Amamas Long Poromanim Ol Brata

¹ Ol Witnes Bilong Jehova i save kolim ol wanbilip olsem “brata” o “sista.” Dispela i makim pasin bilong pas gut tru wantaim arapela, em dispela pasin i save stap namel long ol wokman bilong God Jehova.

² Dispela tok “brata” i makim “pikinini man bilong wanpela papa na mama.” Olsem wanem? Yu pilim olsem long ol samting bilong spirit yu save pas gut wantaim ol wokman bilong Jehova em ol i dediket pinis? O yu pilim olsem yu pas gut moa wantaim ol wanblut na wantok em ol i no save lotuim Jehova? Yumi mas pas gut moa yet wantaim ol wanbilip bilong yumi winim ol narapela. Olsem wanem yumi ken kisim pasin laikim i kamapim klia olsem yumi brata o sista bilong ol wanlain Kristen bilong yumi?

³ Yumi mas tingim wanem samting taim yumi laik kisim ol pren tru? Jisas i kamapim klia dispela samting taim em i tok: “Sapos yupela i mekim olsem mi bin tokim yupela, orait yupela i stap pren bilong mi.” (Jo. 15:14) Dispela i soim olsem bilong tupela man i ken kamap gutpela pren Kristen, tupela wantaim i mas i gat laik long bihainim tok bilong Krais. Ol pren bilong Jisas em ol man i bihainim tok bilong em—maski ol i gat hamas krismas, ol i mekim wanem tok ples o ol i bilong wanem lain. Na i wankain tu long ol Kristen tru. Dispela laik bilong ol long lotuim God i kirapim ol long pas gut wantaim winim ol famili bilong ol.

⁴ Long Ol Miting: Ol disaipel bilong Jisas i save olsem em i bikpela samting long ol i mas bung wantaim. (Ap. 2:42, 46; 20:7, 8) Yumi tu yumi save amamas long bung wantaim ol Kristen. (Ro. 16:3, 5) Tasol olsem wanem? Ol tok yumi mekim long ol miting i save kamapim klia olsem yumi tingim i stap bilong ol brata na sista bilong yumi long ol samting bilong spirit? Long rot bilong ol tok yumi bekim long ol miting, yumi inap strongim pasin laikim na pasin bilong tingim gut ol arapela. Yumi laik kirapim ol brata bilong yumi long givim bel long autim gutnius na stap olsem gutpela piksa long olgeta samting long i stap bilong ol.—Hi. 10:24, 25.

⁵ I gat rot bilong poroman na toktok gut wantaim ol brata na sista paslain na bihain long ol miting. Yumi mas yusim dispela haptaim bilong toktok wantaim na kisim save long ol arapela brata na sista na tok welkam long ol nupela man i kam long ol miting. Taim yumi toktok wantaim ol bratasista long ol ekspiriens bilong yumi long wok autim tok na long ol narapela gutpela samting dispela bai strongim ol.—1 Te. 5:11, 15.

⁶ Poroman Wantaim Ol Gutpela Poroman: Wanpela man i no inap wokabaut wantaim God na long wankain taim em i pas wantaim ol man nogut bilong dispela graun em ol i orait long ol samting God i no laikim. Baibel i mekim dispela tok lukaut: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Ko. 15:33) Ating sampela insait long kongrigesen ol i laik poroman wantaim ol wanblut i no Witnes na ol narapela em ol i no gat laik long tok i tru. Tasol yu ting dispela i savepasin na i stret wantaim tok bilong Baibel? Sapos yumi sindaun long ples, dispela i makim olsem yumi stap namel long ol wanblut bilong yumi. Olsem wanem? Yumi save wok strong long poroman wantaim ol wanblut bilong yumi i stap long tok i tru? Na i wankain tu, sapos yumi sindaun long wanpela setelmen, em pasin bilong yumi long bung wantaim ol brata spirit bilong yumi na i no ol lain ausait long kongrigesen?

⁷ Yumi bin kisim tok lukaut long was gut long ol man bilong graun, ol man i no bilip na ol man nating. (Lukim Wastaua, Me 1, 1989, p. 16-17.) I no stret yumi poroman wantaim ol man em ol i wok yet long bihainim ol pasin bilong dispela graun na ol i no lotuim Jehova, a? (2 Ko. 6:14, 15) Yumi no ken lusim tingting long ol samting bilong spirit na poroman wantaim ol narapela i holim yet tingting na pasin bilong dispela graun. Yumi mas poroman wantaim ol Kristen i strong long ol samting bilong spirit em ol inap helpim yumi long sanap strong long bilip. Sapos yumi poroman wantaim ol man bilong dispela graun, dispela inap mekim na bilip bilong yumi i no strong moa na yumi inap lusim bilip.—2 Te. 3:14, 15.

