Em i Mekim Gutpela Wok Maski Em Wanpela i Stap
LONG 1927 mama i karim mi long Spen. Mipela i Katolik na famili i rabis. Mi namba 6 bilong 7-pela pikinini. Long 1936 i go inap 1939 pait i bagarapim kantri Spen. Mipela i mas abrusim ol bom, na kaikai i sot, olsem na mipela i mas kisim kaikai long skel. Tasol mi pikinini bilong amamas na singsing na laik long stap wantaim ol narapela man.
Tasol mi pret long wanpela samting olsem kisim pen oltaim oltaim long bikpaia. Olsem na mi go wok long wanpela haus sister taim mi gat 12-pela krismas. Klostu 3-pela yia mi stap long dispela haus na klinim lata ston, na beten, i go i go. Tasol mi pilim olsem mi lus long wanpela samting. Long 1941 mi lusim dispela haus sister.
Sampela yia bihain mi prenim wanpela meri bilong singsing na em i ting mi inap singsing na kisim mani long dispela rot. Em i strongim mi long lain long singsing na pilaim piano. Taim Namba 2 Pait i pinis long 1945 mi bin go long Moroko na singsing long sampela nait-klap long Kasablanka na Tanjia. Long yangpela meri dispela samting i samting bilong amamas. Tasol taim mi pinis long singsing mi save go stret long haus lotu na askim Mama Vergio long lusim tingting long samting mi bin mekim. Mi mekim olsem, long wanem, mi no laik go long bikpaia.
Mi wok 9-pela yia pinis long ol nait-klap na nau mi bungim Jack Abernathy bilong Amerika. Em i wok long wanpela kampani bilong Amerika long Moroko. Mipela marit long dispela yia na mi lusim wok long singsing. Bihain liklik mipela go sindaun long Sevil, long Spen inap long 1960. Bihain mipela go sindaun long Lodi, long Kalifonia. Nau narapela samting i kamap long sindaun bilong mi.
Mi Kisim Save Long Jehova
Long 1961 tupela Witnes Bilong Jehova i kam long haus bilong mipela na lusim nius Wastaua na Kirap! Bihain ol i tok ol i laik stadi Baibel wantaim mi na mi amamas long mekim olsem. Mi lain olsem trupela God, Jehova, em gutpela Papa bilong yumi long heven. (Song 83:18) Na mi amamas long lain olsem i no gat bikpaia na yumi inap stap laip oltaim long paradais long graun!—Song 37:9-11, 29; KTH 21:3, 4.
Brata bilong mi Paquita, em tu i kirap na stadi. Bipo mi meri bilong smok, na go long ol pati, na mi meri bilong belhat. Tasol mi senisim ol dispela pasin bilong mi na long Oktoba 17, 1962, mitupela Paquita i bin baptais long Sakramento, long Kalifonia, bilong makim dediket bilong mitupela long mekim laik bilong Jehova.
Go Long Spen na Bihain Long Tailan
Liklik taim bihain kampani i salim man bilong mi long Tailan, na bihain mi tu mi go. Pastaim mi go long Spen na autim bilip bilong mi long famili bilong mi. Tambu bilong mi Pura, i harim tok na kamap wanpela Witnes.
Long dispela taim gavman i tambuim wok bilong ol Witnes long Spen. Tasol mipela 20 manmeri inap hait na bung long wanpela liklik rum i gat tebol tasol, nogat sia. Olaman! Em narapela kain miting long ol miting long Kalifonia; mipela olgeta i mas sanap! Na pasin bilong ol wanples bilong mi long bung, maski gavman i tambuim ol, i strongim mi long save ol miting Kristen i bikpela samting. Na dispela i strongim mi long karim hevi bai painim mi long Bangkok.
Taim mipela kamap long Bangkok, Jack i tokim mi: ‘Sapos mi kisim save olsem yu raun na autim lotu bilong yu, bai mi lusim yu.’ Long moningtaim em i lusim haus na go wok long bus. Olsem na mi stap wanpis long biktaun Bangkok wantaim wokmeri bilong mi, na mitupela i no inap toktok, long wanem, mi no save long tok ples bilong em. Mi kirap na mekim save stadi long ol buk bilong Baibel.
Wanpela de long Septemba 1963 mi kam bek long haus na mi lukim su bilong narapela klostu long dua. Wanpela meri i wetim mi. Mi bin tok: ‘Mi inap helpim yu?’
Em i tok: ‘Mi bilong lain Sosaiti Was Taua.’
