Spesim Pikinini—Bikpela Hevi Bilong Graun
‘Spesim pikinini inap helpim planti manmeri, winim ol samting ol saveman i wokim, na ol i no ken tromoi bikpela mani long dispela samting. Na sapos i no gat hevi long namba bilong ol man long graun i wok long i go bikpela, dispela tok i stret yet.’—Buk The State of the World’s Children 1992.
BIPO ol man i gat bikpela laik long kisim planti pikinini. Klostu 4,000 yia bipo, Rebeka i laik lusim Mesopotemia na marit long Aisak, na mama wantaim brata bilong em i tokim em: “Susa, bai yu kamap mama bilong planti tausen man.” (Stat 24:60) Tasol nau planti meri i tok ol i no laik karim planti pikinini.
Bu em i wanpela meri Indonesia i gat 22 krismas na em i gat wanpela pikinini. Em i tok: ‘Mi namba 3 long 7-pela pikinini. Papa i bin wok long Klaten, long Java, na em i gat liklik bisnis long wanpela kain dring em i bin wokim long diwai pam. Papamama i bin hatwok tru long painim mani bilong lukautim mipela ol pikinini. Em i no hatwok tumas sapos i no gat planti pikinini long famili.’
Bu i gat wankain tingting olsem planti papamama long olgeta hap. Nau planti marit i laik pasim tok long wanem taim ol bai kamapim pikinini, na hamas pikinini ol bai kamapim, na ol i no ken kamapim pikinini klostu klostu, na long wanem taim ol bai pinis long kamapim pikinini. Yunaitet Nesen i tok, nau long planti kantri i stap rabis, planti marit i laik mekim wok long sampela samting bilong pasim bel, na ol i save mekim olsem, long wanem, long 1963 samting long ol wan handet wan handet marit, 10-pela tasol i gat laik long pasim bel, tasol nau i gat 51 i laik mekim olsem.
Ol gavman tu i laik bai ol marit i bihainim famili-plening. Planti kantri i stap rabis i wok long bihainim rot bilong helpim ol manmeri long ol i no ken kamapim planti pikinini. Wanpela lain (UN Population Fund) i tok, long olgeta yia ol i save tromoi 4 bilion kina bilong helpim ol famili long ol i no ken kamapim planti pikinini. Ol i ting long planti pikinini moa bai kamap bihain, olsem na ol bikman i laik bai dispela mani i go antap inap 8 bilion kina samting long yia 2000.
Bilong wanem ol gavman na ol man i laik pasim pasin bilong kamapim planti pikinini? Na Kristen i ting olsem wanem long en? Tupela stori i kamap bihain long dispela bai bekim dispela ol askim.