Kalkata—Em Narapela Kain Biktaun
Wanpela man long India i raitim dispela stori bilong Kirap!
WANPELA man bilong Inglan i save raitim ol buk, em Rudyard Kipling, em i tok, Kalkata “em i biktaun bilong nait nogut,” na “ol man i pas pas long dispela biktaun na ol samting nogut i kamap long en.” Tasol wanpela man Urdu i gat nem long raitim ol stori, em Mīrzā Ghālib, em i tok, Kalkata “em i biktaun bilong givim nupela strong long man,” “biktaun bilong heven.” Wanpela man bilong raitim ol buk, em Dominique Lapierre, em i tok, olgeta wan wan taim em i go long dispela biktaun “ol nupela naispela samting i save painim em.” Tasol Peter T. White, em i raitim stori long wanpela nius (National Geographic) na em i kamapim tok bilong sampela man i tok, Kalkata em i “ples nogut tru, na ples bilong pret. I no gat narapela biktaun i gat planti pipia haus nogut olsem Kalkata.” Tru tumas, Kalkata, long tok ples Bengali, em Kalikata, em i narapela kain biktaun.
Biktaun i Kamap
Kalkata i stap long nambis bilong India long hap bilong not-is, long provins Wes Bengal. Kalkata em i no wanpela biktaun bilong bipo bilong India. Sapos yumi skelim Kalkata wantaim biktaun Delhi na Tanjavur, Kalkata em i nupela taun. Olsem planti narapela biktaun, Kalkata i kamap, long wanem, i gat wara i stap—em wara Genjis. Klostu long pasis bilong Bengal, wara Genjis i save bruk long tupela liklik wara na bihain 2-pela wara i bruk long planti wara, olsem na maus bilong wara i gat nambawan bikpela ples tais, winim olgeta narapela long graun. Long arere bilong ples tais long hap bilong wes i gat wanpela wara, bipo ol i kolim dispela wara Bagirati-Ganga, na bihain ol i givim nem Hugli long en. Dispela wara i save ran i go long solwara long hap bilong saut.
Long yia 1450 i go inap 1550 samting, ol bisnisman bilong Potugal, Holan, na Inglan ol i go antap long wara Hugli long sip bilong ol. Ol i kisim tok orait long ol bikman bilong ples, na ol i kamapim sampela tesin bilong mekim wok bisnis bilong ol. Jop Sanok, em i ofisa bilong wanpela bisnis (British East India Company), na em i makim ples Sutanuti long kamap ples bilong wok bisnis. Bihain long sampela hevi, em i wokabaut long sip i go kamap long Sutanuti, na em i bungim ples Govindpur na Kalikata, na dispela 2-pela ples i no tesin tasol, ol i kamap wanpela setelmen bilong Briten. Dispela i kamap long Ogas 24, 1690. Em nau, Kalkata i kamap!
Long yia 1698, lo i orait long ol Briten i sindaun long dispela hap, na i go inap long yia 1757 ol Briten i baim graun olsem rent long ol bikman bilong Mogul. Ol Briten i wokim Fot Wiliam bambai ami i ken lukautim dispela biktaun i wok long go bikpela. Fot Wiliam i lukautim biktaun, olsem na ol bisnisman i no pret na ol i wokim ol naispela bikpela haus. Long dispela taim inap 400 tausen man i sindaun long taun na long ol ples klostu, na wok bisnis i mekim na long olgeta yia inap 50 sip i kam long wara Hugli.
Hul Tudak Bilong Kalkata
Long yia 1756, wanpela yangpela bikman bilong dispela hap—em Sirāj-ud-Dawlah bilong Bengal—em i go pait long Kalkata. Planti man i stap long Kalkata ol i ranawe, tasol sampela man bilong Yurop ol i bin hait insait long Fot Wiliam, ol i givim ol yet long han bilong ol birua. Birua i putim ol long wanpela liklik kalabus long taim bilong bikpela san long Jun. Long de bihain, ol i lukim planti bilong ol i bin dai, long wanem, ol i no inap pulim win. Dispela kalabus i kisim nem olsem Hul Tudak Bilong Kalkata.
Dispela i kirapim belhat bilong East India Company, na long yia 1757, Robet Klaiv i kisim wanpela lain soldia bilong Briten i go pait bilong kisim bek Kalkata. Ol man i tok, dispela pait (Battle of Plassey) i makim kirap bilong Briten long bosim India. Na wanem samting i painim Kalkata? Long yia 1773 em i kamap nambawan biktaun bilong India em Briten i bosim, na em i stap olsem i go inap long yia 1911.
