Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • g94 11/8 p. 25-27
  • Bilong Wanem Mipela Mas Lusim Dispela Hap?

No gat vidio bilong dispela seksen.

Sori, popaia kamap long lodim vidio.

  • Bilong Wanem Mipela Mas Lusim Dispela Hap?
  • Kirap!—1994
  • Ol Liklik Het Tok
  • Wankain Infomesen
  • Ol Famili i Lusim Ples
  • Tupela Tingting
  • I Gat Hevi Bilong En
  • Karim Dispela Hevi
  • Bilong Wanem Gutpela Pren i Go Long Nupela Ples?
    Kirap!—1997
  • I Gutpela Sapos Mi Go Sindaun Long Narapela Kantri?
    Kirap!—2000
  • Inap Yu “Kam Long Masedonia”?
    2011 Wok Kingdom Bilong Yumi
  • Winim Ol Hatwok Bilong Muv i Go Long Nupela Kongrigesen
    Wastaua i Tokaut Long Kingdom Bilong Jehova (Stadi)—2024
Lukim Moa
Kirap!—1994
g94 11/8 p. 25-27

Ol Yangpela i Laik Save . . .

Bilong Wanem Mipela Mas Lusim Dispela Hap?

Skul i pinis na yu kam bek long haus. Yu wok long tingim ol samting yu laik mekim long Sarere Sande​—go long nambis, pilai kikbal, kaunim buk. Tasol taim mama i kam bek long wok, yu lukim pes bilong em na yu save, i gat wanpela hevi. Em i tok: ‘Nau ol bos i tok mi mas go wok long narapela hap, na sapos nogat, mi mas pinis long wok. Olsem na ating yumi mas lusim dispela hap.’ Wantu bel bilong yu i bagarap.

SAPOS famili bilong yu i laik go sindaun long narapela hap, tingim: I no yu wanpela tasol i gat dispela hevi. Long sampela kantri, planti famili i save senisim senisim ples sindaun bilong ol. Olsem: Long Amerika, wanpela lain (Bureau of the Census) i skelim olsem planti Amerika bai senisim ples sindaun bilong ol inap 12-pela taim. Long olgeta yia inap 12 milion yangpela Amerika i mas karim ol hevi i save kamap taim famili bilong ol i senisim ples sindaun. Tasol ating dispela i no mekim bel bilong yu i stap isi sapos nau famili bilong yu i laik go sindaun long narapela hap. Ating taim yu tingim dispela samting, bel bilong yu i hevi tasol. Ating bai yu tok: ‘Bilong wanem mipela mas lusim dispela hap?’

Ol Famili i Lusim Ples

Planti taim famili yet i no gat narapela rot​—ol i mas go sindaun long narapela hap. Bipo, famili bilong Elimelek na Naomi i mas ranawe i go long kantri Moap taim bikpela hangre i bagarapim Israel. (Rut 1:​1, 2) Long nau, wankain hevi i painim planti papamama. Long ol kantri i stap rabis liklik, bikpela san tru na ol man i no lukautim gut wara na graun samting i mekim, na planti milion man i mas lusim ples na i go sindaun long ol biktaun ol man i pas pas tumas long en​—o ol i go sindaun long ol narapela kantri. Na long ol kantri bilong Wes, ol i pasim planti faktori na wok bisnis, long wanem, i gat hevi long mani. I no gat planti wok mani moa, olsem na ating papamama bilong yu i mas i go long wanpela hap i no hatwok long painim wok.

Tasol i no olgeta famili i lusim ples bilong painim gutpela sindaun. I gat ol narapela as na sampela famili i go sindaun long narapela hap, olsem: Papa o mama i kisim wok mani i gat bikpela namba, kampani papa o mama i wok long en i go long narapela hap, marit i bruk, skin i no stap gutpela, ples i kol o hat tumas, o kain samting olsem. Wanpela saveman (John D. Kasarda) i tok, i gat narapela as na planti famili i senisim ples sindaun: ‘Long nau ol biktaun ol i nogut moa. Ol drak i mekim na pasin nogut i go bikpela hariap, na dispela i mekim nogut long ol man na long ol samting bilong ol.’ Olsem na sampela i ting, i gutpela moa long sindaun ausait long biktaun o long wanpela taun i liklik.