Mi amamas tru. Mi holim em na kis long em. Em wanpela misineri i kam long Kanada na nem bilong em, Eva Hiebert. Eva i mas kalap long tupela o tripela bas bilong kam lukim mi olgeta taim. Mi pret long raun long bas, long wanem, ol man i pas pas, tasol i no gat narapela rot long raun. Eva i tokim mi: ‘Yu no inap mekim wok bilong Jehova sapos yu no raun long bas.’ Olsem na em i lainim mi long kalap long bas bilong go long ol miting.
Mi pret liklik long autim lotu bilong mi, long wanem, mi no save long tok ples bilong dispela hap. Mi save holim han o basket o klos bilong Eva, na taim mi mekim olsem Eva i tokim mi: ‘Yu no inap mekim olsem bilong mekim wok bilong Jehova.’
Mi bel hevi liklik na tok: ‘Tasol mi no save long tok ples.’
Eva i putim 10-pela nius long han bilong mi na lusim mi long maket. Isi isi mi kamap long wanpela meri Saina na soim ol nius long em, na em i kisim!
Bihain mi amamas tru long tokim Eva: ‘Mi tilim pinis olgeta nius.’ Eva i tok: ‘Jehova i amamas long kain meri olsem yu. Mekim yet dispela wok; no ken lusim.’ Na mi mekim olsem. Mi lain long tok gude long tok Tai na bihainim pasin bilong ol long sindaun long plua. Na tu, mi lain long raun long kain kain ples. Na man bilong mi i ting olsem wanem long ol samting mi mekim? Nau em i orait liklik long lotu bilong mi. Wanpela taim sampela man i kam stap wantaim mipela na Jack i tokim ol: ‘Raun wantaim Pepita. Em i save raun long ol ples, long wanem, em i save autim lotu bilong em.’
Mi Kamap Long Ostrelia
Long 1965 mipela go long nupela ples wok long not-wes Ostrelia, na ol samting Eva i bin mekim bilong helpim mi i bin strongim mi long stap gut long Jehova. Kampani bilong Jack i wokim ol rot bilong tren long ples wesan na mipela stap long wanpela kem bilong kampani. Balus i save karim kaikai i kam na ples i hat nogut tru—winim 43 digri Selsias. I gat 21 famili bilong Not Amerika long kem, na mi kirap autim tok bilong Kingdom long ol. Taim wok bilong ol rot bilong tren i go bikpela moa, mipela mas go insait tru long ples wesan.
Bipo mi bin salim pas long brens-ofis bilong ol Witnes Bilong Jehova long Ostrelia na ol i bekim pas na tok: ‘Mipela salim sori Kristen na gude long yu. Mipela tingim yu long beten bilong mipela taim yu raun long dispela hap.’ Kain pas olsem oganaisesen bilong Jehova i salim long mi, i bin strongim mi taim mi mas raun wantaim man bilong mi long sampela hap i no gat planti man. Taim mi pilim olsem mi stap wanpis, mi kirap na kaunim ol dispela pas, na ol i save strongim mi long autim tok maski mi no stap wantaim ol narapela Witnes.
Brens-ofis long Ostrelia i bin makim tupela marit Witnes long kam na stap wantaim mi wanpela wik. Taim mipela autim tok mipela i bungim wanpela meri i harim tok. Em i stap longwe long kem, tasol tupela taim long olgeta wik mi save go lukim em, maski mi mas wokabaut long ples ol snek na traipela palai i raun long en. Taim mi wokabaut mi mekim ol singsing bilong Kingdom, olsem: “Stap gut long Jehova long lain bilong em. Bai em i was long yu. Stap klostu long em.” Mitupela i bin stadi 11-pela mun.
Mitupela man bilong mi i go sindaun wanpela yia samting long Melbon, na bihain mipela go long wanpela kem klostu long taun Pot Hetlan i gat wanpela main long en. Mipela stap 5-pela de long kem na nau sampela Witnes i kam lukim mipela. Brens-ofis i bin toksave long ol olsem mipela stap long dispela hap. Taim ol i lusim mipela, mi yet mi mekim ol miting olsem Buk-Stadi, Skul Bilong Wok Autim Tok, Miting Bilong Wok Autim Tok, Stadi Wastaua. Mi yet mi mekim singsing na beten, na mi yet mi bekim olgeta askim na pinisim miting long singsing na beten. Mi no hatwok long kaunim hamas man i kam long miting—wanpela tasol—long wanem, mi tasol i stap. Tasol dispela pasin long mekim ol miting long olgeta wik i bin helpim mi long stap strong na mekim wok bilong Jehova taim mi wanpela i stap.
