Klos Yumi Pasim—Em i Bikpela Samting?
“MI NO save bai mi pasim wanem klos!” Ating yu tu yu harim kain tok olsem, a? Ol stua bilong klos i gat stail, oltaim ol i amamas long helpim yu—o long paulim yu moa yet long ol nupela bilas bilong ol.
Na ating yu hatwok moa long tingim wanem kain klos bai yu pasim, long wanem, long nau ol i no kirapim yumi long bilas gut, ol i kirapim yumi long bilas olsem yumi malolo o raun tasol. Wanpela nius i stori long bilas, em i stori long dispela pasin bilong ol man long nau long bilas kranki na i tok: ‘Yumi ken amamas long save olsem em i orait sapos bilas bilong yumi i luk olsem olpela, na kala bilong en i laik pinis, na em i kain bilas ol man i gat bikpela laik long en.’
Tru tumas, nau long dispela taim ol toksave bilong grisim ol manmeri long baim klos, na bihainim pasin bilong sampela lain bilong televisen, na wanlain bilong ol, na ol i mas tingim ol yet, na strongpela laik long ol narapela i mas laikim ol—olgeta dispela samting i bin mekim bikpela wok long stiaim tingting bilong ol manmeri long ol klos ol bai pasim, na ol dispela samting i gat bikpela strong moa long stiaim ol yangpela. Na sampela bilong ol, ol i save stil bambai ol i ken pasim klos i gat stail.
Planti bilas bilong nau em planti i save laikim, em bilas bilong ol lain bilong sampela yia i go pinis, olsem ol hipi. Long hap bilong Wes namel long 1960 na 1970 samting, ol hipi i gat strongpela tingting long sampela samting. Mausgras, na pasin bilong ol olsem ol i no kom gut o bilas gut, dispela i makim olsem ol i givim baksait long ol gutpela pasin na lo bilong bipo. Tasol dispela bilas bilong pasin bikhet, em i kirapim nupela pasin ol man i ting ol i mas bihainim na ol wanlain i strong long ol i mas bihainim dispela nupela pasin.
Long nau ol man i save mekim bikpela wok long bilas bilong kamapim tingting na pasin bilong ol. Bilas i olsem mak bilong ol. Klos, olsem T-siot samting, ol i bin kamap olsem samting bilong toksave long wanpela spot na man i gat nem long spot, o samting bilong lap long en, o bel hevi long en, o kirapim man long pait, o mekim pasin sem samting, o baim samting bilong kampani. Sampela T-siot i gat tok o piksa nogut inap mekim man i kirap nogut long en. Tingim het-tok bilong wanpela nius: ‘Pait na Bagarapim Ol Man Em Stail Bilong Yangpela.’ Nius i stori long wanpela yangpela i gat 21 krismas na em i toktok long T-siot bilong em, olsem: ‘Mi save pasim dispela T-siot, long wanem, dispela i toksave long ol manmeri olsem mi kros o mi amamas. Mi no save larim wanpela i tokim mi long samting mi mas mekim—ol i mas larim mi.’—Newsweek.
Piksa o tok samting i stap long poret o baksait bilong T-siot bilong ol man i no wankain. Tasol pasin bilong i stap wankain—long wanpela lain o long bihainim pasin bilong planti man long bikhet, o tingim ol yet tasol, o sakim lo na i no sem liklik, o pait na bagarapim man—dispela i stap ples klia. Wanpela man bilong wokim klos, em i save sutim katres long klos bilong kamapim ol hul hul long laik bilong man i baim. Em i tok: “Ol i ken makim wanem kain hul ol i laikim—hul bilong hangan, hul bilong masket, o hul bilong masin-gan. Em wanpela kain stail tasol.”
Bilas i Kamapim Wanem Samting?