Sampela Senis Long Kalkata
Taim ol man long Kalkata i kisim planti mani, ol i wokim ol naispela bikpela haus, olsem na Kalkata i kisim nem olsem Biktaun Bilong Ol Naispela Bikpela Haus. Ol i wokim ol bikrot, na ol haus tumbuna na laibreri. Planti bilong ol dispela gutpela haus i stap yet na i kamapim klia dispela samting.
Taim Briten i bosim India inap 190 yia pinis, bihain aninit long tupela lida, em Mohandas Gandhi na Jawaharlal Nehru, India i kisim independens long 1947, na kantri i bruk. Aninit long Mohammed Ali Jinnah, provins Muslim bilong Pakistan i kamap (Is na Wes Pakistan). Bihain long 1971, Is Pakistan i kamap Banglades. Ol dispela samting i mekim na planti refyuji i kam long Kalkata. Nau inap 12 milion manmeri i sindaun long dispela biktaun.
Kwiktaim planti man i kam sindaun long dispela biktaun na ol i no inap lukautim ol yet long ol samting bilong skin, olsem na dispela i kamapim ol bikpela hevi. Ol i no gat haus, olsem na planti milion manmeri i sindaun long ol skwota setelmen, na ol i wokim haus long katon na long bek i kain olsem bek kopra. Wan wan tasol i gat toilet, paua, o wara. Planti tausen moa ol i slip long rot. Long 1967, inap 9-pela lain man bilong olgeta hap na ol i save skelim ol samting bilong ol taun ol i tok, Kalkata “i wok long bagarap hariap long ol samting bilong mani, haus, toilet na wara, PMV samting, na long ol narapela samting i bikpela samting long i stap bilong ol manmeri.” I olsem i no gat wanpela gutpela samting inap painim dispela biktaun bihain.
Bilong wokim sampela haus moa—na bilong helpim moa yet ol man i no save kisim planti mani—ol i stretim wanpela bikpela ples tais. Na ol i kisim ol pipia graun long as bilong wanpela wara na kapsaitim long ples tais. Taim ol i mekim olsem dispela i helpim ol sip long ran gut long wara.
Long 1993 samting, planti wok bisnis bilong olgeta hap i kam long India, na ol man long Kalkata tu i laik insait long en. Olsem na ol i kirap mekim bikpela wok bilong klinim Kalkata, olsem: Ol i rausim ol skwota setelmen na putim ausait long taun, na ol i mekim wok long pipia bilong taun bilong kamapim paua na marasin bilong putim gris long graun, na ol i tambuim ol man long draivim ka na mekim wok long ol aven i stap ausait long haus em ol i save kamapim smok i bagarapim win. Ol i mekim ol rot i op moa, na ol i wokim ol traipela haus i gat planti stua long en. Ol manmeri i rausim ol pipia na kago ol i no gat wok long en, na wasim na penim ol samting. Ol man i helpim Kalkata long abrusim bagarap na long kamap gutpela gen. Olsem na dispela biktaun bipo ‘i laik bagarap’ i kamap strong gen. Wanpela ripot bilong 1997 i stori long ol gutpela samting long India na long ol naispela ples bilong en, na ripot i tok, Kalkata em i nambawan gutpela biktaun, winim olgeta narapela biktaun long India.
Biktaun Bilong Bisnis
Long Kalkata i gat ol refyuji i kam long ol kantri klostu, na ol man bilong ol narapela provins bilong India, na ol Bengali yet, na ol man bilong Saina na Amenia em ol i bin stap longpela taim pinis long Kalkata, olsem na dispela biktaun i kamap ples bilong kain kain tok ples, pasin, lotu, na kaikai. Wanem samting i pulim ol dispela planti milion manmeri i kam long Kalkata? Wok bisnis! Ol sip bilong olgeta hap graun i kam long dispela biktaun, em hap Is na hap Wes i save bung. Ol kampani bilong Kalkata i salim sol, lip ti, suga, liklik diwai ol i save wokim kala long en, koten, na slika. Long rot bilong trak, tren, na sip, planti kago i go i kam long Kalkata. Bihain long kantri i kisim independens, ol i wokim ol traipela faktori bilong wokim ain, na ol i digim graun bilong kisim ol gutpela samting insait long en bilong ol man i ken mekim wok long en o bilong salim long narapela kantri bilong kisim mani.
