Pas Bilong Ol Man

Skul Nau tasol mi pinisim skul bilong mi long wanpela yunivesiti long Naijiria na mi sot long kisim gutpela mak inap 2-pela pesen tasol. Mi bin bel hevi tru. Olsem na taim yupela kamapim dispela stori “Stretpela Tingting Long Skul” (Jun 8, 1995), na kamapim tok olsem yumi no ken skul bilong kisim bikpela save tasol, dispela i stretim tingting bilong mi. Maski ol profesa bilong mi i laik mi skul moa taim mi lusim yunivesiti, mi laik skelim gut dispela samting wantaim ol save mi kisim pinis long nius.

G. J., long Naijiria

Mi gat 14-pela krismas na ol i laik mi go long wanpela bikpela skul. Dispela stori bilong yupela i bin helpim mi long wokim tingting long wanem samting mi laik mekim. Mi laik kamap wanpela painia [autim tok long olgeta de], na sapos mi mas skul moa inap long mi ken painim wanpela wok mani, orait, mi laik go long wanpela skul vokesenel na lain long pasin bilong kisim ol poto.

H. O., long Amerika

Mi no laik skul moa. Mi tingting long mekim wok long dispela hap taim long skulim ol man long tok bilong Man i bin wokim yumi. Planti taim ol man i kirap nogut long ol save bilong mi long planti samting. Ol i save askim mi: “Yu stap long wanem skul koles?” Mi save tokim ol, mi bin lainim ol dispela samting long Baibel na long ol buk na nius em Sosaiti Wastaua i save wokim.

M. L., long Amerika

Stori bilong yupela i soim olsem, sapos yumi laik skul moa, yumi mas tingim gutpela samting na samting nogut bilong en. Mi laik go bek long skul, tasol mi no laik lusim ol samting bilong spirit. Mi soim sedyul bilong ol miting Kristen long kuskus bilong skul, na em i senisim ol klas bilong mi bambai mi inap go long olgeta miting.

M. F. S., long Brasil

Bodi Bilong Ol Meri i No Strong Tumas?  Tenkyu tru long dispela gutpela stori “Baibel i Tok Wanem? Bodi Bilong Ol Meri i No Strong Tumas​—Dispela i Daunim Ol Meri?” (Julai 8, 1995) Olgeta man i mas kaunim dispela stori, long wanem, yupela i raitim gut dispela stori.

G. B., long Amerika

Mi no bin klia gut long tok bilong Baibel long 1 Pita 3:7 olsem, “bodi bilong ol meri i no strong tumas.” Bipo mi save ting ol meri i no gat nem liklik, na taim mi go bikpela namel long ol man, mi lukim ol man i no save litimapim nem bilong ol meri. Tasol dispela stori i bin stretim tingting bilong mi.

T. C., long Amerika

Susu Bilong Mama  Stori bilong yupela “Susu Bilong Mama” (Jun 8, 1995), i winim olgeta narapela stori yupela i bin kamapim long dispela samting. Planti taim ol papa i ting em wok bilong mama tasol long inapim dispela wok. Tasol stori bilong yupela i tokim ol papa na ol narapela insait long famili, ol inap mekim wanem bilong helpim mama long givim susu na bai em inap amamas long mekim olsem.

D. D., long Amerika

Mi bin kisim bikpela amamas tru long givim susu long tupela pikinini bilong mi. Tru, i bin i gat hevi olsem pen, tasol susa bilong mi i bin strongim mi long mekim. Na tu, dokta bilong mi i givim sampela gutpela tok long mi na mi bin winim dispela hatwok. Mi laik strongim olgeta mama, em ol mama inap long givim susu long pikinini, long mekim olsem, long wanem, mama na pikinini bai pas gut wantaim na em i wanpela gutpela amamas ol mama i no inap lusim tingting long en.

P. M., long Amerika