Faipela Rot Bilong Mekim i Stap Bilong Yu i Kamap Gutpela
WANPELA MAN LONG RIPABLIK SENTRAL AFRIKA I RAITIM DISPELA STORI BILONG KIRAP!
PE BILONG olgeta samting i go antap tru, sik, sot long gutpela kaikai, pasin bilong i stap rabis—ol dispela hevi i bikpela tru long ol kantri i stap rabis. Long tingting bilong ol man, i olsem i no gat rot bilong stretim hariap ol dispela hevi. Sapos yu sindaun long wanpela kantri i stap rabis, i gat sampela samting yu inap mekim bilong helpim i stap bilong yu i kamap gutpela? Yes, i gat! Nau bai mipela i stori long 5-pela samting ating em inap helpim yu.
Namba 1: Wokim Gaden
Long Sindaun 28:19 Baibel i tok olsem: “Sapos man i wokim gaden, bai em i gat planti kaikai.” Tru tumas, ating yu bai kirap nogut long lukim kaikai inap kamap long wanpela liklik hap graun. Long buk bilong em (Le jardin potager sous les tropiques), Henk Waayenberg i tok, wanpela hap graun bikpela bilong en i olsem 50 i go inap 100 skwe mita, inap kamapim kaikai bilong lukautim famili i gat 6-pela long en!
I no gutpela sapos yu tromoi mani bilong yu long baim ol samting yu yet inap kamapim long gaden, a? Sapos graun na taim bilong san na ren samting i gutpela, ating yu inap kamapim kaikai klostu long haus bilong yu, olsem wanpela kain sayor ol i kolim okra, na lombo, kumu, pasli, muligras, anian, tapiok, pamken, kaukau, suga, tomato, kukamba, na kon. Kain gaden olsem inap helpim famili bilong yu long kisim sampela gutpela kaikai moa, na ating kaikai bai planti inap long yu ken salim sampela tu.
Sapos hap graun bilong yu i bikpela liklik, ating yu ken tingting long planim kain kain diwai prut. Wanpela diwai prut inap karim planti kaikai yu wantaim famili bilong yu i no inap pinisim. Sapos yu bungim skin na pipia bilong kaikai samting long wanpela hap na larim em i sting, na bihain yu putim dispela stingpela samting long gaden bilong yu, em bai mekim na kaikai i kamap gut na kamap planti. Ol diwai i karim kaikai na helpim famili long kisim liklik mani tu. Tasol sapos yumi skelim gut ples bilong planim ol diwai long en na planim long dispela hap, orait bai yu inap hait long san aninit long ol, na ol i klinim win, na mekim hap bilong yu i luk naispela.
Tasol olsem wanem sapos yu no gat save long wokim gaden? Yu gat sampela pren, o ol man i stap klostu long yu, o sampela narapela manmeri yu save long ol na ol i gat save long wokim gaden? Orait, askim ol long helpim yu o givim sampela tingting long yu. Na tu, ating yu inap baim sampela buk o yu ken dinau sampela buk long ol narapela.—Lukim stori “Gutpela Sapos Yu Wokim Wanpela Gaden” long Kirap! bilong Septemba 8, 1975.
Namba 2: Baim Planti Kaikai Long Wankain Taim
Olsem wanem? Taim yu baim plaua, rais, na wel, yu save baim liklik tasol? Sapos yu save mekim olsem, ating yu tromoi nating bikpela hap mani bilong yu. Sapos yu inap, baim planti bilong ol dispela kaikai, na nau famili bilong yu wantaim 2-pela, o 3-pela o sampela famili moa inap baim hap bilong dispela kaikai. Sapos yu baim planti prut na kaikai long taim bilong en, yu no tromoi nating mani bilong yu. Ating yu inap baim sampela kaikai long bakstua.