Kalkata i stap long nambis, na long dispela as wok bisnis i go bikpela. Bipo ol sip bilong Briten i anka long hap bilong wara Hugli i daun tru, na ol i salim ol liklik bot long karim ol kago i go i kam. Long yia 1758, ol bisnis i wok long kamap long Kalkata na bihain Kalkata i kamap nambawan biktaun em planti sip i kam sua long en. Ol i kisim ol nupela samting bilong stretim stretim dispela wok, na ol i bin banisim hap bilong wara Genjis na dispela i mekim na i gat bikpela wara moa long en, olsem na ol sip bilong ol narapela kantri i kam long Kalkata, na i gat planti sip bilong ol taun i stap long nambis na bilong ol hap i stap insait long kantri ol i go i kam long Kalkata.
Samting Bilong Bipo na Nau Bilong Raun
Long wanpela biktaun i gat inap 12 milion manmeri long en, i hatwok tru long painim PMV o bas samting. Kalkata i gat olgeta samting ol narapela biktaun bilong nau i gat bilong helpim ol man long raun—na planti samting moa! Ol turis i kirap nogut long lukim ol man i gat save long pulim ol liklik karis i gat 2-pela wil i go na abrusim nabaut planti planti ka i pulap long rot. Planti taim ol i kisim ol pasindia i go hariap long hap ol i laik go long en, winim bas o teksi. Long 1900 ol man i kirap mekim wok long dispela kain karis bilong karim kago, tasol i no longtaim na ol i mekim wok long en bilong kisim ol manmeri i raun. Ol i ting inap 25 tausen kain karis i raun long ol rot bilong biktaun! Tru, ol karis i mekim na ol ka i no inap ran hariap, tasol karis i givim wok mani long 50 tausen man na helpim planti man moa long raun.
Long olgeta de, planti tausen man i save wok mani, ol i kalap long ol liklik bot i kisim ol long bikpela stesin bilong tren long Kalkata na kisim ol i go long hap bilong ol bisnis. Nau ol i mekim wok long sampela bot moa bilong abrusim sampela hevi planti planti ka long ol rot i save kamapim, long wanem, long olgeta de, winim 50 tausen ka na planti tausen trak ol i hatwok tru long i go i kam long wanpela bris, em bris Haura.
Ating wanpela samting ol man i save laikim tru long dispela biktaun em ol bas i wok long paua. Dispela kain bas i no save bagarapim win, na planti man inap kalap long en, na em i no save lusim nating paua. Long olgeta de, em i save kisim planti tausen manmeri long olgeta hap bilong biktaun, tasol sampela taim ol pasindia i no inap sindaun gut. Man i mas i gat save bambai em inap hangamap long arere bilong en! Tasol ol i wokim pinis wanpela gutpela samting bilong stretim dispela hevi, em ol tren (Metro Rail System) i save raun na long olgeta aua inap 60 tausen manmeri inap raun long biktaun, na ol i sindaun gut long tren i gat masin bilong mekim kol tren.
Long Kalkata Ol i Gat Kain Kain Sindaun
Ol man i gat rot long skul gut long Kalkata, olsem na planti i kisim save long wok saiens na wok loya, na Kalkata i kamap ples tru bilong ol man i gat save long malenim piksa, na pilaim musik, na mekim singsing samting. Inap 250 tausen sumatin i save skul long Yunivesiti Bilong Kalkata, em wanpela yunivesiti i gat 140 krismas, na bikpela bilong en i winim planti narapela yunivesiti.
Long India, biktaun Mumbai em i ples tru bilong ol piksa wokabaut bilong singsing na danis samting, tasol Kalkata em i ples tru bilong ol piksa wokabaut i kamapim ol gutpela pilai i gat stori long i stap bilong ol man. Long olgeta hap bilong graun, planti man i save long 2-pela man, em Satyajit Ray na Mrinal Sen, em ol i gat nem long helpim kain wok olsem. Sapos yumi bungim wantaim ol man bilong Rom na Paris, em ol i save raitim ol stori, planti man moa long Kalkata i save mekim olsem. Na i wankain long ol gutpela buk. Kalkata i gat planti gutpela buk, winim moa yet ol gutpela buk bilong Nu Yok na Landon. Na tu, long Koles Strit i gat wanpela bikpela maket i save salim ol sekenhan buk.
