Mekim Gutpela Wok Long Ol Buk na Nius Bilong Yumi
1 Planti milion manmeri long olgeta hap i laikim tru ol buk na nius bilong Baibel em lain “wokboi i gat gutpela tingting” i save kamapim. (Mt. 24:45) Long olgeta yia, ol i save wokim planti buk na nius bilong helpim ol man i gat gutpela bel na “bai ol i ken save long as bilong tok tru.” (1 Ti. 2:4) Olsem wanem yumi ken mekim gutpela wok long ol buk na nius bilong yumi?
2 Kisim Inap Long Skel: Sapos yumi wok long kisim planti buk na nius, ating bai yumi no inap tilim olgeta. Yumi inap mekim wanem na bai yumi no kisim planti buk na nius na larim ol i stap nating? Yumi mas bihainim savepasin taim yumi kisim ol buk na nius bilong mekim wok long ol long taim bilong autim tok. Yumi no ken kisim planti buk bilong tilim, i gutpela yumi kisim wanpela o tupela tasol na taim yumi tilim pinis orait yumi ken kisim sampela moa. Long dispela rot yumi no inap larim ol buk o nius i hip i stap nating long haus. Na i wankain tu long ol magasin, sapos yumi gat planti i stap long haus em yumi no bin tilim, orait i gutpela yumi daunim namba bilong oda bilong yumi.
3 Ol Spesel Rikwes Aitem: Kongrigesen i no ken holim i stap ol spesel rikwes aitem bilong wanpela brata o sista i laik kisim bihain. Yumi mas tingting gut taim yumi putim oda bilong ol buk samting we ol i bin tromoi bikpela mani bilong wokim, olsem ol deluxe Baibel, Reference Bible, Concordance, Index, buk Insight, na buk Proclaimers. Yumi mas tingim dispela samting tu taim yumi putim oda long kisim ol samting olsem ol vidio, CD-ROM, DVD, na kaset. Yumi mas putim oda bilong ol samting em yumi mas i gat na em tasol; ating long sampela buk o vidio samting i gutpela long kisim wanpela tasol bilong famili.
4 Planti Tumas Buk na Nius: Sapos wasman autim tok na litresa kodineta i kisim save olsem kongrigesen i gat planti tumas buk samting, orait ol i mas toksave long kongrigesen long dispela samting. Dispela bai opim rot long ol bratasista i ken kisim bilong putim long laibreri bilong ol yet o ol i ken givim long ol man i save amamas long harim tok. Litresa kodineta i ken sekim narapela kongrigesen i stap klostu sapos ol i laik kisim sampela buk na nius samting. Na tu, wasman sekit inap helpim long tilim ol buk na nius long ol narapela kongrigesen o grup i stap long sekit bilong em.
5 Yumi laik bai ol buk na nius bilong yumi i inapim wok bilong ol, em long helpim ol man i gat gutpela bel long kisim save long ol gutpela samting Jehova bai kamapim. Taim Jisas i wokim mirakel na givim kaikai long ol man, em i no bin larim hap kaikai i stap nating. Olsem tasol yumi tu i mas mekim gutpela wok long ol buk samting bilong Baibel em yumi kisim. (Jo. 6:11-13) Ol buk na nius bilong yumi i gat tok em inap helpim man long kisim laip. Tasol ol dispela tok i no inap helpim ol man sapos yumi larim ol i stap tasol long haus o long bek bilong yumi. Olsem na yumi mas bihainim savepasin taim yumi kisim ol buk na nius bilong tilim na mekim gutpela wok long en bilong helpim ol narapela.—Fl. 4:5.
[Askim Bilong Stadi]
1. Planti manmeri i gat wanem tingting long ol buk na nius bilong yumi? Dispela i kamapim wanem askim?
2. Yumi inap mekim wanem na bai yumi no kisim planti buk na nius na larim ol i stap nating?
3. Yumi mas tingim wanem samting taim yumi laik putim oda bilong ol spesel rikwes aitem?
4. Sapos wanpela kongrigesen i gat planti buk na nius samting, orait ol i ken mekim wanem?
5. Olsem wanem yumi ken soim olsem yumi tingim tru ol buk na nius bilong yumi?
This is a repeat of article in km 12/05 taken from km-E 12/05 “Use Our Literature Wisely.” Also repeated in km 5/06.