Namba 3: Lain Long Lukautim Kaikai Bambai i No Ken Bagarap
Taim yu baim planti kaikai ating yu laik save, bai yu putim we ol kaikai i save bagarap kwik. Wanpela rot planti i save mekim wok long en, em long draim kaikai. Planti meri long Afrika i save kisim mani taim ol i salim ol samting ol i bin draim, olsem prut, okra, bin, wanpela kain liklik pamken ol i kolim skwos, pikinini bilong pamken, na ol liklik lip bilong sayor samting. I no olsem yu mas i gat wanpela masin samting bilong draim kaikai, nogat. Yu ken putim kaikai antap long wanpela samting i klin o hangamapim long wanpela samting, na karamapim laplap long en bilong pasim ol lang. Win na san bai mekim ol narapela wok.—Lukim stori “Can You Get By for Less?” long Kirap! (tok Inglis) bilong Ogas 8, 1975.
Namba 4: Lukautim Sampela Animal
Olsem wanem? Yu inap lukautim sampela kakaruk, o meme, o balus, o sampela narapela kain animal? Long planti hap, abus i gat bikpela pe. Tasol ol narapela i ken helpim yu na yu ken lain long lukautim liklik lain animal. Yu laik kaikai pis? Orait, yu ken lain long wokim wanpela liklik raunwara na putim pis long en. Abus, kiau, na pis, ol i gat marasin ain, kalsiam, ol vaitamin, ol mineral, na protin—em ol bikpela samting bilong helpim famili na ol i no ken sik tumas.
Namba 5: Stap Klin
Bilong helpim famili long stap gut na ol i no ken sik tumas, ol samting long haus i mas klin. Sapos haus i no klin dispela bai pulim ol rat, lang, na kokros i kam—ol i as bilong planti sik. Bilong mekim ol samting i stap klin yu mas lusim taim na strong. Tasol pe bilong klinim haus samting i daun long pe bilong marasin na dokta. Pasin bilong wan wan man na bilong wan wan kantri long klinim ol samting i no wankain. Tasol i gat sampela pasin ol manmeri long olgeta hap inap bihainim.
Tingim toilet. Long ples ol manmeri i save larim toilet i go doti na nogut olgeta, na dispela em i namba wan as bilong kain kain sik. Ol lain helt inap givim sampela gutpela tok long yu long wokim gutpela toilet i no gat bikpela pe.
Olsem wanem long haus yet? Ol samting i stap long ples stret bilong en na yupela save lukautim gut haus? Em i gat gutpela smel i makim olsem em i klin? Na olsem wanem long haus kuk? Ol samting i stap long ples stret bilong en na i klin? Kaikai i helpim gut skin, em i mas klin na yu mas kukim gut. Ol jem na ol liklik binatang i planti long wara i bagarap. Olsem na sipim o boilim wara paslain long yu mekim wok long en. Rausim sop long spun na naip samting long wara i boil pinis, na wasim gut han bilong yu paslain long yu holim kaikai. Putim wara long ol klinpela botol samting yu inap pasim gut.
Ol dok, pusi, kakaruk, na meme, ol i no ken kam insait long haus kuk sapos yu laik ol samting i stap klin. Na tu, yu no ken larim ol rat i ran antap long ol sospen samting, dispela bai bagarapim kaikai. Trap bilong rat inap pinisim dispela hevi.—Lukim stori “Em Hatwok, Tasol i Gat Rot Bilong i Stap Klin,” long Kirap! bilong Epril 8, 1989.
Tru, Kingdom bilong God tasol bai stretim olgeta hevi bilong ol man. (Matyu 6:9, 10) Tasol nau, ol dispela liklik tok mipela i kamapim inap helpim i stap bilong yu long kamap gutpela moa.
[Ol Piksa long pes 22]
Wokim gaden
[Ol Piksa long pes 23]
Baim planti kaikai long wankain taim
[Ol Piksa long pes 23]
Lain long lukautim kaikai bambai i no ken bagarap
[Ol Piksa long pes 24]
Lukautim sampela animal
[Ol Piksa long pes 24]
Stap klin