Pas Bilong Ol Man

“Awake!” i Go Long Yunivesiti Mi wanpela tisa bilong tok Inglis, olsem profesa, na long wok bilong mi long skul mi save mekim wok long nius Kirap! taim mi lainim ol sumatin bilong raitim ol stori. Inap 7-pela yia pinis mi bin mekim wok long dispela nius . . . Ol stori long Kirap! i kamapim gut save, na tu, mi amamas taim mi kaunim. Na toktok na ol rait bilong dispela nius i stret olgeta. Taim mi skulim ol yangpela, mi kamapim pasin bilong dispela nius long putim ol koma, na fulstop, na pasin bilong raitim stori tu.

J. D. G., long Amerika

Papamama i No Orait Long Bilip Bilong Mi Tenkyu tru long stori i bin kamap long “Ol Yangpela i Laik Save . . . Olsem Wanem Sapos Papamama i No Orait Long Bilip Bilong Mi?” (Septemba 8, 1992) Papamama i no helpim na strongim mi long mekim laik bilong God, olsem na mi hatwok na sampela taim mi bel hevi. Stori yupela i bin kamapim i bin helpim mi long save, mi gat ol “famili” olsem papamama samting insait long kongrigesen Kristen bilong strongim mi.

S. H., long Amerika

Poroman marit bilong mi i no wanpela wanbilip, olsem na em i no helpim mi o strongim mi long ol samting bilong spirit. Tasol stori i bin kamap long Kirap! i bin helpim mi long save, taim mi pes drai o tok pait wantaim poroman marit, dispela i mekim na sindaun bilong mi i no gutpela. Tenkyu tru long helpim mi long skelim sindaun bilong mi na nau mi ken askim ol narapela Kristen long kongrigesen long helpim mi.

K. V., long Amerika

Graun i Laik Kamap Ples Pipia? Wanpela wantok bilong mi i bin salim sabskripsen bilong nius Kirap! long mi olsem presen. Mi amamas tru long kaunim dispela nius, long wanem, em i kamapim kain kain gutpela stori. Mi kirap nogut tru taim mi kaunim dispela stori “Graun i Laik Kamap Ples Pipia?” (Me 8, 1991) long wanem, mi no bin ting dispela hevi i bikpela samting. Tasol nau mi save, em wanpela bikpela hevi tru! Mi no wanpela Witnes Bilong Jehova, tasol mi amamas long kaunim ol gutpela stori long ol nius bilong yupela.

L. R. A., long Brasil

No Inap Wokabaut Moa Tenkyu tru long dispela stori “Ol i Tokim Mi Bai Mi No Inap Wokabaut Moa!” (Februeri 8, 1991) Long 1980 mi kisim bikpela bagarap, olsem na kirap long dispela taim mi no inap wokabaut moa. Planti manmeri i no save gut long hevi bilong man i no inap wokabaut moa. Tasol dispela nius i bin stori gut long helpim ol narapela man long kisim stretpela tingting long ol dispela kain man, na helpim ol long save long ol i ken mekim wanem bilong helpim kain man olsem.

W. K., long Amerika

Papamama i Brukim Marit Stori yupela i bin kamapim long Kirap! “Ol Yangpela i Laik Save . . . Papamama i Brukim Marit​—Olsem Wanem Mi Ken Winim Dispela Hevi?” (Me 8, 1991) dispela stori i bin strongim bel bilong mi. Mi gat 16 krismas tasol na papamama i bin brukim marit. Sampela taim mi pilim bel hevi, tasol mi save Jehova em Pren tru bilong mi, na em i bin helpim mi long karim dispela bel hevi. Mi save i no gutpela sapos mi tingting planti tumas long dispela samting papamama i bin mekim. Mi gat planti gutpela pren insait long kongrigesen Kristen, na ol miting na wok Kristen i save helpim mi.

D. B. G., long Brasil

Lukautim Ol Lapun Mi save lukautim papa bilong mi. Papa i gat bikpela sik. Ol brata susa bilong mi i no save helpim mi long lukautim papa, na ol i save tok: ‘Yu gat strongpela skin. Yu inap lukautim em.’ O ol i tok olsem: ‘Em i gutpela sapos yu bin putim papa long haus bilong ol lapun, na ol i ken lukautim em.’ Taim mi harim ol dispela tok, mi pilim olsem mi mas tingim skin bilong mi tasol, na papa, nogat. Mi bin lukautim papa, olsem na mi no marit na karim pikinini. Olsem na nau mi kirap na mi bel hevi long dispela samting. Tasol taim mi kaunim ol stori “Yu Save Daun Long Ol Lapun?” (Novemba 8, 1991), dispela i mekim gut bel bilong mi, na em i strongim mi long wok yet long helpim papa.

S. B., long Amerika