Riviu Bilong Skul Tiokratik Bilong Wok Autim Tok
Bai yumi toktok long ol dispela askim long Skul Tiokratik Bilong Autim Tok long wik i kirap long Disemba 27, 2004. Wasman skul bai mekim riviu inap 30 minit long ol tok i bin kamap insait long skul long wik i kirap long Novemba 1 i go inap long Disemba 27, 2004. [Harim: Long ol askim we mipela i no kamapim nem bilong ol buk samting mipela i kisim ol tok long en, yupela yet i mas skelim ol buk na nius bilong painim bekim bilong ol dispela askim.—Lukim buk Skul Bilong Autim Tok, p. 36-37.]
PASIN BILONG TOKTOK
1. Wanem wanpela gutpela rot bilong kirapim laik bilong ol man long harim tok? [3, be p. 218 par. 4] Soim odiens olsem dispela tok em i bikpela samting long ol. Soim ol olsem wanem samting yumi stori long en i stret long ol hevi bilong ol, o ol samting ol i mas kisim, o ol samting ol i gat askim long en. Yumi mas kamapim klia olsem yumi no laik stori antap antap tasol long ol dispela tok, na yumi laik stori gut tru long ol wan wan bikpela samting. Bilong mekim olsem yumi mas redi gut.
2. Kolim faipela samting i mekim na pinis bilong tok i mekim gutpela wok. [5, be p. 220 par. 4–p. 221 par. 4] Pinis bilong tok i mas (1) stret wantaim tim bilong tok, (2) soim ol man long ol samting ol i mas mekim, (3) kirapim ol long mekim samting, (4) makim olsem tok i laik pinis, na (5) i no ken longpela tumas.
3. Yumi ken mekim wanem na bai yumi kamapim tok i stret? [8, be p. 224 blok] Yumi (1) no ken bekim askim taim yumi no klia long bekim, maski yumi ting yumi mas mekim olsem, (2) ‘ol gutpela tok’ bilong Baibel i mas stap olsem as bilong ol tok yumi mekim, (3) wok long painim save, na (4) skelim ol namba na ekspiriens yumi kamapim, ol i stret o nogat. Na taim yumi kolim ol dispela tok, yumi mas kolim stret, no ken senisim o bilasim ol dispela tok. (2 Ti. 1:13)
4. Yumi ken mekim wanem na bai ol tok yumi mekim long ol miting i soim olsem yumi pilim tru wok bilong kongrigesen long i stap olsem “strongpela pos i karim tok i tru”? (1 Ti. 3:15) [8, be p. 224 par. 1-4] Bilong holim strong tok i tru, yumi mas save gut long mining bilong ol skripsa yumi tingting long kamapim. Taim yumi tingim ol ves i stap klostu long ol na wanem wok bilong ol dispela skripsa, yumi ‘holim strong tok i tru.’ (Ta. 1:9) Sapos as bilong ol tok yumi mekim em ‘ol gutpela tok,’ na yumi larim ol buk samting em wokboi i gat gutpela tingting i bin givim yumi i stiaim yumi taim yumi kamapim insait bilong ol skripsa na stori long olsem wanem ol i ken bihainim, orait ol tok bilong yumi bai i stret tasol.
5.Taim yumi laik kamapim stori bilong ol samting i kamap nau tasol, na tok sampela man i bin mekim, na ol ekspiriens, olsem wanem yumi ken bihainim tok bilong Sindaun 14:15? [9, be p. 225 par. 1] Yumi mas kisim ol dispela tok long ol nius yumi inap bilipim. Taim yumi laik skelim ol tok i stret o nogat, yumi mas askim yumi yet: ‘Dispela ol tok i stret long nau? Hap mi kisim dispela tok long en i gat nem long mekim tok tru tasol? Yumi inap painim sampela tok long narapela hap bilong truim dispela tok?’ Sapos yumi gat tupela tingting olsem samting i tru o nogat, orait yumi no ken kamapim.
TOK NAMBA 1
6. Olsem wanem yumi ken kaunim hamas yia i stap namel long Bikpela Tait na i go bek inap long taim God i bin wokim Adam? [1, bsi04 Stadi Namba 3 par. 12] Stat 5:3-29 na 7:6, 11 i stori long dispela haptaim olsem 1,656 yia. Ol dispela ves i stori long ol man kirap long Adam na i go long Noa na ol i kolim hamas krismas bilong olgeta wan wan bilong ol taim ol i kamap papa bilong narapela.
