Tok i Go Insait Long Yau Bilong Liklik Pikinini

WANPELA de taim mi liklik pikinini meri, wanpela man i kam long haus bilong mipela long Koben, Vejinia, long Yunaitet Stets, na taim em i toktok wantaim papa bilong mi, poroman bilong em i bin toktok wantaim mi bilong helpim mi long stap isi. Em i bin stori long Paradais long graun, na long dispela ples bai mi inap pilai wantaim ol wel animal na ol i no ken bagarapim mi. (Aisaia 11:​6-9) Em i tok mi inap stap oltaim oltaim long graun​—⁠no ken i dai. Long yau bilong mi, dispela samting em i tok bai kamap bihain, em i gutpela tru! Mi bin pilim tru samting dispela man i bin stori long en, olsem mi inap stap long graun.​—⁠Aisaia 25:8; KTH 21:​3, 4.

Bikpela Laik Long Lotu

Papamama, em ol i gat planti hevi long marit, ol i bin katim marit sampela yia bihain, na mi bin stap wantaim mama. Em i no gat laik long lotu. Olsem na mi wanpela mi save go long Sande-skul long wanem wanem haus lotu i stap klostu long mipela na mi inap wokabaut i go long en. I no longtaim na mama i marit gen na mipela i go wantaim nupela papa bilong mi na sindaun long Indiana. Tasol long olgeta yia mi bin go bek long Vejinia bilong lukim papa bilong mi.

Liklik taim bihain long papamama i katim marit, papa i kamap wanpela Momon, na em i bin wok long helpim mi long save long nupela lotu bilong em. Long 1960 taim mi gat 8-pela krismas, em i baptaisim mi. Tasol taim mi stap long Indiana, mi bin go long wanem wanem haus lotu i stap klostu long haus. Olgeta lotu i bin autim tok olsem, sapos yumi bihainim gutpela pasin, yumi bai go long heven, na sapos yumi mekim pasin nogut, yumi bai go long bikpaia na kisim bikpela pen. Mi ting i no gat wanpela em inap pilim tingting bilong mi olsem mi laik stap long graun na heven nogat, olsem na mi no bin kamapim tingting bilong mi long wanpela.

Taim mi gat 11-pela krismas, papa i go sindaun long Origen. Mi bel hevi na mi bel nogut long papa. Nupela papa bilong mi i no bilip long God, em i bin dring oltaim, na em i bin tok bilas long bilip bilong mi. Em i kolim mi liklik Meri Holi, na taim mi kirap na krai, em i bin tok: “Bilong wanem yu no singaut long God bilong yu bilong helpim yu?” I olsem i no gat wanpela long famili i save tingim God. Em taim bilong hevi. Nupela papa i bin paitim mi, toknogutim mi, na mekim pasin sem long mi. Bilong mekim gut bel bilong mi, mi bin toktok wantaim God, long wanem, planti taim mi ting em tasol i save tingim mi.

Mama i lusim man bilong em, na mi no gat hevi moa long ol pasin nogut. Tasol mama i hatwok tru, long wanem, mipela i stap rabis. Taim mi gat 13 krismas, mipela i go bek long Vejinia bilong lukim anti bilong mi. Em i gat gutpela pasin, na em i givim bel long lotu Baptis. Mi laikim em tru. Taim em i askim mi long go wantaim em long lotu, mi bin i go. Mama tu i go, na mi inap tingim dispela taim​—⁠mi amamas long sindaun wantaim famili bilong mi long haus lotu. Mipela stap wantaim anti na nau mi no laik go bek long ples. Mi pret sapos mi go bek long ples, mi bai insait long pasin pamuk. Olsem na mi krai long anti long lukautim mi na long mama i mas larim mi i stap.

Anti i baim wanpela Baibel King James na givim long mi. Mi amamas tru long dispela Baibel na long olgeta nait mi bin kaunim sampela tok bilong en. Long laspela sapta bilong Baibel mi kaunim tok olsem: “Sapos wanpela man i skruim narapela tok long dispela tok, orait ol dispela samting nogut tru God i tok long en long dispela buk, em God bai i skruim long ol samting i mas kamap long dispela man.” (KTH 22:​18, 19) Olsem na mi ting, “Olsem wanem mi ken bilip olsem Buk Momon em wanpela hap bilong Baibel Holi?” Em nau, mi pasim tingting long bel long kamap wanpela Baptis.

