Bris Pon du Ga Em i Sanap Strong Inap Planti Yia
WANPELA buk (The New Encyclopædia Britannica) i tok: ‘Maski strongpela gavman bilong Rom i no stap moa, ol bris ston i gat baret ol i wokim bilong karim wara ol i stap yet, na i kirapim tingting bilong ol man bilong wokim ol kain samting olsem.’ Wanpela bilong ol kain bris ston i gat baret bilong karim wara i stap long Frans.
Ol lain Rom i wokim ol dispela baret bilong kisim wara i go kamap long ol biktaun. Ol dispela taun i gat ol ples waswas samting em olgeta man i ken go long en, na long sampela bikpela taun i gat ol baret ston bilong karim i go ol pekpek samting. Long dispela taim ol lain bilong Rom i mekim wok long planti wara tru.
Dispela rot bilong wara yu lukim long antap, ol i kolim Pon du Ga, em i olsem wanpela bris i brukim wara Ga, na em i antap inap 49 mita. Ol lain Rom i wokim bilong karim wara. Nau longpela bilong en i olsem 275 mita, tasol taim ol i bin wokim dispela rot bilong wara, longpela bilong en i olsem 48 kilomita. Em i save karim wara i go long taun Nîmes em ol lain Rom i stap long en. Em i no bagarap hariap olsem ol narapela samting em ol lain Rom i bin wokim long wankain taim. Dispela samting i makim olsem ol saveman bilong lain Rom i save tingim gut na mekim gut wok bilong ol. Ol i makim na katim ol bikpela ston long ples bilong katim ston long ples Vers, na sampela i hevi nogut tru inap 5.5 ton. Na taim ol i wokim baret wara, ol i no pasim ol dispela long simen samting.
Taim ol i wokim ol dispela rot bilong wara, ol i mas wokim wankain olsem piksa yu lukim long antap. Tasol dispela bris Pon du Ga i mas brukim wanpela wara. Olsem na taim ol i wokim, em i no brukim stret wara—em i mas baut liklik, long wanem, nogut wara i tait na bris i bruk.
Maski planti man em ol i bin lukim dispela bris ol i no ting olsem em i bikpela samting, tasol ol i bin stretim na senisim sampela hap bilong en bilong strongim. Ol i wokim wanpela rot bilong ol hos long antap. Long 1750 samting ol i wokim namba wan plua bilong en i op moa. Na 100 yia bihain Empera Napolion Namba 3, em i no laik bai bris i bagarap, olsem na em i mekim sampela wok bilong stretim na dispela bris inap i stap longtaim.
Winim 2 milion man i save go lukim dispela bris long olgeta wan wan yia, tasol dispela samting i wok long bagarapim Pon du Ga, olsem na ol i mekim ol samting na bai em i no ken bagarap. Dispela samting i ken lainim yumi olsem: Sapos yumi skelim na wokim gut wanpela samting, em i no ken bagarap hariap.