Wanpela Tok Promis Mi Strong Long Bihainim
EM STORI BILONG MARIAN TSIBOULSKI
LONG Februeri 1945, mi gat 20 krismas na mi wanpela soldia long ami bilong Soviet Yunion, em dispela ami i bin raunim ol Jeman inap planti handet kilomita i go bek long kantri bilong ol yet. Long olgeta de mi lukim ol samting nogut tru bilong pait, na ol wansoldia i dai nabaut. Mipela i kamap klostu long Breslo, Jemani, nau nem bilong dispela taun em Vrotslav, long Polan. Long dispela hap long wanpela nait, taim mi les pinis long lukim ol man i dai na karim bikpela pen, mi tok promis long God olsem, sapos mi inap go bek long ples bilong mi na bagarap i no painim mi, bai mi dediketim laip bilong mi long mekim laik bilong em.
Tripela mun bihain, Jemani i lus long pait. Long Disemba 1945 mi pinis long ami na mi wokabaut i go long Rogisno, em wanpela liklik ples klostu long Lavov (nau em Laviv), long Yukren, em ples bilong papa bilong mi. Long moningtaim long de bihain mi bungim wanpela Witnes Bilong Jehova, na em i autim tok long Kingdom bilong God. Mi bin kisim save pinis long sampela tok bilong Baibel na mi bin ritim sampela nius bilong ol Witnes, tasol nau bel bilong mi i pilim tru tok mi harim. Mi save, tok promis bilong mi i mekim, na mi bungim dispela Witnes.
Bihainim Tok Promis Bilong Mi
I no longtaim na mi kisim wok olsem tisa long wanpela komyuniti skul. Tasol inap 2-pela yia bihain, taim bos bilong ofis bilong edukesen i tok, ol tisa i mas lainim ol pikinini olsem God i no stap, ol i rausim mi long wok. Long wankain taim, long Me 1947, mi kirap mekim wok autim tok wantaim ol Witnes Bilong Jehova. Ol Witnes i strongim mi long go sindaun long hap bilong saut long taun Borislav. Kwiktaim mi kisim wok olsem elektrisen long dispela hap.
Long Borislav mi bungim sampela manmeri i bin kamap Witnes long 1933 samting. Ol i gat planti buk bilong Baibel na mi ritim olgeta—ol buk Studies in the Scriptures na klostu olgeta buk Joseph F. Rutherford, bipo em i presiden bilong Sosaiti Was Taua, em i bin raitim. Na mi ritim ol olpela nius Wastaua na The Golden Age (nau nem bilong en Kirap!), em sampela Witnes i holim. Tasol wanpela samting mi pilim tru long bel, em ol pas bilong sampela Witnes bilong Jemani, em gavman bilong Hitler i bin makim ol bilong i dai. Ol i bin tanim ol dispela pas long tok Polan, na wokim ol i kamap olsem buklet. Bihain mi tingim pasin bilong ol dispela brata bilong Jemani long holimpas bilip, na dispela i strongim mi long karim ol hevi.
Long 1949, mi kisim baptais long wanpela raunwara bilong Borislav, olsem na mi bihainim dispela tok promis mi bin mekim long ples pait long mekim wok bilong God. Tasol nau stretpela save i as bilong tok promis bilong mi.
Ol Hevi Bilong Mi i Kirap
I no longtaim na ol i rausim mi long wok. Olsem na long Februeri 1950, mi go sindaun long Stri, em wanpela taun i stap klostu, na long dispela hap mi painim gen wok olsem elektrisen. Ol brata Kristen i amamas tru long mi, na ol i askim mi long lukautim Memorial bilong tingim indai bilong Krais Jisas, em bai kamap sampela wik bihain.
Long dispela taim, pasin bilong biruaim ol Witnes na mekim strongpela tok long ol i wok long kamap strong. Ol man bilong lain KGB (State Security Committee), ol i hait na bihainim mipela na lukluk long mipela. Olsem na mipela i was gut na redi i stap sapos ol i holim mipela na sutim ol askim long mipela. Mipela i mekim ol singsing bilong Kingdom long ol miting, na dispela i helpim mipela long stap strong long ol samting bilong spirit.
Long Julai 3, 1950, ol i askim mi long sainim wanpela pepa (Stockholm Appeal) i kamapim tingting bilong ol man olsem ol i no laikim ol bom nuklia, na winim 273 milion manmeri i sainim pinis dispela pepa, klostu olgeta ol i bilong ol kantri em gavman Komyunis i bosim. Taim mi tok mi no laik sainim dispela pepa, long wanem, mi no insait long ol samting bilong wok politik, ol i rausim mi gen long wok. Bihain long dispela polis i holim mi, na kotim mi, na kot i tok mi mas kalabus inap 25 yia.
