Pasin Raskol Bai Pinis—Olsem Wanem?

PLANTI kantri i wok long daunim ol bikpela lain olsem raskol. Nius U.S.News & World Report i tok: “Insait long sotpela taim tasol planti gutpela samting i kamap long wok bilong daunim lain Mafia, na bikpela as bilong dispela samting em wanpela lo ol i kolim olsem Racketeer Influenced and Corrupt Organizations Act, o RICO.” Lo i larim polis i kotim lain raskol long olgeta pasin nogut ol i bin mekim long paulim mani bilong bisnis samting, na i no long ol wan wan samting tasol. Na narapela samting i helpim polis long daunim lain Mafia long Yunaitet Stets, em wanpela kain samting ol i save haitim long waia bilong telefon na taim ol raskol i toktok, polis inap harim toktok bilong ol. Na tu, sampela raskol i kamapim lain bilong ol long polis bambai polis i ken isi long ol.

Long Itali tu, gavman i wok strong long daunim ol lain raskol. Planti bikpela lain olsem raskol i stap long ol hap olsem Sisili, Sardinia, na Kalabria, olsem na long ol dispela hap sampela lain ami i raun long ol bikpela haus na ples ol man i save bung long en inap long ol raskol i no gat rot long mekim wok nogut bilong ol. Long ai bilong gavman dispela wok i olsem wanpela pait insait long kantri yet. Ol bos bilong sampela bikpela lain raskol ol i stap pinis long kalabus, na wanpela praim-minista bilong bipo em i kot, long wanem, kot i tok em i bin mekim sampela wok wantaim lain Mafia. Olsem na dispela wok bilong gavman long Itali i no lus nating.

Long Mas 1, 1992, gavman bilong Japan i bin kamapim wanpela lo (Anti-Organized Crime Law) bilong daunim wok bilong lain yakuza. Lo i tok, taim polis i makim wanpela lain em i wanpela bikpela lain olsem raskol, i tambu long dispela lain i mekim 11-pela samting, olsem subim man long bihainim laik nogut bilong ol, na singaut long grismani inap long man i ken mekim hait wok bisnis bilong em, na mekim pretim man na tok long bagarapim bisnis bilong em sapos em i no givim mani long ol, na singaut long mani bilong stretim wanpela hevi samting. Gavman i kamapim dispela lo bilong pasim olgeta rot ol lain raskol i save kisim mani long en. Dispela lo i kamapim gutpela samting. Nau sampela lain raskol i pinis, na bos bilong wanpela lain raskol em i kilim i dai skin bilong em yet, long wanem, em i bin bel hevi long dispela strongpela lo.

Tru tumas, ol gavman na polis samting i wok strong long daunim wok bilong ol bikpela lain olsem raskol. Long 1994 sampela jas na bikman bilong polis bilong olgeta hap ol i bin bung, na nius Mainichi Daily News i kamapim ripot olsem: “Long klostu olgeta hap bilong graun, wok bilong ol bikpela lain olsem raskol i kamap strong moa na ol i kisim bikpela mani moa​—⁠inap olsem wan trilion dola long olgeta yia.” Sori tru, ol man i wok strong long pinisim ol lain raskol, tasol ol i no inap pinisim olgeta. Wanpela as bilong dispela em planti taim ol kot i no givim hariap strafe long ol bilong pinisim ol. Planti man i ting olsem ol lo i save helpim ol raskol na i no helpim ol man i bin kisim hevi long han bilong raskol. Inap 3,000 yia i go pinis Baibel i tok: “Ol man i no kisim bekim kwiktaim long rong bilong ol, olsem na dispela i kirapim tingting bilong ol manmeri na ol i strong long mekim pasin nogut.”​—⁠Saveman 8:⁠11.

Lusim Ol Bikpela Lain Raskol

Gavman i no tingting tasol long pinisim wok bilong ol lain raskol, nogat; ol i wok tu long helpim ol raskol long lusim lain bilong ol. Dispela i bikpela wok tru. Wanpela tok bilong bipo i tok: “I gat wanpela rot tasol long lusim lain Mafia, em insait long bokis bilong planim man i dai pinis.” Sapos raskol i laik lusim wanpela lain em yakuza i save bosim, em i mas givim bikpela mani long ol o larim ol i katim na rausim liklik pinga bilong han o hap bilong en. Na narapela samting i save pretim man i lusim lain raskol, em i save em i mas bihainim pasin i stret. Planti kampani i no orait long kisim wokman em i bin insait long lain raskol bipo. Tasol long sampela kantri, i gat wanpela telefon namba bilong ol polis i stap, na ol raskol i wok long lusim pasin nogut na ol i hatwok long painim wok mani, ol i ken ring long en bilong kisim helpim.