Go Long Bogenvil
Mipela stap 4-pela yia long ol ples hat long Ostrelia na long 1969 ol i laik bai man bilong mi i go mekim wok bos long ol rot bilong wanpela kopa-main long ol maunten long Ailan Bogenvil. Wanpela nait Jack i go opim dua na em i tok: ‘Wanpela famili Witnes i kam.’ Long olgeta wik mi save bung wantaim dispela famili long wanpela skul na mipela mekim Stadi Wastaua.
Narapela taim 3-pela Witnes bilong Papua Niugini i kam lukim mi. Man bilong mi i amamas long tokim ol wanwok bilong em olsem: ‘Maski meri bilong mi i go we, ol pren Witnes bilong em i kam.’
Go Long Afrika
Long 1972 mipela kamap long ples wesan bilong Aljiria long Not Afrika. Kampani bilong Jack i wokim ol samting bilong wara long dispela hap, na ol i tok dispela wok bai stap inap 4-pela yia. Mi salim pas long brens-ofis long Frans na askim ol long wok autim tok long dispela hap. Ol i bekim pas na tok: ‘Was gut. Gavman i tambuim wok bilong yumi long dispela hap.’ Sosaiti i helpim mi long painim tupela Witnes ol i no strong na mipela wokim liklik grup.
Wanpela meri long kem, nem bilong em Cecilia, em i gat sik. Long olgeta de mi go lukim em long haus sik na karim kaikai olsem sup i go long em, na stretim bet bilong em. Taim em i kam bek long haus mi wok yet long helpim em. Na mi kirap na autim tok bilong Kingdom long em tu. Mi kirap na stadi wantaim em na 8-pela mun bihain em i laik baptais. Tasol mi tingting planti—em i ken baptais we na husat inap baptaisim em?
Mipela kisim pas bilong brens-ofis long Frans na ol i tok wanpela Witnes, nem bilong em François, bai kam malolo sotpela taim long Aljiria. Sapos mipela inap hariap na kisim em i go long hap bilong mipela na kisim em i go bek long ples balus, em inap wokim baptais. Tasol em inap stap 24 aua tasol wantaim mipela.
Taim François i kamap, mipela i no lusim taim, kwiktaim mipela kisim em i go long ples wesan. Long apinun long haus bilong Cecilia em i rausim liklik pepa long poket bilong em na givim wanpela gutpela tok. Long moningtaim tru long Me 18, 1974, em i baptaisim Cecilia long ples waswas bilong mi na bihain em i go.
Long pinis bilong yia 1975 pait i kamap long Aljiria, olsem na mitupela Jack i mas hariap na lusim dispela ples. Mi go lukim ol wanblut bilong mi long Spen. Long 1976 mi wok long bungim ol kago bilong mipela, long wanem, Jack i kisim wok long bikbus bilong Surinam long Saut Amerika.
Mipela Stap Long Saut Amerika
Kem mipela i stap long en long hap bilong saut-wes long Surinam i stap namel long ol gutpela bus. Ol kalangar na ol monki i stap antap long ol diwai na ol i lukluk i kam daun long mipela 15 famili i kam i stap nau long dispela hap. Planti bilong ol dispela famili mi bin save long ol bipo long ol narapela kem. Sikspela mun bihain sampela famili moa i kam na wanpela em Cecilia—em dispela meri em i bin baptais long Aljiria—nau mi gat poroman!
Klostu long Mas 23, 1978 mipela bin tingting long olsem wanem mipela bai mekim Memorial bilong tingim indai bilong Krais. Mipela i no gat trenspot long go long biktaun Paramaribo, olsem na mipela ting long mekim Memorial long haus bilong mi. Bos bilong kem i larim mi i mekim wok long masin bilong kem bilong wokim sampela kopi bilong laspela pes bilong Wastaua i save singautim ol man long kam long Memorial. Mipela i tilim ol dispela pepa long olgeta haus long kem. I gat 21 man i kam! Cecilia i kamapim tok na mi bin kaunim ol skripsa. Long dispela apinun maski mipela stap longwe long ol narapela man, mipela pilim olsem mipela stap wanbel wantaim lain bilong Jehova long olgeta hap.
Nau brens-ofis bilong ol Witnes long Surinam i salim tupela yangpela marit misineri. Tupela i kam long wanpela olpela ka Land-Rova. Pastaim long tupela i kamap mi pilim olsem mi no mekim gutpela wok, tasol tupela misineri i tok: ‘Pepita, i gat gutpela as na yu stap long hia.’ Mi no ting olsem, tasol bihain mi save tok bilong tupela i stret.