Narapela Narapela Banis Kalabus
Long Disemba 1950, ol i putim planti bilong mipela long tren i save karim ol bulmakau, na ol i salim mipela i go longwe inap 3,000 kilomita long hap not klostu long ol maunten Ural. Long dispela hap ol i putim mi long narapela narapela banis kalabus. Long olgeta banis kalabus i stap bilong mipela i wankain—bikpela wok na liklik kaikai. Insait long 2-pela o 3-pela mun tasol, ol yangpela man i gat strongpela skin ol i go bun nating. Planti i dai. Mipela i no inap ting olsem mipela bai abrusim bagarap, long wanem, ol i makim planti yia mipela i mas kalabus.
Wanpela yia mi no gat ol buk na nius bilong Baibel na mi no bung wantaim ol narapela Witnes, dispela i putim bikpela hevi tru long mi. Taim mi stap wanpis, bel na tingting bilong mi i bagarap stret. Tasol mi kisim strong long ol samting bilong spirit taim mi stori long Kingdom bilong God, na sampela kalabusman i harim tok. Bihain, Jehova i harim strongpela beten bilong mi, na ol i kisim mi i go longwe inap 2,000 kilomita long hap saut-is long nupela taun Angarsk, long isten Saibiria. Long dispela taun i gat bikpela banis kalabus na ol i wokim wanpela faktori bilong wokim marasin, na bikpela hap bilong dispela wok ol kalabusman i mekim.
Ol i makim mi bilong slip long Banis Kalabus 13, klostu long dispela hap ol i wokim faktori long en. Kwiktaim mi bungim ol narapela Witnes, na ol i givim mi ol nupela Wastaua na Informant, em nem bilong Wok Kingdom Bilong Yumi long dispela taim. Man! Nau mi kisim planti gutpela kaikai bilong spirit! Tasol ol dispela kaikai bilong spirit i kam we?
Long Epril 1951, ol i bin salim planti tausen Witnes bilong Yukren i go long Saibiria, na planti bilong ol i go long ol ples i no longwe long Angarsk. Ol dispela brata i kisim ol Wastaua na ol narapela buk na long pasin hait ol i wokim kopi bilong ol, na bihain ol i salim hait ol dispela nius samting i kam long banis kalabus. Na mipela inap kisim wanpela Baibel tu. Mipela i brukim dispela Baibel na tilim hap hap bilong en namel long mipela yet. Olsem na sapos ol bikman bilong kalabus i kam painim ol buk samting, ol bai kisim wanpela hap bilong Baibel tasol. Mipela i mekim Stadi Wastaua na Skul Bilong Wok Autim Tok long kalabus tu!
Long pinis bilong 1952, ol i putim mi long Banis Kalabus 8. Long mun Mas long yia bihain, mipela i mekim Memorial long wanpela liklik rum ol kalabusman i save putim kago bilong ol long en. Inap 12-pela tasol i kam—em 3-pela Witnes na 9-pela man i laik harim tok bilong Baibel. Ol bikman bilong kalabus i kisim save long bung bilong mipela, na ol i rausim mi i go i stap long Banis Kalabus 12, long wanem, ol i tok, mi ‘man nogut bilong kirapim ol narapela long bikhet.’ Faipela Witnes moa i stap pinis long dispela banis kalabus na ol i kisim strafe tu, long wanem, ol i bin autim tok. Taim mipela i stap long dispela banis kalabus, ol i subim mipela long digim wanpela bikpela hap graun wantaim ol pika na savol tasol.
Planti kalabusman long Banis Kalabus 12, ol i man nogut tru. Ol bikman bilong kalabus i ting taim mipela i stap wantaim ol, dispela bai daunim mipela olgeta. Tasol mipela i toktok long Kingdom bilong God wantaim ol, na insait long ol haus slip mipela i mekim ol singsing bilong Kingdom. Wanpela taim, mipela i singsing pinis na bos bilong ol dispela man nogut i kam tokim wanpela Witnes olsem: “Sapos wanpela man i laik mekim nogut long yupela, bai mi kilim em i dai!” Sampela man nogut ol i lainim ol singsing bilong Kingdom na ol i singsing wantaim mipela!
Long namel bilong yia 1953, planti Witnes bilong ol narapela banis kalabus, ol i putim ol long Banis Kalabus 1. Pastaim i gat 48 Witnes i stap long Banis Kalabus 1, tasol 3-pela yia bihain, namba i go antap long 64. Tru tumas, insait long dispela hap taim inap 16 man i givim bel long tok i tru na ol i kisim baptais! Maski olgeta taim ol bikman bilong kalabus i laik painim sampela samting i makim olsem mipela i mekim samting bilong lotu, mipela inap mekim ol miting na baptaisim ol man long haus waswas bilong kalabus, long wanem, man i lukautim haus waswas em i wanpela Witnes.
