Pas i Kam Long Brens

Yes Ol Pablisa Bilong Kingdom:

Mipela i amamas long raitim dispela pas long yupela bilong stori long ol wok bilong Kingdom hia long Papua Niugini. Wankain olsem yia i go pinis, planti manmeri i bin kam long Memorial. Ol ripot mipela kisim pinis i kamapim olsem klostu 19,000 manmeri i bin kam long Memorial. Dispela i kamapim klia olsem i gat planti manmeri moa ol inap kam insait long tok i tru hia long hap bilong yumi.

Yupela bai amamas long save olsem ol i mekim pinis planti wok bilong skruim brens bilong yumi i go bikpela. Bilong stretim rot bilong sanapim ol nupela haus, ol i bin rausim sampela olpela haus mipela i bin yusim. Na tu, long ka pak bilong Haus Kingdom mipela i sanapim pinis wanpela haus i gat 12-pela rum slip long en. Sampela lain bilong Betel yet, husat i mas lusim ol dispela olpela haus, wantaim sampela lain konstraksen i kam long ol narapela kantri i slip long dispela haus. Haus Kingdom yet ol i stretim na dipatmen bilong tanim tok i stap long en. Long dispela rot ol bratasista bilong dispela dipatmen i ken mekim yet wok bilong ol. Na tu, ol i stretim sampela rum slip moa insait long hap we dipatmen bilong salim ol buk samting i stap long en.

Ol kontrakta i rausim pinis ol olpela haus na ol i wok long redim graun bilong sanapim nupela haus. Na tu, i gat ol kontrakta i wok long sanapim ol banis bilong holim gut graun, na dispela wok tu i wok long go het.

Ol narapela narapela lain wokman i kirap pinis long mekim wok. Ol elektrisen na plama i stretim pinis ol samting bilong redim hap we dispela nupela haus, em dipatmen bilong salim ol buk samting, dipatmen bilong stretim ol samting, na Haus Kingdom bai i stap long en.

Sapos yu laik volantia long mekim wok, orait tokim wasman siaman bilong kongrigesen bilong yu. Ol i ken bungim nem bilong yu wantaim nem bilong ol arapela bratasista i bin volantia. Dispela wok bai go inap tupela yia samting na sapos insait long dispela taim ol i laikim sampela helpim ol inap singautim yu.

Na tu, yumi wok long redim tingting bilong yumi long mekim dispela spesel wok bilong singautim ol man long kam long “De Bilong Kisim Bek Yumi i Klostu!” Kibung Distrik. Ol dispela kibung bai kamap klostu long pinis bilong yia. Bai yumi amamas long lukim hamas manmeri bai kam long dispela kibung, em yumi bin singautim ol taim yumi mekim dispela spesel wok. Olsem wanem? Yu wok long stretim ol samting na bai yu inap i stap na kisim dispela gutpela kaikai bilong spirit? Mipela i save Jehova bai mekim gut long ol wok yu mekim na bai yu wantaim famili bilong yu i ken kam long olgeta 3-pela de bilong dispela kibung.​—⁠Snd. 16:⁠3.

Mipela ol brata bilong yupela,

P.N.G. Brens Ofis

This article is unique to PNG.