Jane de Teliga, em wanpela meri i save lukautim ol klos long wanpela haus tumbuna (Powerhouse Museum) long Sidni, Ostrelia, em i tok: ‘Klos i olsem mak bilong kamapim klia olsem yu wanbel wantaim wanpela kain lain. Yu makim wanem lain yu laik wanbel wantaim na pasim klos i makim dispela lain.’ Wanpela savemeri long Yunivesiti Sidni, em Dianna Kenny, em i tok, klos i bikpela samting olsem lotu, bikpela mani, wok mani, lain, skul, na ples i bikpela samting, long wanem, klos i makim olsem yu insait long wanem kain lain. Nius Jet i stori long wanpela skul long Yunaitet Stets em klostu olgeta yangpela i go long en ol i waitskin. Long dispela skul hevi i kamap namel long ol waitskin na blakskin ‘taim ol skulmeri waitskin i tantanim gras bilong ol, na pasim klos i bikpela tumas, na bihainim sampela stail moa bilong ol man i wokim musik rap, long wanem, em ol bilas bilong ol blakskin.’
Na strongpela laik bilong sampela lain i save kamap ples klia long sampela kain musik ol i laikim. Nius Maclean’s i tok: ‘Planti taim, klos sampela i save pasim i stret long musik ol i save laikim. Olsem: Ol lain i save laikim musik rege, ol i save pasim klos i gat kala kala na ol hat bilong ol Jameka, tasol ol lain i save laikim musik rok ol i kolim grans, ol i save pasim wul-hat na siot i gat mak mak.’ Tasol maski ol i pasim wanem kain klos bilong musik grans—klos i hangamap nating, o i olsem ol i malolo o raun tasol, o i olsem ol i no gat ples slip, o i olsem ol i stap rabis—ol inap tromoi bikpela mani bilong baim dispela kain klos.
Wanem Samting i Painim Ol Lo Long Klos?
Wanpela niusman (Woody Hochswender) i tok: ‘Ol samting i narapela kain tru long samting yumi ting i stret. Bipo, ol strongpela lo i bosim bilas bilong ol man, tasol nau i olsem i no gat lo. I olsem man i mas bilas kranki stret.’ Tasol long sampela lain o ples, dispela pasin bilong bilas kranki inap makim olsem man i no tingim wanpela samting, o em inap makim olsem em i no amamas long em yet o ol narapela.
Wanpela nius i stori long tingting bilong ol sumatin long ol tisa, na i tok: ‘Maski tisa i save pasim trausis olsem jins em i olsem tisa bilong amamasim ol sumatin long klasrum, ol sumatin i no tingim tumas tok bilong em taim em i kamapim tingting bilong em, na planti sumatin i makim em olsem tisa i no gat save liklik.’ Wankain nius i tok, ‘ol sumatin i ting wanpela tisa meri i pasim trausis olsem jins em i olsem tisa bilong amamas, na ol i no pret long toktok wantaim em, na em i no gat planti save, na ol i no daun tumas long em, na em i no luk olsem wanpela tisa. Tasol planti sumatin i laikim dispela kain tisa.’—Perceptual and Motor Skills.
Na long ol wok bisnis na kampani samting, i gat narapela kain bilas, olsem bilas bilong pulim ai bilong ol man long ples wok. Nau long dispela taim, planti meri moa i laik kisim wok i gat namba. Marie, em i wok olsem supavaisa long wanpela kampani bilong wokim ol buk samting, em i tok: ‘Mi save mekim gut skin bilong mi na ol man i ken save mi meri i gat nem. Taim ol i lukim mi, mi laik ol i mas save mi meri i gat namba. Mi laik luk olsem meri i gat stail na i smat tru.’ Marie i no giaman—em i kamapim klia olsem em i tingim em yet.
Ol klos i gat stail, ol i kamap long ol haus lotu tu. Sampela i save tingim tru klos bilong ol, ol i save go lotu bambai ol i ken hambak long ol nupela klos bilong ol. Tasol long nau, ol pris pasto—em ol i pasim longpela klos—ol i sanap long haus lotu na lukluk long lain bilong ol, em planti bilong ol i pasim trausis jins, su bilong pilai spot, o klos i narapela kain stret.
Bilong Wanem Ol i Tingting Strong Long Ol Yet?
Ol saveman bilong skelim tingting i tok, klos i narapela kain stret—olsem klos planti yangpela i save pasim—em i makim pasin bilong tingim ol yet, long wanem, dispela kain klos i bilong pulim ai bilong ol man. Ol saveman i tok, dispela ‘em pasin bilong yangpela long pulim ai bilong ol narapela i kam long em yet.’ I olsem yangpela man o meri i tok: “Mi ting, yu tingting strong long mi olsem mi save tingting strong long mi yet.”—Nius American Journal of Orthopsychiatry.