Ating papa i bel hevi taim mi salim pas na tokim em long samting mi tingting pinis long mekim, tasol em i mekim wanpela tok tasol​—⁠em i amamas mi go long lotu. Planti taim mi bin go wantaim pasto bilong lotu Baptis taim em i go long haus bilong ol man bilong singautim ol i kam long wanpela kain miting bilong lotu. Mi bin pilim olsem mi mekim laik bilong God, long wanem, mi go long haus bilong ol man na toktok wantaim ol olsem Jisas i bin mekim.

Tasol dispela tingting bilong mi olsem mi laik stap long Paradais long graun na heven nogat, em i bin kamap planti taim long tingting bilong mi. Tasol mi kaunim wanpela tok bilong Baibel na dispela i helpim mi: “Yupela i mas prea na askim God long givim ol samting long yupela, na em bai i givim long yupela. Yupela i mas wok long painim samting na bai yupela i lukim. Yupela i mas paitim dua, na God bai i opim long yupela.”​—⁠Matyu 7:​7, 8.

Marit na Pikinini

Long yia bihain mi go bek na stap wantaim mama long Indiana. Taim mi gat 15 krismas tasol mi marit pinis, na mi gat bel, na mi sindaun long bas i go long hap saut bilong Kalifonia. Mi no save gut long famili bilong man bilong mi, tasol mi laik ol i ken orait long mi. Ol i bilong lotu Pentikostal, na susa bilong man bilong mi, em i tokim mi long strong bilong mekim kain kain tok ples. Olsem na taim mi go wantaim ol long lotu long wanpela nait, mi bin beten olsem mi tu i ken mekim kain kain tok ples.

Wantu tasol mi pilim narapela kain. Skin olgeta i guria, na mi toktok i go i go na mi no inap bosim maus. Pasto i singaut olsem spirit holi i wok long holim mi, na em i kirap paitim isi isi baksait bilong mi. Bihain olgeta i holim mi na tokim mi em i gutpela samting tru God i bin mekim wok long mi olsem. Tasol tingting bilong mi i paul na mi pret. Mi no save mi bin tok wanem.

Liklik taim bihain, mi kisim hevi taim mi laik karim namba wan pikinini bilong mipela. Pasto bilong lotu Pentikostal i tokim man bilong mi olsem God i wok long givim bikpela pen moa long mi, long wanem, em i no wanpela Kristen. Man bilong mi i kam long mi na aiwara i pulap long ai bilong em, na em i tokim mi sapos mi ting pen bilong mi i ken pinis liklik, em bai kisim baptais. Mi tokim em, mi save pinis, God i no save mekim wanpela samting long man bilong subim em long mekim laik bilong em.

Lusim Lotu

Wanpela Sande bihain long tok bilong em, pasto i askim kongrigesen long givim mani olsem kontribusen. I no longtaim i go pinis na guria i bin bagarapim haus lotu na i gat wok long stretim sampela samting. Taim ol i salim plet bilong tromoi mani long en, mi putim olgeta mani bilong mi long en. Bihain long pasto i kaunim mani, em i no tok tenkyu long mipela, em i kirap long strongim mipela long givim sampela mani moa bilong mekim dispela gutpela wok. Em nau, em i salim plet gen i kam long mipela. Mi no gat hap mani moa i stap, olsem na kwiktaim mi givim plet i go long narapela, long wanem, mi sem. Kwiktaim pasto i kaunim gen mani, tasol em i no tok tenkyu gen; em i tok mani i no inap. Em i tok: “Ating i no gat wanpela bai em i lusim haus lotu paslain long yumi kisim mani yumi mas kisim bilong mekim wok bilong God, a?”

Man bilong mi i wet ausait, na mi save em i les long wetim mi. Na i no em tasol i les. Mi les long pasin bilong pasto long em i no tok tenkyu long mani mipela i givim. Olsem na long ai bilong olgeta mi holim bebi bilong mi, na aiwara i kapsait i go daun long pes bilong mi, na mi lusim haus lotu. Long dispela taim mi tok promis olsem mi no ken insait gen long wanpela lotu. Maski mi no go long lotu, mi no lusim bilip long God. Mi kaunim Baibel bilong mi na mi bin wok long stap olsem gutpela meri marit.

