Mekim Wok Long Han Kais—Em Gutpela o Nogut?

SAPOS yu save mekim wok long han kais bilong yu na ol narapela man i save mekim wok long han sut, yu save bel hevi long dispela samting? Yumi no save gut long hamas man i gat pasin bilong mekim wok long han kais, tasol sapos yumi skelim wantaim ol man i save mekim wok long han sut, yumi save ol i no planti.

Wanpela man (Michael Barsley) i bin skelim gut dispela samting na em i tok olsem long buk bilong em: ‘Long olgeta hap bilong graun ol i no save gut long hamas man em ol i save mekim wok long han kais. Olsem na ating yumi ken ting, long olgeta wan handet wan handet man, i gat 4-pela o 5-pela man tasol i save mekim wok long han kais.’​—Buk Left-Handed People.

Wanpela buk (Grolier’s Encyclopedia International) i tok, long olgeta wan handet wan handet man long olgeta hap graun, i gat olsem 6-pela 6-pela i save mekim wok long han kais. Sapos dispela namba i stret, i olsem 300 milion man i save mekim wok long han kais. Olsem na sapos yu save mekim wok long han kais, yu gat planti poroman liklik.

Ating sampela man i save mekim wok long han kais ol i tingting planti long wanem, planti samting yumi wok long en long haus, olsem optin o masin samting, em bilong man i save mekim wok long han sut bilong em, em i no bilong man i save mekim wok long han kais. Olsem: Long planti haus ol man i putim tep bilong kolwara long han sut, ol i no putim long han kais, long wanem, planti man i save mekim wok long kolwara, na liklik wok long hatwara. Na planti taim ol baten bilong televisen samting i stap long han sut, olsem na kaisman i hatwok taim em i laik opim televisen, long wanem, em i mas putim han kais bilong em i go long hap bilong han sut bilong em.

Wanem As na Man i Mekim Wok Long Han Kais?

Bilong wanem sampela i save mekim wok long han kais bilong ol? I gat kain kain tingting long dispela. Sampela man i skelim dispela samting ol i tok, pikinini i kisim dispela pasin long papa o mama. Na ol i ting taim pikinini i liklik yet, sampela samting long sindaun bilong em i mekim na em i lain long mekim wok long han sut o long han kais.

Inap planti yia nau kain kain tingting i bin kamap long dispela samting. Long yia 1800 samting wanpela dokta bilong katim ol man, em man bilong Frans (Paul Broca), em i bin tingting olsem: Ol man i save mekim wok long han kais bilong ol, em han sut bilong kru i bosim dispela, na ol man i mekim wok long han sut bilong ol, em han kais bilong kru i bosim dispela.

Na sampela man moa i kamapim tingting olsem: Ol man i save mekim wok long han kais, klok bilong ol i save stap long han sut bilong skin. Tasol ol dokta i save katim ol man i dai pinis na painim as bilong sik bilong ol, ol i kisim save olsem, tingting bilong ol dispela man i no stret.

Kirap long yia 1800 samting ol saveman i skelim kru bilong man, ol i tok, kru i gat tupela hap. Na ol i tok, long planti man, han kais bilong kru i save bosim tingting na pasin bilong skelim ol samting, na toktok bilong man, na wok em i mekim bilong kaunim ol namba samting. Tasol han sut bilong kru i bosim ol samting bilong musik, singsing, danis, o ol samting olsem wokim piksa samting. Tasol ol man i mekim wok long han kais, kru bilong ol i no bihainim wankain pasin tasol long bosim tingting, na pasin, na laikim singsing, na danis samting.

Sampela i Tok, Mekim Wok Long Han Kais i Nogut

Long planti kantri nau ol man i no gat tok sapos man i mekim wok long han kais bilong em. Wan wan man tasol bai tok bilas long kaisman. Tasol bipo i no olsem. Sampela kantri i bin birua long man i mekim wok long han kais. Sampela skul i bin tambuim pikinini long rait long han kais. Na bipo sampela papamama na tisa bilong skul i bin pasim han kais bilong pikinini long baksait bilong em na ol i subim em long rait long han sut.

Bipo ol man i ting sapos wanpela man i mekim wanpela samting i narapela kain long samting ol narapela man i mekim, em i no stret, na ol bilip giaman i bin helpim dispela tingting. Na bipo sampela i bin tok Satan i mekim wok long han kais bilong em, na God i mekim wok long han sut bilong em. Sapos yu lukim sampela piksa bilong Satan em ol man i bin wokim planti handet yia bipo, bai yu lukim Satan i holim samting long han kais bilong em o em i mekim wok long han kais. Na sampela man i tok ol man i mekim wok marila samting ol i wok long han kais.

Tasol ol dispela kain bilip giaman bilong ol tumbuna i no stap long Baibel. Long taim bilong Baibel, maski man i mekim wok long han kais bilong em o long han sut bilong em, em i save mekim wok bilong God. Yumi ken tingim Hetman Ehut. Ol Israel i krai long God i helpim ol, long wanem, King Eklon bilong Moap i kam na daunim ol. Jehova i makim kaisman Ehut long kilim i dai patpela King Eklon. Bainat bilong Ehut i stap hait long han sut bilong skin bilong em, olsem na king i no save. Em nau, han kais i bin helpim Ehut long mekim wok God i makim em bilong mekim.​—Hetman 3:​15, 21.