Bipo, Abraham i lusim gutpela haus bilong em long Ur bilong mekim laik bilong God. (Stat 12:1; Hibru 11:8) Na i wankain tu long nau, sampela famili bilong ol Witnes Bilong Jehova i bin go sindaun long ol narapela hap i sot long ol man bilong autim tok bilong Kingdom. (Matyu 24:14) Na sampela i kirap i go long wanpela kongrigesen i stap klostu, em ol i sot long ol elda na wokman. Tru, bilong mekim olsem ating ol i no senisim ples sindaun, tasol ol i mas lain long ol nupela manmeri na long sampela nupela samting.

Maski i gat wanem as na famili bilong yu i laik go sindaun long narapela hap, ating i no tingting bilong yu yet long mekim olsem. Olsem na ating yu no amamas tumas.

Tupela Tingting

Sampela taim i gutpela long senisim ples sindaun. Justin i gat 12-pela krismas, na em i tingim bek i stap bilong em long biktaun na i tok: “Em i nogut tru. Pasin bilong bagarapim man i bin go bikpela long hap bilong mipela. Olgeta taim mi lusim haus mi save tingting planti long ol lain raskol​—maski mi wokabaut inap 50 mita tasol. Ol man i save lokim dua na i stap tasol long haus. Mi nolaik tru long dispela kain sindaun. Taim mi bin kisim save olsem mipela bai go sindaun longwe long biktaun, mi amamas tru.”

Tasol taim yu tingim olsem yu mas lusim ol pren na ol ples yu save gut long en, ating dispela i mekim na yu gat tupela tingting. Yangpela meri Anita i bin pilim olsem taim em i kisim save long famili bilong em bai go sindaun long narapela ples. Em i tok: “Bikpela hap bilong i stap bilong mi em long Inglan, long wanpela kem ami bilong Amerika. Olsem na mi no ting mi meri Amerika​—mi ting mi olsem meri Inglan. Taim mi gat 10-pela krismas, mi harim olsem ol i laik salim papa i go bek long Amerika, long Nu Meksiko. Olaman! Em ples wesan! Pastaim mi gat tupela tingting. Bel bilong mi i kirap, tasol mi pret tu. Mi no laik lusim ol pren bilong mi. Dispela i givim hatwok moa long mi taim mipela i lusim Inglan.”

I Gat Hevi Bilong En

Long nau, ating ol yangpela i save pilim moa ol hevi bilong senisim ples sindaun. Wanpela buk i tok: ‘Ol dokta bilong tingting i tok, maski man i amamas long em bai senisim ples sindaun, dispela i save bagarapim yet bel na tingting bilong em.’​—Reader’s Digest.

Olsem: Taim tingting na bel bilong man i kirap pinis long i go long narapela ples, dispela i mekim na bel na tingting bilong em i no save stap isi. Na sapos sampela hevi i kamap na em i mas wet pastaim, dispela inap bagarapim bel moa yet. Baibel i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” (Sindaun 13:12) Na maski famili olgeta i amamas long ol bai go long narapela hap, ‘ol i save ol i mas tok gutbai long ol pren na ol i bel hevi long dispela samting, na tu ol i tingting planti​—ol i no save wanem samting i wetim ol.’ (Nius Parents) Olsem na kain kain tingting i save kamap long bel bilong ol yangpela olsem: kirap nogut, belhat, bel nogut, bel hevi.

Wanpela buk i tok: ‘Taim yu senisim ples sindaun bilong yu, yu no senisim tasol ples slip. Yu mas senisim planti bikpela samting long i stap bilong yu​—skul, ol tisa, ol wok yu save mekim, ol poroman. Na maski ol dispela senis yu mekim inap helpim yu, em i hatwok long mekim.’​—The Teenager’s Survival Guide to Moving.