Lain Long Tok i Tru Bilong Baibel

Bihain long namba 2 pikinini bilong mipela i kamap, sampela pren bilong mipela i laik go sindaun long Teksas, na ol i bin tokim papa bilong haus ol i stap long en long rentim haus long mipela. Taim pren bilong mi, em Pat, em i laik i go, em i tokim mi wanpela meri bai kam bihain bilong bekim dinau bilong em, na Pat i askim mi long salim dispela mani i go long em long Teksas. Sampela de bihain tupela meri i paitim dua. Mi ting ol i kam wantaim mani bilong Pat, olsem na mi askim ol long kam insait long haus. Mi tokim ol Pat i bin lusim dispela hap, tasol em i bin tokim mi ol bai kam. Wanpela meri, em Charlene Perrin, em i tok: “Em gutpela pasin Pat i bin mekim. Mipela i bin amamas tru long stadi wantaim em.”

Mi tok: “Yu tok wanem? Stadi? Ating yu popaia.” Charlene i tokim mi ol i bin stadi long Baibel wantaim Pat. Taim Charlene i save Pat i lusim dispela hap, em i askim mi long stadi long Baibel. Mi hambak na tok: “Yes, mi ken skulim yu long wanem wanem samting yu laik save long en.” Mi amamas long ol hap bilong Baibel mi kaunim pinis na mi ting mi inap helpim ol.

Charlene i soim buk Tok i Tru i Bringim Man Long Laip Oltaim long mi, na mipela kaunim Song 37:9: “Ol man nogut bai i bagarap olgeta. Tasol ol manmeri i bilip na wetim Bikpela i helpim ol, bai ol i stap gut long graun bilong ol.” Mi kirap nogut. Baibel bilong mi yet i tok, ol manmeri bai kisim graun. Nau mi kirap na givim planti askim. Charlene i lap na i tok: “Eh! Isi isi! Yumi stori long wanpela askim bilong yu pastaim na bihain narapela.” Em i tokim mi, mi mas stadi long Baibel long olgeta taim. Long dispela de stret em i singautim mi long go long Haus Kingdom, em nem bilong haus ol Witnes Bilong Jehova i save bung long en.

Mi tokim Charlene long samting i bin painim mi bipo long plet bilong tromoi mani long en, na mi no laik go bek long haus lotu. Em i kaunim Matyu 10:8 long mi, i tok: “Samting yupela i bin kisim, em yupela i kisim nating, na i no gat pe bilong en. Olsem na yupela i mas givim nating long ol manmeri.” Em i tokim mi olsem, long ol miting bilong ol Witnes Bilong Jehova, ol i no salim plet bilong tromoi mani long en, na ol i givim mani long laik bilong ol yet. Na em i tokim mi i gat bokis kontribusen long Haus Kingdom na husat i laik, em i ken putim mani insait long en. Mi tingting bai mi traim lotu wanpela taim moa.

Taim mi stadi, mi kisim save bilong wanem mi bin pilim narapela kain taim mi mekim kain kain tok ples long haus lotu bilong ol Pentikostal. Pasin bilong mekim kain kain tok ples, em wanpela presen God i bin givim long ol Kristen long taim bilong ol aposel bilong kamapim klia olsem ol i bin kisim spirit holi bilong em. Na dispela presen ol i bin kisim long rot bilong mirakel em i bin helpim ol long mekim gutpela wok bilong autim tok i tru bilong Baibel long ol manmeri bilong ol narapela kantri em ol i kam bung long Pentikos long yia 33 C.E. (Aposel 2:​5-11) Tasol Baibel i tok dispela presen bilong God long mekim kain kain tok ples em bai pinis, na dispela samting i bin kamap bihain long taim ol aposel i dai. (1 Korin 13:⁠8) Tasol bilong pasim tingting bilong ol man, Satan na ol ensel nogut bilong em, ol i mekim sampela i singaut singaut na mekim ol narapela kain tok, na planti i bilip olsem ol dispela man i bin kisim spirit holi bilong God.​—⁠2 Korin 4:⁠4.

Famili i Birua

I no longtaim na mi kisim save long laik bilong God long graun na mi no ken insait long pasin nogut bilong en. (Jon 17:16; 18:36) Na mi kisim save olsem mi mas lusim Bikpela Babilon, em olgeta lotu giaman bilong graun. (KTH 18:​2, 4) Taim mi tokim papa mi bai kisim baptais olsem wanpela Witnes Bilong Jehova, bel bilong em i bagarap stret. Em i krai long mi no ken kamap wanpela Witnes. Em namba wan taim mi lukim papa i krai. Mi bin krai wantaim em, long wanem, mi no laik tru long bagarapim bel bilong em. Tasol mi save mi bin painim tok i tru na mi no inap tru givim baksait long Jehova.

