Pas Bilong Ol Man
Sik TB Mi amamas long ol stori “Sik TB—Samting i Kilim Man i Dai i Kamap Strong Gen.” (Janueri 8, 1998) Mi bin kisim sik TB long 1988 na mi kamap orait gen. Yupela i tok stret, ol sikman i mas kisim marasin long olgeta taim “na em i no ken lusim wanpela marasin.”
Y. L., long Frans
Tambu mama bilong mi i no meri bilong tingim lotu, em i lukim dispela nius long tebol bilong mi na em i kaunim. Em i askim mi, inap em i kisim dispela nius i go long haus bilong em. Mi inap tilim 2-pela narapela Kirap! long em. Tenkyu long hatwok yupela i mekim bilong wokim ol wan wan nius.
L. N., long Amerika
Mi bin kisim sik TB 11-pela yia i go pinis. Ol tok yupela i kamapim i stret tru. Taim mi kaunim dispela nius sampela taim mi pilim olsem mi pilim gen ol samting i painim mi taim mi gat dispela sik. Mi tenkyu long Jehova long laip em i givim yumi na ol gutpela tok yumi kisim long olgeta taim long Kirap! bilong lukautim skin bilong yumi.
G. B., long Itali
Mi kisim dispela sik na inap 6-pela mun mi bin kisim marasin. Stori yupela i kamapim i helpim mi long kisim sampela save moa long dispela sik i save kilim man i dai. Na bikpela samting moa, em i helpim mi long bilip strong olsem Kingdom bilong God i rot bilong pinisim dispela hevi long olgeta hap bilong graun.
P. P., long Indonisia
Stori Bilong i Stap Bilong Man Dispela stori “Man i Baim Samting Em i Tok Stret Long Olgeta Taim” i kirapim tru bel bilong mi. (Janueri 8, 1998) Wei Tung Chin i gat 6-pela pikinini; na mi tu. Aiwara bilong mi i pundaun taim mi kaunim stori bilong em. Mi save em i amamas long ol pikinini bilong em na famili bilong ol. Fopela pikinini bilong mi ol i no kamap Kristen yet. Ating wanpela taim long bihain bai mi tu inap kisim kain amamas olsem em i kisim.
E. H., long Amerika
Ol stori bilong i stap bilong ol man long Kirap! i save strongim mi tru. Mi pilim tru stori bilong Wei Tung Chin. Yumi ken amamas tru olsem Jehova i bungim ol gutpela manmeri olsem i stap insait long lain bilong em!
I. T., long Jemani
Mosko Tenkyu long stori “Mosko—Ol i Makim 850 Yia Bilong En.” (Janueri 8, 1998) Pasin bilong ol Rasia long mekim gut long man na mekim pasin pren long em, ol i save mekim moa yet. Mi yet mi bin lukim dispela pasin long 1989, taim 3,000 manmeri bilong Rasia i kam long wanpela kibung Kristen long Polan. Long laspela pes bilong dispela nius, i gat piksa bilong wanpela sista bilong Rasia i autim tok long wanpela ples long Rasia na dispela tu i kirapim bel bilong mi. Jehova yet i ken mekim na bai planti manmeri moa i save tok Rasia bai ol i kirap long lotuim em!
I. L., long Jemani
Pasin Sodom Man! Mi amamas tru taim mi kisim Kirap! bilong Disemba 8, 1997, i gat stori “Baibel i Tok Wanem? Ol Kristen i Mas Birua Long Ol Man i Mekim Pasin Sodom?” Yupela i raitim gut tru na kolim stret ol tok long dispela samting yumi mas tingting gut taim yumi laik toktok long en.
L. W., long Amerika
Les Long Wok Mi givim wanpela nius i gat stori “Olsem Wanem? Yu Les Long Wok Bilong Yu?” long bos bilong mi. (Janueri 8, 1998) Long de bihain long moningtaim long ples wok em i tokim mi olsem dispela nius i gutpela tru. Em i givim long sampela wanwok bilong mi na wanpela em i putim long rum bilong malolo. Nius bilong yupela i kam long taim stret!
V. L., long Amerika
Tenkyu long ol dispela gutpela tok. Mi gat 17 krismas na mi save wok mani olgeta de. Dispela stori i givim gutpela tok long olsem wanem mi inap kisim amamas moa long wok bilong mi. Tenkyu tru!
E. A., long Itali
Tenkyu tru long dispela stori. Nau mi stap long namba 2 yia bilong mi long lain long wok na mi bin les tru, mi no amamas moa long wok bilong mi. Dispela stori i helpim mi long painim amamas gen long wok bilong mi.
I. F., long Jemani