Wanpela lain bilong ol Israel, em lain bilong Benjamin, ol i gat 7 handet kaisman i save tumas long tromoi ston long katapel, olsem gumi. (Hetman 20:16) Bihain, long ami bilong King Devit i gat ol strongpela soldia i helpim em long pait, na ol i save mekim wok long han kais bilong ol na long han sut bilong ol tu. (1 Stori 12:2) Olsem na man i kranki sapos em i gat tok long wanpela man i mekim wok long han kais bilong em.

Yu No Ken Ting Yu Narapela Kain

Yumi ken tingim sampela gutpela wok ol kaisman i save mekim long nau. Planti i bin kisim nem long ol spot olsem kikbal samting. Planti man bilong pilai beisbal ol i kaisman. Wanpela man bilong Amerika (Babe Ruth) i gat nem long pilai beisbal, na em i wanpela man i save mekim wok long han kais bilong em.

Na long pilai kriket tu, planti man i gat nem long dispela pilai, ol i man bilong mekim wok long han kais, maski ol i holim bet long han kais, o ol i tromoi bal long han kais. Wanpela taim ol Wes Indis i go pilai kriket long Inglan na long tim bilong ol, klostu olgeta i kaisman. Na long dispela taim wanpela hapman stret bilong pilai kriket, em bilong Wes Indis (Sir Gary Sobers) em i save holim bet long han kais, na em i save tromoi bal long han kais tu.

Wanpela pilai ol i mekim long taim bilong spot Olimpik na ol man i laikim tumas, em pasin bilong pilai long bainat. Long spot Olimpik bilong yia 1980, ol man i mekim pilai long bainat ol i winim planti medal gol. Long olgeta 4-pela 4-pela i mekim pilai long han kais, 3-pela i bin winim medal gol.

Na sampela man bilong mekim yumi i lap na amamas ol i kaisman. Wanpela man bilong piksa wokabaut, nem bilong em Sals Saplin (Charles Chaplin), em i man bilong mekim pani, na wanpela taim long piksa wokabaut em i bin pilaim vaiolin long han kais. Narapela man bilong mekim pani long piksa wokabaut em Dani Ke, (Danny Kaye) na em tu i kaisman.

Planti man bilong wokim piksa ol i save long wanpela man nem bilong em Leonardo da Vinsi. Dispela man i save tru long malenim ol piksa. Em i gat nem long mekim dispela wok. Taim mama i karim em, ol i no save em kaisman o nogat, tasol taim em i go bikpela ol man i save tru em i bin rait long han kais na wokim ol piksa bilong em long han kais. Na wan wan taim em i mekim wok long han sut. Olsem na dispela saveman bilong wokim ol piksa em inap wok gut long tupela han bilong em.

Narapela Kain Rait

Wanpela man bilong raitim buk (Dr. Macdonald Critchley) i tok: ‘I gat wanpela kain rait sampela kaisman i save mekim, olsem: Ol i no kirap long han kais na rait i go i go long han sut, nogat. Ol i kirap long han sut na rait i go i go long han kais. Na ol leta ol i save tanim, olsem: Ol i raitim p olsem q na b olsem d, na yu no inap kaunim dispela rait. Tasol, taim yu holim dispela rait klostu long glas, orait yu ken lukluk long glas na nau yu inap kaunim.’​—Buk Mirror Writing.

Dispela narapela kain rait i gutpela sapos man i holim pen long han kais. Olsem na ol man i save rait olsem, klostu olgeta i kaisman tasol. Bipo wanpela soldia i bin kisim bagarap long pait na han sut bilong em i lus. Olsem na taim em i kirap lain long rait long han kais, em i kirap na mekim dispela narapela kain rait, olsem yumi mas holim klostu long glas na bai yumi inap kaunim. Sampela pikinini, taim ol i nupela long lain long rait, ol i mekim olsem long wan wan leta. Taim ol i laik raitim leta b ol i senisim na raitim leta d, o taim ol i raitim leta p ol i senis na raitim leta q.

Man i save tru long rait olsem, em kaisman Luis Karol. Em man bilong raitim ol buk, na wanpela buk em i raitim na planti pikinini i save laikim, em buk Alice in Wonderland.

Rait Long Han Kais Em Gutpela o Nogut?

Olsem na sapos yu wanpela man i mekim wok long han kais, yu ken amamas, long wanem, nau ol man i no tingim tumas dispela samting olsem bipo ol i bin tingim. Na long nau, planti samting yumi mekim wok long en long haus, olsem sisis, optin, sampela tul, ol kampani i bin wokim bilong man i mekim wok long han kais, em i ken wok gut long en. Na tu, i gat narapela kain pen bilong rait, olsem na sapos man i save rait long han kais, dispela pen i helpim em na em i no hatwok tumas long rait.

Olsem na sapos yu wanpela man i mekim wok long han kais, i no samting bilong sem long en. Ating sampela samting yu mekim long han kais bilong yu i winim man i mekim wok long han sut bilong em.

Olsem na yu ting olsem wanem long dispela samting? Yu ting pasin bilong rait o mekim wok long han kais i wanpela gutpela samting o em i samting nogut? Ating sampela i no ting em i gutpela samting, tasol i no olsem samting nogut. Sampela taim i gutpela sapos man inap mekim wok long han kais, winim man i mekim wok long han sut.