Olgeta famili bilong mi ol i no laik bai mi kamap wanpela Witnes Bilong Jehova. Inap liklik taim mi no go long ol miting. Em nau, famili i no birua moa, tasol mi bel hevi. Mi save bel bilong mi i no ken stap isi inap long taim mi mekim laik bilong Jehova. Wanpela de long taim bilong belo kaikai, mi go lukim Charlene long haus bilong em na mi tokim em mi mas kisim baptais. Em i askim mi: “Olsem wanem? Yu no ting i gutpela sapos yu kam gen long ol miting pastaim?” Mi tokim em, nau mi strong long mi no ken larim wanpela samting i brukim mi na Jehova. Mi kisim baptais long Septemba 19, 1973.

Winim 23 yia i go pinis na dispela samting i bin kamap. Gutpela tru, nau famili bilong mi ol i orait long samting mi bin mekim na ol i no wok long subim mi long lusim tok i tru; em samting mi amamas long en. Tasol inap long nau, namba wan pikinini meri bilong mi, Kim, em tasol em i bin kamap wanpela Witnes​—⁠ol narapela nogat. Em i stap gut long wok bilong Jehova na dispela i bin strongim bel bilong mi inap planti yia.

Mi No Inap Lusim Tingting Long En

Long 1990, mi bin go bek long Koben, Vejinia, bilong lukim mama bilong mi, na mi bin askim mama long pasim ka klostu long Haus Kingdom inap long mi ken save long taim bilong ol miting long Sande. Taim mipela go insait long liklik rot bilong Haus Kingdom, em i tokim mi, bipo mipela i sindaun long wanpela haus baksait long Haus Kingdom long hapsait bilong rot bilong tren. Inap longtaim pinis haus i bagarap; paia i bin kukim, na bikpela paip bilong stov tasol i sanap. Em i tokim mi: “Yu liklik meri tasol long dispela taim, ating 3-pela o 4-pela krismas.”

Long Sande, olgeta long Haus Kingdom i amamas long sekanim mi. Taim mi toktok wantaim Stafford Jordan, mi tokim em taim mi liklik pikinini mi bin stap long dispela haus bipo i sanap baksait long Haus Kingdom. Em i lukluk strong long mi na em i tok: “Mi tingim yu! Yu wanpela liklik meri i gat planti gras na longpela bilong yu i olsem (long han em i makim longpela bilong mi). Mipela i bin autim tok long dispela hap na poroman bilong mi em i toktok wantaim papa bilong yu. Bilong helpim yu long i stap isi, mi bin stori wantaim yu long Paradais.”

Mi no inap toktok. Mi laik krai taim mi tokim em mi bin wok long painim tok i tru bilong Baibel. Mi tokim em: “Taim mi liklik pikinini yu bin planim tok i tru i go daun long liklik bel bilong mi!” Em i tokim mi, wanpela wanblut long lain bilong bubu man bilong mi, em Stephen Dingus, em i bin stap wanpela gutpela Witnes. Famili i no bin stori long em, long wanem, ol i birua tru. Brata Jordan i tok: “Sapos em i bin save long yu, em bai amamas tru!”

Taim mi tingting bek long ol yia mi bin stap insait long lain bilong Jehova, mi amamas tru long pasin sori na gutpela pasin ol narapela i bin mekim long mi. Yes, sampela taim mi bel hevi liklik taim mi stap long Haus Kingdom na lukim ol famili i wok wantaim long mekim laik bilong Jehova, long wanem, planti taim mi wanpela long famili bilong mi i stap long Haus Kingdom. Tasol kwiktaim mi tingim Jehova i stap wantaim mi. Olgeta taim em i bin was i stap, na taim bel bilong mi inap kisim tok i tru em wanpela i bin toktok long yau bilong mi inap planti yia i go pinis taim mi liklik yet, em i larim tok i tru i kru.

Mi tok: “Tenkyu Brata Jordan long lusim hap taim bilong toktok long Paradais long wanpela liklik pikinini meri em i no bin stap isi!”​—⁠Em stori bilong Louise Lawson.

[Piksa long pes 23]

Mi wantaim Stafford Jordan taim mi bungim em gen long 1990