamapim pikinini bai i go liklik, na meri i no inap kisim bel. Dispela i stret wantaim dispela tok olsem: sapos meri i no gat asua, orait man bilong em i mas slip wantaim meri na em bai kisim bel.
14. Bilong wanem Miriam na Aron i sutim tok long Moses long em i maritim meri bilong kantri Sudan? (Nam. 12:1) Miriam i laik kisim biknem na namba. Ating em i tingting planti, nogut meri bilong Moses i kisim biknem long ai bilong ol manmeri. Miriam i kirapim Aron long bung wantaim em na sutim tok long Moses long em i maritim wanpela meri Sudan na em i toktok planti long wok bilong Moses. Olsem na Jehova i stretim Miriam na Aron, tasol Jehova i givim sik lepra long Miriam tasol, na dispela i makim olsem em i go pas long toktok planti bilong daunim Moses. [7, w02 10/15 p. 29; w84-E 4/15 p. 29-30]
15. Wanem dispela “buk i stori long ol pait bilong Bikpela”? (Nam. 21:14) Em wanpela buk i kamapim ol trupela stori bilong ol pait em lain bilong God i bin mekim. Ating stori insait long buk i kirap long taim Abraham i bin pait na winim fopela king em ol i bin kisim Lot na famili bilong em. (Stt. 14:1-16) Ating em i gat stori tu bilong ol pait em Baibel i no stori long en. [9, cl p. 64; w90-E 7/1 p. 20, 23; it-1-E p. 355]