Kuka i Save Laikim Narapela Kain Kaikai

Wanpela man long Ailan Solomon i raitim dispela stori bilong Kirap!

KUKA bilong kokonas. Man! Em narapela kain tru, a?a Dispela kuka i stap long wan wan ples tasol olsem long ol ailan bilong Nu Jojia long hap bilong ol ailan Solomon.

Ol man bilong ples i tok: ‘Yes, ol kuka bilong kokonas i stap, tasol yu mas raun long nait bilong painim ol.’ Dispela kain kuka i no save raun long san. Long taim bilong san ol i stap long bikbus insait tru long namel bilong ol stingpela diwai i slip long graun. Long nait ol i raun na kaikai kokonas. Ol i mekim wok long traipela han bilong ol bilong tekewe skin long kokonas. Tasol ol i no save kaikai kokonas tasol, ol i save kaikai sampela kain gras tu. Bilong lukim dispela narapela kain kuka, yu mas painim skin bilong ol kokonas i stap nabaut klostu long hul bilong ol diwai i wok long sting.

Ol man bilong ples i tok, long mun Jun na Julai ol kuka i save wokim hul na go insait long graun. Nau ol i rausim olpela skin bilong ol na taim nupela strongpela skin i kamap, ol i kam antap. Sampela kuka bilong kokonas i stap inap 50 yia, olsem na skin bilong sampela inap i go bikpela tru. Mi lukluk i stap na lukim wanpela kuka i lusim hul bilong en insait long graun na longpela bilong han bilong en i olsem 50 sentimita.

Kuka i save go insait long graun bilong rausim olpela skin bilong en, tasol sori tru, em i no inap abrusim man i kam painim em. Man i lukim ol raunpela mak long graun i makim hul bilong kuka, olsem na kwiktaim em i rausim kuka bilong karim i go long haus na kaikai. Ol haus kaikai long Esia i laikim tru dispela kain kuka, na ol i laikim moa yet as bilong en, long wanem, mit bilong en i malumalum tru.

Olsem na long ol ailan Solomon gavman i tingting planti, nogut dispela kuka i pinis olgeta. Wanpela lain didiman (Fisheries Department) i makim bikpela bilong kuka na hamas kuka meri i save putim kiau em ol man inap kisim bilong baim i go long ol narapela kantri. Sampela man i tok, i gutpela long kamapim ol fam bilong kuka, na taim ol i kamap planti, ol i ken larim ol i go bek long ples tru bilong ol. Tasol ol saveman i mas skelim gut pastaim, long wanem, ol man i gat liklik save tasol long pasin bilong dispela kuka long kamapim pikinini.

Nau dispela kuka i wok long pinis, olsem na yumi save, i mas i gat wanpela lo bilong bosim olgeta hap na bai olgeta samting long graun i no ken bagarap olgeta. Na long dispela taim olgeta wan wan gutpela samting God i bin wokim, ol inap truim tok profet bilong Song 148:​5-10: “Ol dispela samting i mas litimapim nem bilong Bikpela, long wanem, em yet i tok na ol i kamap na i stap.”

[Ol Futnot]