Yu Mas Redi Long Autim Tok Bilong Kingdom Taim Rot i Op!

1. Yumi kisim wanem skul long eksampel bilong Devit?

¹ King Devit em wanpela man husat i no bin larim ol hevi bilong em i daunim em. Olsem: Devit i laik wokim wanpela haus bilong Jehova. Taim God i pasim em long mekim dispela wok, Devit i stretim tingting bilong em na em i wok strong long bungim mani samting bilong helpim Solomon long wokim tempel. (1 Kin. 8:17-19; 1 Sto. 29:3-9) Tasol Devit i no wok long tingim tingim samting em i no inap mekim, nogat, em i putim tingting i go long ol samting em inap mekim. Olsem wanem yumi inap bihainim pasin bilong Devit taim yumi wok long painim ol rot bilong autim tok bilong Kingdom?

2. Sapos yu laik mekim bikpela wok moa yu mas mekim wanem long sindaun bilong yu yet?

² Mekim Samting Yu Inap Mekim: Planti bratasista i mekim sampela senis long sindaun bilong ol na holim liklik samting tasol bambai ol inap mekim wok painia haptaim o painia oltaim. (Mat. 6:22) Yu ting yu inap mekim olsem? Taim yu beten na skelim gut sindaun bilong yu, ating bai yu lukim olsem “bikpela dua” i op long yu inap mekim sampela wok moa. Sapos olsem, orait kirap mekim taim rot i op!—1 Kor. 16:8, 9.

3. Wanem ol rot i op long yumi inap autim tok maski sindaun bilong yumi i mekim na yumi no inap mekim wok painia?

³ Tasol olsem wanem sapos i gat sampela samting long sindaun bilong yu i mekim na yu no inap mekim wok painia? Maski i olsem, i gat ol narapela rot we yu inap mekim wok autim tok. Olsem: Long ples wok yu save wok wantaim ol manmeri i no bilip, olsem na yu ting yu inap painim rot long autim tok long ol? O sapos yu gat sik, yu ting yu inap painim rot long autim tok long ol wokman bilong haus sik? Tingim, i gat rot bilong helpim ol pablisa husat i no inap mekim bikpela wok moa, long wanem, ol i lapun tru o ol i gat bikpela sik na ol i no inap lusim haus. Kain pablisa olsem ol inap putim 15 minit o 45 minit samting long ripot bilong autim tok. Taim yu raitim ripot bilong autim tok long mun, no ken lusim tingting long raitim tu ol minit o aua yu lusim bilong autim tok long kain kain taim na ples, na tu, ol magasin, ol liklik nius, na ol invatesen pepa bilong Memorial na kibung. Sapos yu save autim tok long olgeta taim rot i op, bai yu lukim olsem i gat planti rot moa i op bilong autim tok!

4. Yu tingting strong long mekim wanem?

⁴ Maski sindaun bilong yumi i olsem wanem, yumi olgeta i tingting strong long painim rot long autim gutnius long olgeta taim rot i op. Long dispela rot, bai yumi amamas long yumi bin mekim olgeta samting bilong mekim wok bilong Kingdom.—Mak 14:8; Luk 21:2-4.