Ol tingting olsem man em i nambawan na God em i samting nating i bin kirapim wanpela kain tingting na planti taim ol wok bisnis i as bilong en. Olsem: Yu nambawan bikpela man long graun. Sapos olsem, i gat klostu 6 bilion bilong ol dispela man ol i ting ol i ‘nambawan bikpela’ man long graun. Planti milion manmeri long ol lotu i holim nating nem Kristen, ol tu i bin pundaun long dispela pasin bilong tingim tumas ol samting bilong skin na ol i wok strong long ‘kisim planti gutpela samting bilong nau.’ (Skelim wantaim 2 Timoti 3:1-5.) Na tu, planti famili i wok long bagarap, na pasin bilong narapela i laikim tru narapela i wok long pinis, na yumi no kirap nogut long save planti yangpela i wok strong long stap olsem man i gat nem na long pilim olsem ol i no stap wanpis tasol.
Tasol ol lain i save tingim bilas na i stap bilong ol long ai bilong God, ol i gat askim olsem: Bilas bilong ol man i wok long senis, olsem na i go inap long wanem mak mi mas bihainim pasin bilong ol long bilas? Olsem wanem mi ken save klos bilong mi i stret? Klos bilong mi i mekim na ol man i kisim tupela tingting o tingting kranki long mi?
Mi Pasim Klos i Stret?
Em laik bilong yumi wan wan yet long makim wanem kain klos yumi bai pasim. Yumi olgeta i no laikim wankain klos tasol, na i stap bilong yumi long mani i no wankain. Na pasin bilong ol man i kain kain long narapela narapela hap na kantri. Tasol maski yu gat wanem kain sindaun, yu mas tingim dispela tok: “Olgeta samting i kamap long dispela graun, i save kamap long taim bilong em yet.” (Saveman 3:1) Olsem na yu mas pasim klos i stret long samting yu laik mekim o hap yu laik i go long en. Na tu, ‘daunim tingting bilong yu yet na bihainim God wanpela tasol.’—Maika 6:8.
Dispela i no makim olsem yu no inap bilas gut, nogat, tasol yu mas pasim gutpela klos inap tasol long yu na i kamapim stretpela tingting bilong yu. (1 Timoti 2:9, 10) Bilong mekim olsem, planti taim yu mas bosim gut laik bilong bel. Nius Working Woman i tok, pasin bilong bosim gut laik bilong bel i save poromanim pasin bilong makim gutpela bilas na bilas i luk naispela. Wanpela gutpela tingting i olsem: Yu no ken bilas kranki o bilas tumas na taim yu wokabaut i go insait long wanpela rum bilas bilong yu i pulim ai bilong ol narapela. Nius i tok moa: ‘Bilas bilong yu i mas mekim na ol man i no lukim bilas bilong yu tasol, nogat, ol i lukim ol gutpela pasin bilong yu.’
Wanpela nius (Perceptual and Motor Skills) i tok: ‘Planti buk i save skelim wok bilong klos long kamapim pasin na tingting bilong man i pasim dispela klos olsem em i wanem kain man, ol dispela buk i kamapim klia olsem klos i bikpela samting taim ol man i skelim pasin bilong man ol i bin bungim em long namba wan taim.’ Wanpela meri i gat 43 krismas samting, bipo em i amamas long bilas bilong em i gat strong long pulim ai bilong ol man, em i tok: ‘Dispela i bin kamapim ol bikpela hevi long mi, long wanem, pasin bilong mi long bilas i mekim na mi hatwok long save olsem wok mani bilong mi i narapela na sindaun bilong mi i narapela o nogat. Long olgeta taim, ol man i mekim wok bisnis wantaim mi, ol i laik kisim mi i go long haus kaikai.’ Wanpela meri i stori long narapela kain pasin long ples wok bilong em, olsem: ‘Mi lukim pasin ol man i save mekim long ol meri i pasim klos i olsem ol i malolo o raun tasol o pasim klos olsem bilong man. Ol man i ting ol i meri i gat strongpela pasin na ol i redi long kamapim dispela pasin bilong ol. Ol man i save mekim wok bisnis wantaim ol dispela meri ol i no save tingim gut ol.’