Karim Dispela Hevi

Olsem na ating i gat as na yu tingting planti, o yu bel nogut, o belhat, taim yu tingting long yu mas lusim hap bilong yu. Tasol sapos yu larim ol tingting kranki i daunim yu, dispela bai givim hevi moa long yu. Mobeta yu wok long kisim stretpela tingting. Tru, long kain taim olsem em pasin bilong yumi long tingting planti o bel hevi, tasol bihain ol dispela tingting bai pinis. Long nau yu mas wok long tingim ol gutpela samting bai painim yu long narapela hap.

Anita, em pastaim yumi stori long em, nau i gat 15 krismas na em i lusim pinis dispela ples em i bin go sindaun long en na em i go sindaun long narapela hap gen. Em i tok: “Mi bin bel hevi taim mi lusim ples. Tasol mi stretim tingting bilong mi na mi tingim olsem mi bai bungim ol nupela manmeri na mi bai go long ol gutpela hap.” Nau em i amamas na em i lain pinis long stap long nupela hap bilong em.

Tasol sampela taim, maski yu wok strong long daunim tingting kranki, em i stap yet. Sapos olsem yu mas mekim sampela samting, long wanem, “sapos tingting bilong man i bagarap” dispela inap nogutim skin bilong em. (Sindaun 17:22) Ating yu mas malolo moa, o eksasais moa, o kisim gutpela kaikai. Na tu, ating yu mas kamapim long papamama ol tingting i stap long bel bilong yu. Yu mas autim ol hevi na pret samting bilong yu.

Olsem: Ating yu bel hevi long yu mas tromoi sampela samting bilong yu em yu save laikim tumas, long wanem ‘i gat liklik spes tasol’ bilong putim ol samting. O ating yu pilim olsem ol tes long skul i klostu tru, na dispela wantaim hevi bilong lusim dispela hap i putim bikpela hevi moa long yu. Maski yu gat tok long wanem wanem samting, tingim tok bilong Sindaun 13:10: “Sapos man i larim ol arapela man i givim tingting long em, orait dispela man i gat gutpela tingting na save.” Ating papamama bai orait long bihainim sampela laik bilong yu. Tasol sapos nogat, ol inap mekim sampela tok bilong helpim yu na mekim gut bel bilong yu.

No ken givim bel long ol tok win na ol stori bilong pretim yu na bai yu no ken amamas long i go long dispela nupela ples. Sindaun 14:15 i tok: “Ol man i gat liklik save tasol, ol i save bilipim olgeta kain tok.” Yu yet mas save wanem tok i stret. Anita i tok: “Mi bin go long laibreri na mi kaunim ol buk bilong kisim save long ol ples mipela bai go long en, na long pasin bilong ol man long ol dispela hap.” Sapos dispela ples yupela bai go long en i no stap longwe tumas, ating yu ken i go lukim nupela haus pastaim. Dispela inap helpim yu long stretim ol tingting kranki na bai tingting bilong yu i redi moa long i go long dispela nupela hap.

Tru, bai yu hatwok yet long lusim ples bilong yu. Sapos yu laik, yu ken wokim wanpela buk piksa bilong ol gutpela samting bilong ples yu laik tingim. Na bikpela samting moa, yu mas tok gutbai long ol pren bilong yu. Mekim gutpela tok long ol na bai ol i ken save, pasin pren bilong yupela i no pinis. Aposel Jon i bin “raitim planti tok moa” long pas bilong stap klostu long ol man em i save laikim tumas. Yu tu inap mekim olsem! (2 Jon 12) Sapos yu wok strong, yu inap pas gut yet wantaim ol pren bilong yu maski yu stap longwe long ol.

Bihain aiwara bilong tok gutbai bai pinis, na bai yu wok strong long lain long sindaun long nupela ples bilong yu.

[Piksa long pes 26]

Kaunim sampela buk pastaim na kisim save long nupela ples sindaun

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim