Wanem Rot Bilong Stretim Hevi?
YUMI no ken ting dispela hevi long ol refyuji i bikpela hevi tumas na i no gat rot bilong stretim. Long olgeta hap planti lain i wok strong long helpim ol man i ranawe long pait na ol narapela hevi. Wanpela bikpela wok bilong ol i bilong helpim ol refyuji long go bek long ples bilong ol.
Ol refyuji i ranawe long haus na ples na kantri, long wanem, ol i pret ol narapela bai kilim ol i dai, givim pen long ol, reipim ol, kalabusim ol, daunim ol, stilim ol samting bilong ol, o pasim ol long kisim kaikai. Olsem na pastaim long ol refyuji i ken go bek long ples na stap gut, ol lain bilong helpim ol i mas stretim hevi i bin kirapim ol long ranawe. Maski pait i pinis, planti refyuji i no laik go bek long ples, long wanem, ol man i mekim nabaut na i olsem i no gat lo moa i bosim kantri. Agnes em wanpela refyuji bilong Ruanda na em i gat 6-pela pikinini, em i tok: “Sapos ol i kisim mipela i go bek long Ruanda i olsem ol i kisim mipela i go long matmat.”
Tasol, kirap long 1989, winim 9 milion refyuji ol i bin go bek long ples bilong ol. Inap olsem 3.6 milion bilong ol dispela refyuji ol i bin lusim Iran na Pakistan na go bek long Afganistan. Narapela 1.6 milion refyuji em ol i stap nabaut insait long 6-pela kantri, ol i bin go bek long Mosambik, em wanpela kantri pait i bin bagarapim tru inap 16 yia.
I hatwok long ol refyuji i go bek. Planti kantri ol i go bek long en i bagarap—ol liklik ples na bris i bagarap olgeta, na long ol rot na insait long bus ol man i bin planim ol liklik bom. Olsem na ol refyuji i go bek long ples, ol i no gat wanpela samting. Ol i mas stretim gen sindaun bilong ol na wokim haus, skul, klinik—olgeta samting.
Tasol maski pait i pinis long wanpela hap na ol refyuji inap go bek, hevi i save kamap long narapela hap, olsem na ol nupela refyuji i kamap. Em nau, bilong stretim dispela bikpela hevi long ol refyuji, ol i mas stretim ol hevi i save mekim ol manmeri i ranawe bilong abrusim bagarap, olsem pait, na pasin bilong daunim ol, na bel nogut long ol, na mekim nogut long ol, na sampela samting moa.
Wanpela buk (The State of the World’s Refugees 1995) i tok: “Yumi ken save tru . . . ol rot bilong stretim hevi [long ol refyuji] i hangamap long ol samting bilong wok politik, na wok ami, na wok bisnis bilong kantri, na i no gat wanpela lain bilong helpim ol refyuji em inap bosim dispela samting.” Baibel i tok i no gat wanpela lain long dispela graun maski em wanem kain lain, em inap stretim dispela hevi.
Bihain i No Gat Ol Refyuji Moa
Tasol i gat rot bilong stretim hevi. Baibel i tok, God Jehova i save tingim ol man i ranawe long ples na famili bilong ol. God i no olsem ol gavman bilong graun, em i gat strong na save bilong stretim ol bikpela hevi bilong ol man. Na em bai mekim olsem long rot bilong Kingdom bilong em—em wanpela gavman long heven na klostu nau em bai bosim ol samting hia long graun.
Kingdom bilong God bai pinisim olgeta gavman ol man i bin kamapim. Olsem na bai yumi gat wanpela gavman bilong bosim olgeta hap bilong graun, i no olsem nau na i gat planti gavman. Baibel i tok: “God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44.
Ating yu save long bikpela beten bilong Jisas long Matyu 6:9-13 long Baibel. Wanpela hap bilong beten i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Olsem dispela beten i tok, Kingdom bilong God klostu nau bai “kam” bilong mekim laik bilong God hia long graun.
Taim Kingdom bilong God i bosim graun, olgeta man bai sindaun gut wantaim. I no gat wanpela lain o kantri bai birua na pait long narapela lain o kantri. (Song 46:9) Na bai i no gat planti milion refyuji i mas ranawe bilong abrusim bagarap o ol i mas sindaun long ol kem.
Baibel i tok promis olsem King bilong Kingdom bilong God, Krais Jisas, bai “helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”—Song 72:12-14.
[Piksa long pes 10]
Klostu nau narapela bai mekim long narapela olsem em i brata na sista tru bilong em