Ol Narapela Kain Samting Bilong Lukim
Wanpela bikpela samting bilong i go lukim em wanpela bikpela haus ol i kolim Viktoria Memorial. Ol i bin wokim dispela haus long ston mabel long stail bilong ol Itali bilong bipo. Kirap long 1921 ol man inap go lukim dispela bikpela haus tumbuna i gat ol samting i makim dispela taim Briten i bosim India. Long Kalkata i gat bikpela Haus Tumbuna Bilong India, na inap 30 narapela haus tumbuna. Wanpela gutpela hap bilong i go lukim em Bikpela Gaden Diwai na Plaua Bilong India. Long dispela gaden i gat wanpela diwai banyan i gat 240 krismas, na sapos yu wokabaut raunim olgeta dispela diwai, em inap olsem 400 mita. Narapela gutpela ples bilong i go lukim em Gaden Bilong Ol Animal. Na wanpela hap graun ol i kolim Medon, bikpela bilong en inap 520 hekta, em i nambawan bikpela ples bung bilong India. Na tu, Kalkata i gat wanpela bikpela haus (Birla Planetarium) ol man inap go insait long en na kisim save long ol sta. Ol man i save laikim kriket ol inap i go long wanpela hap graun bilong pilai kriket (Eden Gardens’). Inap 100 tausen manmeri i bin sindaun long dispela hap na bikpela pairap na amamas i save kamap taim ol i lukim ol man bilong ol narapela kantri i kam pilai kriket wantaim India.
Wanpela naispela haus tru em Saiens Siti, em i nambawan bikpela haus bilong ol samting bilong saiens long Esia. Long dispela haus, ol man inap pilim graun i guria, na lukim wanpela ailan i go daun aninit long wara, na lukim bikpela win i kirap, na kisim save long ol samting bilong wara na win na graun, na pasin bilong planti animal. Tasol long ol Hindu, nambawan bikpela samting i save pulim ol i kam long Kalkata, em bung bilong Durga Puja, em wanpela god bilong ol. Long taim bilong dispela bung, inap 5-pela de ol manmeri long Kalkata i mekim save long bikpela amamas bilong lotu, na planti man i no mekim wok bilong ol.
Yu inap painim wanem ol samting sapos yu raun long ol stua long Kalkata? Olgeta kain samting! Tasol yu mas redi long wokabaut namel long planti planti manmeri i singaut singaut, na lukim ol meri i pasim ol naispela klos bilong India i gat kala kala. Yu inap baim ol samting ol i wokim long skin bilong animal na pe i no antap tumas, olsem ol gutpela su ol i save salim long ol stua bilong ol Saina. Na samting ol i wokim long ain i no save ros, laplap, gutpela sospen graun, na ol naispela bis samting, em sampela tasol bilong ol samting yu inap painim long ol bikpela maket long dispela biktaun.
Kaikai
Ol i tok, Kalkata em i nambawan ples bilong kisim gutpela kaikai, olsem na paslain long yumi lusim dispela biktaun, yumi mas traim sampela gutpela kaikai bilong en. Ol i tok, kaikai em i bikpela samting long ol Bengalis, na ol i save skelim man long save bilong em long kukim kaikai! Pis em i bikpela samting long ol man bilong Kalkata, na ol bikpela maket i gat kain kain pis, abus, na kaikai bilong gaden. Ol i tanim wantaim ol kain kain kari i nupela yet bilong mekim kaikai i swit tru. Kaikai bilong ol Saina i planti. Na ol Kalkata i wokim ol gutpela loli. Wanpela kain raunpela loli (Rasagollas), ol i wokim long susu i strong pinis, na ol i bin slipim long suga i kamap olsem hani. Dispela loli i olsem mak bilong Bengal. Na yu mas traim wanpela kain switpela yoget (mishti do) ol man i save kisim bihain long kaikai. Olsem wanem? Maus bilong yu i wara? Yu inap smelim gutpela smel i kam long ol haus kaikai? Tru tumas, Kalkata em narapela kain biktaun!
[Ol Mep long pes 13]
(Bilong save ol dispela rait i stap we long pes, lukim buk o magasin.)
SRI LANKA
INDIA
Kalkata
BANGLADES
[Mep]
KALKATA
Bikpela Gaden Diwai na Plaua Bilong India
Medon
Gaden Bilong Ol Animal
Birla Planetarium
Victoria Memorial
Haus Tumbuna Bilong India
Wara Hugli
Raunwara i gat sol
Dum Dum Ples Balus Intenesenel
[Kredit Lain]
Mountain High Maps® Copyright © 1997 Digital Wisdom, Inc.
[Piksa long pes 13]
Saiens Siti
[Piksa long pes 14]
Viktoria Memorial
[Piksa long pes 15]
Maket i gat planti manmeri long en
[Piksa long pes 15]
Man i katim gras bilong ol man arere long rot