Wanpela de taim tupela misineri i stap yet, mipela i bihainim wanpela nupela rot bilong bus. Mipela lusim kem na bihainim rot i go inap 50 kilomita samting. Mipela amamas tru long painim sampela liklik ples bilong ol Amerindian. Mipela i autim tok sampela de long ol na ol i amamas long harim tok bilong mipela na planti i kirap na stadi. Taim tupela misineri i lusim mipela, mitupela Cecilia i kirap na go lukim ol dispela man tupela taim long olgeta wik.
Mipela save kirap long 4 klok long moningtaim na long 7 klok mipela kirapim pinis namba wan Baibel-stadi. Mipela save kam bek long haus long 5 klok samting long apinun. Insait long 2-pela yia mitupela i bin mekim 30 Baibel-stadi long olgeta wik. I no longtaim tumas na ol pikinini i kolim mi Anti Baibel! Planti i kisim baptais, na sampela yia bihain wanpela kibung sekit i kamap long dispela hap na 182 i bin bung. Tru tumas, olsem tupela misineri i bin tok, i gat gutpela as na mipela bin stap long bikbus!
Mipela Go Long Papua Niugini
Long 1980 mipela lusim Surinam na long 1981 mipela kamap long Papua Niugini. Mi amamas long stap 6-pela mun wantaim ol Witnes long biktaun Pot Mosbi, na bihain wanpela helikopta i kisim mi i go long nupela ples sindaun—wanpela kem antap long ol maunten. Kampani bilong Jack i wok long kamapim wanpela gol-main long dispela hap. No gat rot. Olgeta man, masin, kaikai samting i mas kam long kem long rot bilong helikopta. Dispela kem mi stap long en nau i winim ol narapela kem mi bin stap long en—em i longwe tru long ol man na ol narapela ples. Olsem na mi tingting gen, Mi ken autim tok long husat?
Ol man i stap long kem i save long mi, long wanem, mipela bin stap wantaim long narapela kem bipo, olsem na ol i no laik harim tok. Nau kampani i opim wanpela stua na ol meri i stap long ol longwe hap ol i kam bilong baim samting. Mi lukim dispela samting, olsem na mi save go planti taim long stua. Olsem wanem? Gutpela samting i kamap long samting mi mekim?
Wanpela taim mi stori wantaim wanpela meri Papua. Em i tokim mi em i wanpela tisa. Mi bin tok: “Tru, a? Mi tu mi wanpela tisa.”
Em i tok: “Yu wanpela tisa?”
Mi tok: “Yes, mi save skulim man long Baibel.” Em i amamas long stadim Baibel wantaim mi. Bihain sampela meri moa i kam long stua, ol tu i laik stadi. Olsem na hap i stap klostu long gol-main i kamapim gol-main bilong spirit, long wanem, mi mekim 7-pela Baibel-stadi!
Mipela stap 3-pela yia long dispela ailan long Pasifik, na bihain mipela kisim nupela wok long ailan Grenada long Karibian. Mipela i stap wanpela yia hap tasol long dispela ples, long wanem, man bilong mi i sik, olsem na mipela go na sindaun long Boise, long Idaho.
Wok Wantaim Kongrigesen
Planti yia mi wanpela i bin wok, olsem na nau mi mas lain long wok wantaim ol brata sista Kristen bilong mi. Ol elda Kristen na sampela moa i no les kwik long helpim mi. Long nau mi amamas tru long go long ol miting na mekim sampela Baibel-stadi long dispela hap.
Sampela taim mi tingting bek long taim mi bin bihainim Eva long biktaun Bangkok, o taim mi singsing long singsing bilong Kingdom long rot long ples wesan long Ostrelia, o taim mi autim tok long ol Amerindian i gat pasin daun na ol i stap long bikbus Surinam. Taim mi tingim ol dispela samting mi save lap na aiwara i pulap long ai bilong mi, long wanem, mi amamas long ol samting mi bin kisim bilong lukautim mi long ol samting bilong spirit inap planti yia, taim mi stap wanpis na lotuim Jehova.—Em stori bilong Josefa ‘Pepita’ Abernathy.
[Piksa long pes 15]
Mi singsing wantaim sampela manmeri Spen mi stadi wantaim ol long Melbon
[Ol Piksa long pes 16]
Mi helpim planti long Papua Niugini long save long Jehova
Mi skulim ol man Surinam long Baibel
[Piksa long pes 17]
Nau mi mekim wok wantaim wanpela kongrigesen long Idaho