Yangpela meri Jeffie i bin katim gras bilong em long narapela kain stail, tasol dispela i givim tingting kranki long ol narapela. Em i tok: “Mi ting gras i ‘narapela kain’ stail tasol. Tasol bihain ol man i askim mi, ‘Tru, yu wanpela Witnes Bilong Jehova?’ na mi sem pipia long dispela.” Jeffie i gat wok long skelim gut bel bilong em. Tru tumas, “kain tingting i pulap long bel” i no save kamap long maus bilong yumi tasol, nogat; em i kamap ples klia long klos na pasin bilong yumi tu. (Matyu 12:34) Bilas bilong yu i kamapim wanem samting? Bel bilong yu i laik litimapim nem bilong Man i bin wokim olgeta samting o yu laik litimapim yu yet?
“Tingting Stret” na Bilas
Tingim tu ol samting klos bilong yu i save mekim long yu. Pasin bilong bilas tumas o bilas bilong pulim ai bilong ol man inap mekim na yu ting yu samting tru, o sapos yu no mekim gut skin bilong yu, dispela inap strongim sampela tingting kranki yu holim long yu yet. Na ol T-siot i toksave long wanpela man bilong piksa wokabaut o spot samting yu save laikim, dispela inap kirapim yu long litimapim tru nem bilong em olsem wanpela god. Tru tumas, klos bilong yu i kamapim pasin na tingting bilong yu long ol narapela—ol inap save yu wanem kain man o meri.
Sapos yu bilas tumas bilong pulim ai bilong ol narapela o bilong kirapim bel bilong ol, klos bilong yu i kamapim wanem kain pasin bilong yu? Olsem wanem? Yu strongim sampela pasin em mobeta yu wok long lusim? Na yu wok long pulim wanem kain man? Tok bilong Rom 12:3 i ken helpim yumi long daunim pasin bilong tingim yumi yet tasol, na ting yumi samting tru, na tingting kranki long yumi yet. Long dispela ves aposel Pol i tokim yumi long ‘no ken ting save na pasin bilong yumi i winim ol narapela. Nogat. Yumi mas skelim gut ol pasin bilong yumi yet na tingting stret.’ Sapos yumi “tingting stret” yumi save bihainim gutpela tingting na pasin.
Dispela i bikpela samting long ol man i holim wok i gat namba na ol man i bilip long ol. Pasin bilong ol i gat bikpela strong long stiaim tingting bilong ol narapela. Olsem na bilong ol man i laik holim wok insait long kongrigesen Kristen na meri Kristen bilong ol, bilas bilong ol tu i mas kamapim klia olsem ol i gat gutpela tingting. Yumi no laik tru long stap olsem dispela man Jisas i stori long em long tok piksa bilong kaikai bilong marit, olsem: “King i go insait bilong lukim ol [manmeri]. Na em i lukim wanpela man i no bin putim kain gutpela klos ol i save putim long de bilong marit.” Taim em i kisim save olsem i no gat as na dispela man i bilas kranki, “king i tokim ol wokman olsem, ‘Yupela pasim lek han bilong en na tromoi em i go ausait.’ ”—Matyu 22:11-13.
Olsem na toktok na pasin bilong ol papamama em i bikpela samting bilong kirapim pikinini bilong ol long kisim gutpela tingting long klos bilong ol. Ating sampela taim papamama i mas strong taim ol i toktok gut wantaim pikinini man o pikinini meri bilong ol. Tasol yumi amamas tru taim yumi harim gutpela tok long stretpela pasin na gutpela bilas bilong ol yangpela bilong yumi na bilong yumi yet, a?
Tru tumas, ol wokboi bilong Jehova i no kalabus moa long ol klos i narapela kain stret na i gat bikpela pe, na long ting olsem ol i samting tru, na tingting oltaim long ol yet, nogat. Ol i gat ol lo bilong God bilong stiaim ol, tingting nogut bilong dispela graun i no stiaim ol, nogat. (1 Korin 2:12) Sapos yu bihainim ol dispela lo, yu no ken hatwok long makim klos bilong yu. Nogut klos bilong yu i haitim o daunim ol gutpela pasin bilong yu. Na sapos yu wok strong moa long bihainim ol pasin bilong God, orait bai yu wok strong moa long kisim ol gutpela samting bilong spirit em samting ol bilas bilong yu i no inap kamapim.