Paradais i No Gat Hevi Long En—Em i Wanpela Driman Nating?
“MAN! Ples i stap bel isi tru!” Wanpela man i kam raun lukim ples em i sanap long bikbus pain antap long raunwara Retpis long provins Aidaho, Yunaitet Stets, na tru tumas, olgeta samting i stap bel isi tru. Em i tok: “Mi ting paradais bai stap olsem.”
San i lait tru long hap saut bilong nambis bilong ailan Saiprus, em long hap bilong Mediterenian. Si i sakim nambis isi isi. Dispela man bilong raun i sindaun long wanpela haus kaikai ol i bin wokim antap long maunten ston, na em i lukluk i go long ol dispela samting na em i tok: “Dispela ples em paradais!”
Planti bilong yumi i amamas long tingim bek sampela gutpela ples olsem. Tasol ol man i sindaun long ol kain ples i olsem paradais, ol i save i gat ol bikpela hevi i kamap long olgeta de: paia i save kamap long bikbus i stap long as bilong ol maunten Roki, na solwara i bagarap na dispela i save nogutim ol pis na bihain ol man tu, na i no dispela tasol—pait namel long narapela narapela kantri o namel long ol lain bilong wanpela kantri i save kamap na planti man inap kisim bagarap long en.
Paradais—Em Wanem Samting?
Taim yu harim dispela tok paradais, yu tingim wanem samting? Wanpela buk dikseneri (The New Shorter Oxford English Dictionary) i kamapim namba wan samting dispela tok paradais i makim, olsem: ‘Gaden bilong Iden olsem Stat 2, 3 i stori long en.’ Dispela i makim wanpela hap God i bin sindaunim namba wan man Adam long en. Long dispela Paradais bilong pastaim i gat planti diwai na “pikinini bilong ol i gutpela long kaikai.”—Stat 2:9.
Namba 2 tok dispela dikseneri i kolim long “paradais” i makim olsem “Heven long lotu Kristen na Muslim,” tasol bihain buk i tok: ‘Long nau dispela tok i olsem stori nating.’ Tasol long tupela man i kam raun lukim ples, paradais “em wanpela hap i naispela tru o wanpela hap bilong givim bikpela amamas long man,” na dispela i namba 3 tok dikseneri i mekim long paradais.
Long yia 1500 samting, Bikman Tomas Moa, wanpela man bilong gavman long Briten, em i raitim wanpela buk (Utopia) i stori long wanpela kantri em ol lo, na gavman, na sindaun bilong ol man long en i gutpela olgeta; em i kolim dispela samting Yutopia. Tasol dispela kantri i no wanpela kantri tru tru—em i wanpela tingting nating bilong Moa. Long taim bilong Moa ol man i ting dispela i olsem wanpela driman nating, olsem na wanpela buk dikseneri bilong nau (Webster’s New Collegiate Dictionary) i tok, ‘Dispela Yutopia bilong helpim sindaun bilong ol man, em i no inap wok gut.’
Long ol man i bihainim Jim Jones, em bikman bilong wanpela liklik lotu i save mekim hait wok bilong ol (People’s Temple), Yutopia em i wanpela hap long bikbus bilong Gaiana ol i bin klinim na rausim ol diwai samting long en. Tasol sori tru, long 1978, dispela paradais ol i laik kamapim, em i kamap wanpela ples 900 man i kisim bagarap long en! Olsem na sampela taim ol man i bungim dispela tingting long paradais wantaim ol liklik lotu nating i narapela kain tru, na pasin ol i bihainim i mekim ol man i kirap nogut long en na ol i tingting planti long ol.
Nau pasin raskol na kros pait i laik bagarapim ol man, na ol bikpela sik i laik bagarapim ol man meri pikinini, na pasin birua na lotu i brukim ol lain, olsem na maski planti ples i olsem ol i naispela ples tru, ol bikpela hevi i stap. Olsem na i gat as tru na planti man i ting paradais em i wanpela driman nating! Tasol dispela i no save pasim sampela man long wok long painim paradais o long kamapim paradais bilong ol yet. Olsem wanem? Wok bilong ol i kamap gutpela?