⁸ Olgeta taim wanpela yangpela, nem bilong em Lynn i mekim ol samting i kamapim hevi. Bilong wanem i olsem? Long wanem em i raun wantaim ol poroman nogut. (Kis. 23:2; 1 Ko. 15:33) Olsem wanem em inap stretim dispela hevi? Em i mas painim ol nupela pren! Lynn i tok: “Sapos yu gat ol pren i save laikim Jehova, dispela bai helpim maus bilong bel bilong yu i mekim gutpela wok na bai yu abrusim pasin nogut. Taim ol dispela pren i tokaut olsem ol i no laikim tru pasin nogut, dispela bai kirapim yu long kisim wankain tingting.”

⁹ Sapos yu makim ol poroman nogut dispela bai pasim yu long kamap pren bilong God. Ann i gat 18 krismas i tokaut long dispela: “Ol poroman bilong yu ol i gat strong. I no longtaim na yu bai kamap wankain olsem ol. Ol bai mekim yu i kisim wankain tingting olsem bilong ol. Ating ol bai stori planti long maritpasin. Na dispela inap kirapim tingting bilong yu. Sapos mi mekim dispela pasin em bai olsem wanem?” Hevi i painim Ann pastaim na nau em i kisim gutpela tingting. Em i tok: “Mi save dispela samting i tru. Mi mekim pasin pamuk na taim mi gat 15 krismas mi kisim bel.”

¹⁰ Bilong i stap insait long tok i tru yumi mas redi long lusim sampela samting bilong yumi yet. Jisas i tok olsem: “Kingdom bilong heven em i olsem wanpela bisnisman i wok long painim ol naispela naispela bis. Na taim em i lukim wanpela bis i gutpela tru, orait em i go salim olgeta samting bilong en na i go baim dispela gutpela bis.” (Mt. 13:45, 46) Jisas yet i olsem bisnisman i painim pinis bis i dia tumas. Em i lusim bikpela namba em i bin holim long heven na kamap man nating long graun na karim bikpela pen na hevi, na long dispela rot em inap kamap King Bilong Kingdom. Ol man i bihainim Jisas i olsem ol tu i mas salim olgeta samting bilong ol bambai ol inap kisim gutpela prais, olsem ol inap mekim wok king wantaim Jisas o stap aninit long Kingdom bilong em hia long graun.

¹¹ Orait olsem wanem long yumi? Kingdom Bilong God em i nambawan samting long yumi winim ol narapela samting long i stap bilong yumi, kain olsem bis i dia tumas?

¹² Wanpela samting yumi mas sakim bambai yumi inap kisim laip oltaim em yumi no ken poroman wantaim ol man husat i no lotuim Jehova. Tasol dispela i no makim olsem bai yumi i no gat ol pren na famili. Jisas i mekim dispela tok promis: “Mi tok tru long yupela, olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.”—Mk. 10:29, 30.

¹³ Man i laik bihainim tok i tru na kamap strong moa long ol samting bilong spirit, em i mas painim ol poroman husat i save givim bel olgeta long Jehova na ol bai helpim em long wokabaut long tok i tru na long kamap strong long mekim wok bilong God. Ol pren na lain yumi bung wantaim inap long stiaim yumi. Louise, em wanpela yangpela meri Kristen i tok: “Inap tupela yia mi bin tingting long mekim wok painia na bihain mi putim nem bilong mi long mekim dispela wok. I no gat wanpela samting i pasim mi long mekim wok painia, mi amamas long sindaun bilong mi, olsem na mi no mekim wanpela samting bilong senisim. Bihain papa bilong mi i dai wantu tasol. Nau mi save, laip bilong mi tu inap pinis wantu tasol na mi mas mekim gutpela wok long laip bilong mi. Olsem na mi kirap na tingim ol samting bilong spirit, na mi lusim sampela aua moa long mekim wok autim tok, na mi kamap wanpela painia oltaim. Sampela brata na sista bilong mi long spirit ol i helpim mi gut na oltaim ol i kam long grup na wok wantaim mi long autim tok. Mi kisim save olsem, yumi save bihainim tingting bilong ol poroman bilong yumi long wanem samting i bikpela samting na wanem mak yumi laik winim, na dispela inap mekim gut long yumi o nogutim yumi.” Olsem na, em i savepasin long poroman wantaim ol man i save daun long Jehova na pas gut wantaim em!—Sng. 119:63.

This article is unique to PNG.