Stap Fri, na Kamapim Famili
Long 1956 klostu olgeta Witnes i lusim kalabus, olsem na ol man bilong autim gutnius i go long olgeta hap bilong Soviet Yunion. Ol i bin makim mi bilong kalabus inap 25 yia, na bihain ol i senisim dispela na makim 10-pela yia, na bihain moa ol i makim 6-pela yia na 6-pela mun. Olsem na long Februeri 1957, mi tu mi lusim kalabus.
Pastaim mi go long Birusinsk, em wanpela taun long Saibiria, em longwe long Angarsk inap 600 kilomita long hap bilong not-wes. Ol i bin salim planti Witnes bilong Yukren long dispela hap, na mi amamas long stori wantaim ol na long harim stori long ol Witnes mipela i save long ol. Mi lusim dispela hap na mi go bek long Borislav, long Yukren. Long dispela hap wanpela Witnes bilong Yukren i sindaun long en, nem bilong em Eugenia Bachinskaja. Em i bin lusim kalabus wanpela yia paslain long mi.
Eugenia em i wanpela strongpela Witnes ol i bin makim bilong i dai, long wanem, em i autim tok. Tasol taim em i bin kalabus inap 18 de long kalabus bilong ol man ol i makim bilong i dai, ol i senisim strafe bilong em na makim 25 yia em i mas stap long banis kalabus. Long pinis bilong yia 1957, taim mi go bek long Yukren, mipela i marit. Taim mipela i marit pinis, mipela i laik i go sindaun long Borislav, em dispela taun mi bin kisim baptais long en inap 9-pela yia i go pinis. Tasol nogat, ol i tokim mi olsem, insait long 48 aua mi mas lusim Yukren!
Mi go sindaun long Kokesas, long sauten Rasia, na bihain Eugenia i bungim mi long dispela hap. Tasol bihain long mipela i bin stap long wanpela liklik pipia haus inap 6-pela mun, mipela i go long Birusinsk bilong bungim ol brata sista Kristen bilong mipela ol man i bin rausim ol long as ples. Long Birusinsk i gat inap 500 bilong ol i stap na 5-pela kongrigesen, na ol i makim mi olsem wasman siaman bilong wanpela kongrigesen. Long 1959 meri bilong mi i karim pikinini meri, em Oksana, na long 1960 em i karim Marianna. Kirap long taim ol i liklik yet, olgeta taim ol i stap long ol miting, na ol i go bikpela insait long ol wok bilong spirit long kongrigesen long Saibiria.
Ol bikman bilong gavman long Saibiria ol i no pasim mipela tumas long mekim ol wok bilong kongrigesen, olsem ol bikman bilong gavman long Yukren ol i bin mekim. Tasol em i hatwok long kongrigesen olgeta i bung wantaim. Long taim bilong planim daiman dispela i opim rot na mipela bikpela lain inap bung wantaim. Long kain taim olsem sampela brata i mekim ol gutpela tok bilong Baibel. Tasol taim ol bikman bilong gavman i kisim save long samting mipela i mekim, ol i kirap mekim sampela samting. Olsem: Wanpela taim ol i pasim lain i wokabaut na karim bodi bilong wanpela man i dai pinis, na ol i strong na kisim bokis bilong daiman na planim em long ples matmat.
Go Bek Long Yukren
Long 1965 mipela i go bek long Yukren na sindaun long Kremensuk. Dispela taun—em i longwe long Borislav inap 800 kilomita long hap bilong is—em i gat 12-pela Witnes tasol. Mipela i sindaun long dispela hap inap 5-pela yia, na bikpela hap bilong dispela taim, mi raun long ol kongrigesen olsem wasman sekit. Long 1969, taim tupela pikinini meri bilong mipela i gat 9-pela na 10-pela krismas, ol i askim mipela long i go sindaun long hap bilong saut bilong helpim ol brata i stap long liklik taun Molosensk.
Long Molosensk, lain KGB i kisim mi bilong toktok wantaim mi inap sampela aua. Ol i bin mekim olsem long mi inap 6-pela taim! Long olgeta taim, ol i tok promis long mi olsem ol bai givim gutpela sindaun long mi sapos mi no bung moa wantaim “Ol Jehova.” Bihain lain KGB i les, na ol i tok mi na narapela Witnes i mas kalabus inap wanpela yia.
Taim mi pinis long kalabus, long 1973 mi wantaim famili bilong mi, mipela i go sindaun long wanpela liklik ples klostu long Kremensuk. Long pasin hait mipela i mekim ol miting Kristen long haus bilong mipela, na long 1974 mipela i mekim tu Memorial bilong tingim indai bilong Krais. Long moningtaim polis i kam na ol i wok long painim painim ol samting long haus bilong mipela, na ol i holim mi.
