Namba 9 Hap—Mekim Ol Baibel Stadi i Save Helpim Ol Man
Redim Ol Sumatin Long Autim Tok Long Kain Kain Taim na Ples
1 Taim Andru na Filip i kisim save olsem Jisas em i Mesaia, ol i no inap pasim dispela laik long tokim ol narapela long dispela samting. (Jo. 1:40-45) Olsem tasol long nau, taim ol Baibel sumatin i bilipim ol samting ol i lainim, dispela i kirapim ol long tokim ol narapela long ol dispela samting. (2 Ko. 4:13) Olsem wanem yumi ken kirapim ol long autim tok long kain kain taim na ples na redim ol long mekim gut dispela wok?
2 Yu ken askim sumatin olsem em i bin tokim ol narapela long ol samting em i lainim long Baibel o nogat. Ating em i ken singautim ol pren na famili bilong em long insait long stadi taim yupela i stadi. Askim em sapos ol wanwok, wanskul, o ol narapela i kamapim olsem ol i gat laik long harim tok. Long rot bilong singautim ol narapela long insait long stadi bilong em na toktok wantaim ol lain i gat laik long harim tok, em inap kirap autim tok. Helpim em long save olsem em i mas bihainim gutpela tingting na soim rispek na gutpela pasin taim em i tokim ol narapela long God Jehova na samting Em i tingting pinis long mekim.—Kl. 4:6; 2 Ti. 2:24, 25.
3 Tokim Ol Narapela Long Bilip Bilong Ol: Em i bikpela samting long skulim ol Baibel sumatin long yusim Baibel taim ol i tokim ol narapela long bilip bilong ol. Long taim bilong stadi, yu ken askim sumatin: “Olsem wanem yu ken yusim Baibel long stori long dispela tok i tru long famili bilong yu?” o “Bai yu yusim wanem skripsa bilong kamapim klia dispela bilip long wanpela pren bilong yu?” Skelim bekim bilong em, na soim em long olsem wanem em i ken mekim wok long Baibel taim em i skulim ol man. (2 Ti. 2:15) Taim yu mekim olsem, yu redim sumatin long autim tok long kain kain taim na ples na taim em i kamap pablisa em inap long autim tok wantaim kongrigesen.
4 Em i savepasin long redim ol Baibel sumatin long karim hevi taim ol man i birua long ol. (Mt. 10:36; Lu. 8:13; 2 Ti. 3:12) Taim ol narapela i kamapim askim o mekim sampela tok long ol Witnes Bilong Jehova, dispela inap opim rot bilong sumatin long autim tok. Buklet Ol Witnes Bilong Jehova—Ol i Husat? Ol i Bilip Long Wanem Samting? inap helpim ol long “redi oltaim long bekim tok.” (1 Pi. 3:15) Em i kamapim stret ol samting we nupela sumatin i ken yusim bilong helpim ol pren na famili bilong em long kliagut long ol bilip na wok bilong yumi em Baibel i as bilong en.