Bilong karim ol hevi lain raskol bai putim long em, na hevi bilong i stap namel long ol man i bel nogut long em, raskol i mas kisim strongpela tingting o laik long bel bilong kirapim em long bihainim pasin i stret. Wanem sampela samting inap kirapim em long mekim olsem? Ating em i laikim tumas famili bilong em, o em i gat bikpela laik long stap bel isi, o em i laik bihainim pasin i stret. Tasol nambawan strongpela laik bilong mekim olsem i kamap klia long stori bilong Yasuo Kataoka, em stori i kamap bihain long dispela.

Yasuo Kataoka em i wankain olsem planti handet man em ol i bin senisim pasin na wokabaut bilong ol. Bipo pasin bilong ol i olsem wel animal, tasol nau ol i kisim ol gutpela pasin i helpim ol long kamap nupela man, em ol man “God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” (Efesus 4:24) Long nau, ol man em bipo ol i gat pasin olsem weldok, ol i stap namel long ol man i gat pasin bilong i stap isi olsem sipsip, na ol i wok long helpim ol narapela man tu!​—⁠Aisaia 11:⁠6.

Lusim Pasin Nogut Bilong Graun

Olsem stori i kamap paslain long dispela i tok, olgeta lain raskol na dispela graun olgeta, ol i stap aninit long strong bilong Satan. Ol man i no save, tasol Satan i bin stretim rot bambai ol man i mekim pasin nogut ol i helpim wok bilong em. Olsem ol lain raskol i save mekim, ol i givim mani long ol man i insait long lain bilong ol, na ol man i pilim olsem ol i stap insait long wanpela famili; Satan tu i olsem man bilong givim planti gutpela samting long ol man olsem mani, na amamas, na ol i pilim olsem ol i pas gut wantaim. Ating sampela samting nogut bilong Satan i bin giamanim yu tu, tasol yu no bin save long dispela. (Rom 1:​28-32) Baibel i tokim yumi olsem “man i laik pren wantaim ol pasin bilong graun, em bai i kamap birua bilong God.” (Jems 4:⁠4) Bagarap inap painim yu sapos yu kamap pren bilong dispela graun Satan i bosim. God i gat ol bikpela lain ensel Krais Jisas i bosim, na ol i redi long pait wantaim Satan na ol spirit nogut bilong klinim dispela graun na rausim ol samting nogut bilong ol.​—⁠KTH 11:18; 16:​14, 16; 20:​1-3.

Orait, olsem wanem yu ken lusim strong bilong Satan? I no olsem yu ken stap wanpis long wanpela hap, nogat; yu mas klia long olgeta tingting i save bosim ol man long nau. I olsem yu gat pait na yu mas wok strong long sakim ol samting Satan i save kamapim bambai yu pret, na ol samting em i save kamapim bilong bosim yet ol manmeri. (Efesus 6:​11, 12) Yu mas lusim sampela laik bilong yu yet, tasol olsem planti narapela man i bin mekim yu tu yu inap sapos yu tingting strong na mekim wok long ol helpim yu inap kisim long ol Witnes Bilong Jehova.

Bihain long God i klinim dispela graun i pulap long pasin raskol, wanem samting bai kamap? Baibel i tok: “Ol pikinini bilong ol man nogut bai i bagarap tru.” Na Baibel i tok moa: “Ol stretpela man bai i kisim graun God i givim ol, na bai ol i stap oltaim long en.” (Song 37:​28, 29) Long dispela taim bai i no gat as na yumi mas pret long ol man em bipo ol i gat pasin olsem wel animal, long wanem, ‘save bilong Bikpela,’ bai inapim olgeta hap bilong graun na helpim ol long senisim tru pasin bilong ol na i kamap narapela kain.​—⁠Aisaia 11:9; Esekiel 34:⁠28.

Long nau kain samting olsem i kamap tru, na stori i kamap bihain em i stori bilong wanpela man em bipo em i insait long lain yakuza long Japan, i truim dispela samting.

[Piksa long pes 10]

Long nupela taim God bai kamapim, olgeta manmeri bai amamas long wok bilong ol