“De Bilong Ol Witnes Bilong Jehova”

OL WITNES BILONG JEHOVA i amamas long mekim ol bikpela kibung sampela taim long olgeta yia. Ol i bung bilong kisim save long God na ol stretpela lo bilong em. Ol dispela miting i gutpela tu bilong ol i ken bung wantaim ol wanwok Kristen.​—Hibru 10:​24, 25.

Taim ol Witnes i mekim ol bikpela bung long wanpela taun, ol manmeri i ting olsem wanem long dispela? Tru, dispela i save helpim wok bisnis bilong ol. Tasol nambawan kaunsil bilong Gainsvil long Joja, Amerika i raitim wanpela bikpela toksave olsem: ‘Ol i stap olsem gutpela piksa long gutpela pasin ol i mekim na long pasin bilong ol long givim bel long lotu.’

Hap bilong dispela pepa bilong gavman i tok: ‘YES, ol Witnes Bilong Jehova i bin bung long Joja Maunten Senta, inap olsem 14-pela wik long olgeta yia inap 11-pela yia pinis. Olgeta taim samting olsem 2,200 manmeri i save bung, . . . dispela bikpela lain Witnes i soim mipela olgeta gutpela pasin bilong bilip na givim bel long lotu, na dispela i kirapim tingting bilong mipela:

‘OLSEM NA NAU, mi Emili D. Losan, nambawan kaunsil bilong Gainsvil i tokaut, na mi makim Sarere, Novemba 23, 1991 olsem DE BILONG OL WITNES BILONG JEHOVA long Gainsvil; mi kirapim olgeta manmeri long tingim ol Witnes na amamas long ol. Na yumi ken bihainim gutpela pasin bilong ol na pasin bilong ol long givim bel long lotu, nau long dispela Sarere Sande na long olgeta taim bihain.’