Rot Bilong Givim Bel Yet Long Autim Tok
1 Apolos i bin wok strong tru long autim tok, olsem na pasin bilong em i kirapim yumi long tingim ol wanlain Kristen long nau em ol i save givim bel tru long autim tok. (Ap. 18:24-28) Tasol Baibel i tokim yumi olgeta: “Yupela i mas wok strong oltaim na larim Holi Spirit i kirapim yupela.” (Ro. 12:11) Wanem samting inap helpim yumi long kisim na holimpas pasin bilong givim bel long autim tok?
2 Save i Strongim Yumi: Jisas i kamap long tupela disaipel bilong em na “skulim tupela long as bilong olgeta hap bilong buk bilong God i toktok long em yet,” na bihain tupela i tok: “Taim mitupela i wokabaut long rot, na em i givim toktok long mitupela, . . . bel bilong mitupela i bin kirap tru.” (Lu. 24:27, 32) Olsem tasol, taim save bilong yumi long Tok Bilong God i go bikpela moa, bel bilong yumi i save kirap tru, a? Tru tumas, save yumi kisim i save strongim bilip bilong yumi. Rom 10:17 i tok: “Yumi harim tok bilong God na dispela i kirapim bilip.” Taim yumi bilip tru long ol tok promis bilong Jehova, yumi no inap tru long pasim maus na tokaut long ol samting yumi lainim!—Sng. 145:7; Ap. 4:20.
3 Yumi no ken ting olsem save yumi bin kisim bipo taim yumi bin stadi, dispela samting tasol inap helpim yumi long laikim tru God na givim bel yet long mekim wok bilong em, nogat. Yumi mas wok yet long kisim sampela save moa long tok i tru na givim bel moa yet long Jehova. Sapos yumi no mekim olsem, wok bilong God yumi mekim bai kamap olsem samting yumi mekim nating tasol. (KTH 2:4) Baibel i save kirapim yumi long wok oltaim long kisim stretpela save long God, na ‘oltaim dispela save bai kamap bikpela moa.’—Kl. 1:9, 10.
4 Pasin Bilong Yumi Long Stadi: Olsem na yumi mas skelim pasin bilong yumi long stadi. Olsem: Ating yumi save makim ol bekim long Wastaua na kamapim ol bekim i stret. Tasol olsem wanem, yumi save lukim ol skripsa ol i no raitim tok bilong ol long Wastaua, na tingim olsem wanem yumi ken bihainim ol dispela tok long laip bilong yumi? Taim yumi mekim Baibel ritim bilong wik, olsem wanem, sapos inap yumi save wok strong long mekim sampela wok painimaut na tingim tingim long bel ol samting ol dispela tok i skulim yumi long en? (Sng. 77:11, 12; Snd. 2:1-5) Yumi mas wok hat long kisim save long Tok Bilong God na tingim tingim long bel, dispela bai helpim tru yumi. (1 Ti. 4:15, 16) Dispela kain pasin bilong stadi gut bai strongim yumi na kirapim yumi long “mekim olgeta kain gutpela pasin.”—Ta. 2:14.