Kot, Kalabus, na Sindaun Long Narapela Hap
Ol i no larim ol man nating i kam harim kot bilong mi; nogat. Ol man ol yet i singautim, ol tasol inap i kam. Ol man i sindaun long kot, em ol bikman bilong gavman na ol kaunsil, em ol man i gat namba. Mi no laik kisim loya, na ol i tok inap 45 minit mi ken kamapim tok bilong helpim mi. De paslain long kot, Eugenia na tupela pikinini meri bilong mipela, ol i brukim skru na beten, tasol ol i no askim Jehova long katim ol yia bilong mi long kalabus o bilong mi ken abrusim kalabus, nogat. Ol i askim Jehova long helpim mi long autim gut tok long Kingdom na long nem holi bilong em.
Kot i kirap na jas i ritim sampela tok long nius Wastaua na Kirap! Jas i no ting dispela bai kirapim tingting bilong ol man i sindaun long haus kot. Taim ol manmeri i harim olsem, pasin nogut bai pinis long Armagedon na Kingdom bilong God bai bosim graun, tingting bilong ol i paul—ol i no save long wanem samting ol i mas bilip long en. I no longtaim na jas i luksave olsem em i popaia pinis, na taim mi wok long pinisim tok bilong mi, em i traim long stretim popaia bilong em, olsem na olgeta taim em i wok long katim tok bilong mi. Tasol taim jas i ritim sampela tok bilong 2-pela nius bilong mipela, long dispela rot em i helpim mi long autim tok long ol man long haus kot, na mi amamas nogut tru. Tasol maski ol dispela i kamap, ol i salim mi i go kalabus bilong mekim wok leba inap 5-pela yia, na bihain long dispela mi mas i go na stap long longwe ples inap 5-pela yia.
Inap 5-pela yia mi stap wantaim ol man nogut tru long banis kalabus bilong Yodva long hap bilong not, long wanpela hap bilong Soviet Yunion ol i kolim Komi Otonomos Soviet Soselis Ripablik. Long dispela taim, mi gat planti rot long autim tok long Kingdom long 1,200 kalabusman na long ol bikman bilong banis kalabus. Taim mi lusim kalabus long 1979, ol i salim mi i go sindaun long Vorkuta, em i stap antap long hap bilong Aktik Sekel. Taim mi painim pinis wok mani na haus long Vorkuta, famili bilong mi i kam na stap wantaim mi.
Vorkuta i gat nem olsem ol kalabusman i bin wokim dispela taun na planti ol i dai taim ol i mekim wok, na planti Witnes tu, em ol i bin kalabus long bipo. Nau em i wankain olsem ol narapela taun, na ol banis kalabus i no stap moa. Tasol insait long graun i tanim i kamap ais, aninit long taun na long arere bilong en—i gat bodi bilong planti manmeri ol i bin dai bilong litimapim nem bilong Jehova.
Amamas Long i Stap Fri Long Lotu
Long 1989 mipela i lusim Vorkuta na go long Polan long tupela kibung intenesenel bilong ol Witnes Bilong Jehova. Mipela i no sem long aiwara bilong amamas i pundaun long pes bilong mipela, taim mipela i lukim planti tausen brata sista Kristen long Woso na Katovis ol i amamas long bung wantaim, na ol i no pret long polis bai holim ol. Wanpela driman i kamap tru. Mipela i go bek long Vorkuta wantaim nupela strong long mekim wok bilong Kingdom.
Tasol hap i stap antap long Aktik Sekel em i kol nogut tru, na dispela i bin bagarapim skin bilong Eugenia. Olsem na long dispela yia yet mipela i go sindaun gen long Kremensuk, na long dispela hap mipela i amamas long i stap fri na mekim wok bilong Jehova. Tupela tambu man bilong mipela ol i elda long kongrigesen hia long Yukren. Na maski tupela pikinini meri bilong mipela i gat 4-pela pikinini, tasol ol i mekim wok painia, olsem ol i save mekim wok autim tok long olgeta de.
Sampela taim, mi save tingim yet dispela pait i bin kamap long 1945 na tok promis mi bin mekim inap 50 yia i go pinis. Bilong mi inap bihainim tok promis bilong mi, Jehova i bin givim stretpela save long mi, em dispela wankain save i bin helpim planti milion manmeri long mekim wankain tok promis—em long mekim wok bilong Jehova inap oltaim oltaim.
[Mep/Piksa long pes 25]
RASIA
Vorkuta
Laviv
Borislav
YUKREN
Kremensuk
Molosensk
Kokesas
Birusinsk
Angarsk
Mipela wantaim tupela pikinini meri bilong mipela, man bilong ol, na 4-pela pikinini bilong ol
[Kredit Lain]
Mountain High Maps® Copyright © 1997 Digital Wisdom, Inc.