7. Olsem wanem yumi inap save long taim Jisas i kirap mekim wok bilong em long autim tok? Wanem samting i soim olsem em i mekim wok insait long 3 na hap yia tasol? [2, bsi04 Stadi Namba 3 par. 16] As na yumi tok Jisas i bin kirap mekim wok bilong em long yia 29 C.E. em tok bilong Luk 3:1-3 na ol tok bilong ol samting i bin kamap long bipo i makim 14 C.E. olsem yia Taiberius i kirap mekim wok king. Buk Jon i stori long 4-pela bung bilong Pasova i bin kamap na dispela i helpim yumi long save, Jisas i bin mekim wok inap 3 na hap yia. (Jo. 2:13; 5:1; 6:4; 12:1; 13:1)
8. (a) “Tok i kamap bilong wokim gen Jerusalem” i kamap long wanem taim? (b) Kirap long dispela taim na i go long taim Jisas bai kam olsem Mesaia, em inap hamas yia? (Dan. 9:24-27) [3, bsi04 Stadi Namba 3 par. 18-19] “Tok i kamap bilong wokim gen Jerusalem” i kamap long yia 455 B.C.E. (Neh. 1:1; 2:1, 17) Dispela 69 taims 7-pela yia o 483 yia, i pinis long taim Jisas i kisim baptais na God i makim em long holi spirit na em i kamap Mesaia long Oktoba samting bilong 29 C.E.
9. Wanem ol samting i insait long pasin bilong tok sori na dispela i opim rot bilong yumi “stretim tok wantaim brata bilong yumi”? (Mt. 5:23, 24) [7, w02 11/1 p. 6 par. 1, 5] Pasin bilong pilim tru long bel na tok sori i makim olsem yumi tokaut long asua bilong yumi, na askim narapela long lusim dispela rong bilong yumi, na mekim ol samting bilong stretim dispela hevi. Na man em narapela i rongim em, em i mas redi long lusim rong bilong man i tokaut olsem em i bin popaia. (Mt. 18:21, 22)
10. Tok bilong 2 King 13:18, 19 i skulim yumi olsem wanem long pasin bilong mekim wok Jehova i givim yumi? [8, w02 12/1 p. 31 par. 1-2] Long planti rot Jehova i save strongim yumi, tasol em i laik bai yumi yet i mas givim bel long mekim wok. King Jehoas i no givim bel long mekim wok, olsem na em i no pinisim tru ol birua bilong em. Dispela i wankain long yumi tu. Yumi no ken tingting planti long ol hevi o ol wok yumi kisim i hatwok tru long mekim, yumi mas wok strong na givim bel olgeta long mekim, na bilip long Jehova bai helpim yumi. (Ais. 35:3, 4)
BAIBEL RITIM BILONG WIK
11. Ol Israel i no ken kaikai wanpela animal i dai nating na ol i no bin rausim blut. Olsem na bilong wanem ol i ken givim o salim long ol man bilong ol narapela kantri em ol i stap wantaim ol? (Lo 14:21) Long Baibel, dispela tok “man bilong narapela kantri” inap makim wanpela man i no bilong lain Israel em i bihainim lotu Juda o wanpela man em i bihainim ol lo bilong ol Israel tasol em i no lotuim Jehova. Wanpela man bilong narapela kantri i no bihainim lotu Juda, em i no stap aninit long Lo na em inap mekim kain kain wok long animal i dai nating. I orait long ol Israel long givim o salim ol kain animal olsem long em. Tasol man bilong narapela kantri i bihainim lotu Juda em i stap aninit long Lo. Na olsem Wok Pris 17:10 i tok, i tambu long dispela man i kaikai blut bilong animal. [1, w04 9/15 p. 27]
12. Tok bilong Lo 20:5-7 i skulim yumi long wanem samting? Maski sampela samting i bikpela samting long yumi mekim, tasol yumi mas tingim ol man em sindaun bilong ol i narapela kain. [2, w04 9/15 p. 27]
13. Bilong wanem Lo i tambuim pasin bilong kisim “ston bilong wilwilim rais samting” olsem mak long man i gat dinau? (Lo 24:6) Ston bilong wilwilim rais samting i makim ol samting man i mekim wok long en bilong helpim em long i stap laip. Sapos wanpela man i kisim dispela samting long em, em i pasim dispela man na famili bilong em long kisim kaikai samting. [3, w04 9/15 p. 26]
14. Lo i tambuim ol Israel long kaikai gris olsem na wanem mining bilong dispela tok i stap long Baibel Hibru bilong pastaim i tok olsem ol Israel i kaikai “gris bilong sipsip man”? (Lo 32:13, 14) Tok ol i mekim wok long en long dispela ves i tok piksa tasol na i makim ol sipsip i gutpela tru. Long dispela ves long Baibel Hibru bilong bipo ol i mekim wankain tok piksa taim ol i toktok long “gris bilong wit” na “blut bilong grep.” [5, w04 9/15 p. 27]
15. Rong bilong Akan i makim wanem samting long nau? (Jos. 7:1-26) [7, w87 1/1 p. 22 par. 20] Kirap long 1919, sampela taim i gat ol man olsem “weldok nogut tru” ol i bikhet long ol man God i givim wok bos long ol na ol i bihainim laik bilong ol yet, olsem Akan, ol i bin kam namel long lain bilong God. Ol dispela man bilong mangal ol i bihainim gen ol tok bilong ol Babilon. Long pasin hait ol i bin wok long bagarapim bilip bilong ol brata bambai ol brata i ting olsem yumi no stap long “las taim” na ol i mekim na bai ol brata i no wok moa long autim tok. Olsem na kongrigesen i bin rausim ol dispela man. (Ap. 20:29; 2 Pi. 3:3, 4; 2 Jo. 10, 11)