Pasin Laikim—Bikpela Samting Long Wok Autim Tok
1 “Yupela olgeta kam long mi na bai mi givim malolo long yupela.” (Mt. 11:28) Dispela gutpela tok bilong Jisas i kamapim klia pasin bilong Jisas long laikim tru ol manmeri. Yumi ol Kristen, yumi laik bihainim pasin bilong Jisas long soim pasin laikim long ol manmeri husat i stap long dispela graun i no gat pasin laikim, na dispela i daunim ol tru. Olsem wanem yumi ken mekim olsem taim yumi autim tok?
2 Long Ol Tok Yumi Mekim: Pasin laikim i kirapim Jisas long autim gutnius long olgeta taim rot i op. (Jo. 4:7-14) Pasin laikim bai helpim yumi long daunim pasin bilong tingting planti long autim tok long kain kain taim na ples. Wanpela liklik meri i gat 6-pela krismas i autim tok long wanpela meri i sindaun klostu long em long rum bilong wetim dokta. Wanem samting i kirapim em long mekim olsem? Em i tok: “Mi lukim dispela meri na mi ting em i mas kisim save long Jehova.”
3 Yumi inap soim olsem yumi tingim ol man taim yumi smail long ol na toktok long ol long gutpela pasin. Taim yumi putim gut yau long tok bilong ol narapela, na yumi luksave long ol samting ol i tingting planti long en, na soim olsem yumi tingim ol tru, dispela bai kamapim klia pasin laikim bilong yumi. (Snd. 15:23) Olsem Jisas, yumi mas kamapim gutpela tok bilong Kingdom na pasin sori bilong Jehova long ol man.—Mt. 24:14; Lu. 4:18.
4 Long Pasin Yumi Mekim: Jisas i tingim ol samting ol narapela i sot long en, na em i mekim ol samting bilong helpim ol. (Mt. 15:32) Yumi tu inap soim gutpela-pasin-sori long ol narapela taim yumi autim tok. Wanpela sista i lukim olsem wanpela meri i hatwok long kliagut long tok em i harim long telefon. Sista i tokim dispela meri olsem em i laik helpim em na tanim tok man i mekim long telefon. Dispela gutpela pasin bilong sista i opim rot long em i ken toktok wantaim dispela meri long Baibel, na dispela meri i orait long stadi long Baibel. Wanpela brata i go bek lukim wanpela man, na brata i lukim dispela man i les, long wanem, em i laik kisim wanpela longpela sia i go insait long haus na sia i pas long dua. Brata i helpim dispela man, na bihain tupela i sindaun long dispela sia na brata i kirapim Baibel stadi wantaim dispela man i pilim tru gutpela pasin bilong brata.
5 Taim yumi autim tok, yumi soim olsem yumi laikim tru God na ol man. (Mt. 22:36-40) Taim yumi kamapim pasin laikim long toktok na pasin bilong yumi, dispela bai helpim ol man i gat gutpela bel long luksave olsem yumi holim tok i tru.