Yu Save Helpim Wok Bilong Kamapim Ripot i Stret?
Planti stori bilong Baibel i kolim stret ol namba, na dispela i helpim yumi long save gut long ol samting i bin kamap. Olsem: Gideon na 300 man tasol i bin winim pait na daunim kem bilong ol Midian. (Het. 7:7) Ensel bilong Jehova i bin kilim i dai 185,000 soldia bilong Asiria. (2 Kin. 19:35) Long Pentikos 33 C.E., inap 3,000 ol i kisim baptais, na bihain liklik namba bilong ol bilipman i go bikpela inap 5,000 samting. (Apo. 2:41; 4:4) Ol dispela stori i kamapim klia olsem ol wokboi bilong God long bipo ol i bin wok strong long bungim na raitim stret stori bilong olgeta samting i bin kamap.
Long nau, oganaisesen bilong Jehova i tokim yumi long putim ripot bilong wok autim tok long olgeta mun. Taim yumi bihainim gut dispela tok, dispela bai helpim ol brata long lukautim gut wok bilong autim tok. Ol ripot inap kamapim klia olsem yumi mas mekim gut moa wanpela hap wok bilong autim tok, o wanpela hap i nidim sampela man moa bilong autim tok. Na long kongrigesen, ripot bilong wok autim tok i helpim ol elda long luksave long ol pablisa husat inap mekim bikpela wok moa bilong autim tok na husat i mas kisim helpim. Na ol ripot i stori long wok autim tok i go bikpela i save strongim olgeta Kristen. Yu save helpim wok bilong kamapim ripot i stret?
Em Wok Bilong Yu: Ating long pinis bilong mun yu hatwok long tingim gen ol wok samting yu bin mekim long autim tok long dispela mun. Sapos olsem, long olgeta taim yu autim tok, yu mas raitim ol samting yu bin mekim. Sampela i save raitim long kalenda o notbuk samting. Na sampela i save kisim ripot pepa i go wantaim ol long autim tok. Long pinis bilong mun, givim kwik ripot bilong yu long wasman bilong grup bilong yu. O sapos yu laik, yu ken putim ripot bilong yu long bokis bilong putim ripot long Haus Kingdom. Sapos yu lusim tingting long givim ripot, kwiktaim toksave long wasman bilong grup, no ken wet long em i kam askim yu long ripot. Taim yu tingim gut wok bilong raitim ripot long wok autim yu bin mekim, yu soim olsem yu rispektim rot em Jehova i bin putim, na yu tingim gut ol brata i gat wok long bungim na raitim ol ripot.—Luk 16:10.
Wok Bilong Wasman Bilong Grup: Olsem wasman bilong ol sipsip i save tingim gut ol sipsip, wasman bilong grup i save tingim tru wok em grup bilong em i mekim long mun olgeta. (Snd. 27:23) Em i save ol wan wan pablisa i givim bel long autim tok long olgeta mun na ol i amamas long mekim o nogat, na kwiktaim em i laik helpim ol sapos wanpela i no bin autim tok inap wanpela mun. Ating em bai mekim tok bilong strongim pablisa, o tokim em long wanpela pasin em inap bihainim bilong mekim wok, o singautim pablisa long autim tok wantaim em. Dispela pasin inap kirapim pablisa long insait gen long wok autim tok.
Long pinis bilong mun, wasman bilong grup i save skelim olsem olgeta long grup i mekim wok bilong ol long putim ripot bilong wok autim tok na bai kuskus inap bungim olgeta ripot bilong kongrigesen na salim ripot i stret long brens-ofis paslain long de namba 20 bilong nupela mun. Sapos sampela i lusim tingting long putim ripot bilong autim tok, em i ken mekim gutpela tok bilong kirapim na strongim ol.
Taim yumi putim kwik ripot bilong wok autim tok, yumi helpim wok bilong kamapim ripot i stret we i soim klia ol wok yumi bin mekim. Olsem wanem? Bai yu mekim wok bilong yu long putim kwik ripot long olgeta mun?
This is a repeat of article in km 12/02 taken from km-E 12/02 “Do you Contribute to an Accurate Report?”