Sampela Tok i Kam Long Olgeta Hap
Pilai Soka na Ol Pait
Ol tim i insait long resis bilong pilai soka long Wol Kap long yia i go pinis, ol i resis na dispela i kirapim ol man long mekim ol pati bilong amamas, tasol planti taim pait i kirap long ol dispela pati. Long Meksiko, ol i singautim inap 1,500 polis long bosim lain man i laikim tim bilong Meksiko. Wanpela nius bilong Meksiko (El Universal) i tok, polis i holim inap 200 manmeri. Long taim ol i pait, wanpela i tromoi paura i pairap long pes bilong wanpela yangpela man, na dispela i bagarapim hap bilong het bilong em. Long Ajentina, Beljam, na Brasil tu, ol pati bilong amamas i go nogut, na dispela i mekim na sampela i kisim bagarap na polis i holim sampela. Wanpela nius (Excelsior) bilong Meksiko Siti i tok, long Frans long taim bilong Wol Kap, polis i holim inap 1,000 manmeri, na ol i tambuim inap 1,586 manmeri long kam bek long dispela kantri.
Nupela Vairas Long Blut
Nius Le Monde bilong Frans i tok, taim ol i painim wanpela nupela vairas long blut bilong ol man bilong Yurop i save givim blut bilong ol long haus sik samting, lain bilong helt long Frans i laik kamapim wanpela ‘lain saveman i save was oltaim long ol samting bilong dispela vairas.’ Ol i kolim dispela vairas olsem TTV (transfusion transmitted virus), na namba wan taim ol i kisim save long en em long Japan long 1997. Long Japan inap 10 pesen bilong ol man i save givim blut bilong ol long haus sik, ol i gat dispela vairas. Ol dokta i no save yet long ol sik samting dispela vairas bai kamapim, tasol save ol i kisim long Briten i kamapim klia olsem inap 25 pesen bilong wanpela lain man i gat bikpela sik long lewa ol i no save long as bilong en, ol i gat vairas TTV. Nius Le Monde i tok, long nau ol dokta i no save glasim blut bilong ol man bilong painim dispela vairas.
Magnet Bilong Pis
Olsem wanem pis ol i kolim renbo traut em i save long rot bilong stiaim raun bilong en? Nius New Scientist i tok, ol saveman bilong Nu Silan ol i kisim save olsem, ol dispela pis i gat ‘wanpela kain strong long nus bilong ol i wok olsem magnet.’ Planti pisin na snek samting, na sampela animal, ol inap stiaim wokabaut bilong ol long rot bilong wanpela kain strong i stap long graun na i pulim ol samting. Tasol ol saientis i no bin kisim save long ol sel insait long skin bilong ol pis i save stiaim rot bilong ol long i go long hap not. Ol i ting ol dispela sel i gat marasin magnetait insait long en. Ol saveman long Yunivesiti Bilong Oklan, ol i kisim save olsem, long pes bilong pis traut i gat wanpela kain rop wailis i save meknais taim dispela strong i stap long graun em i holim dispela rop wailis. Ol i glasim pis na kisim save olsem, rop wailis long nus bilong pis i gat ol sel em marasin magnetait i stap insait long en.
Ol i No Luksave Long Popaia Bilong Ol Long Baibel
Nius Bible Review i tok: “Taim ol i prinim ol Baibel namel long yia 1600 i go inap long yia 1799 samting, planti taim liklik ol i mekim sampela popaia, tasol dispela i no makim olsem ol i ting em i liklik samting tasol.” Olsem: Long taim Sals Namba Wan i mekim wok king, ol i prinim wanpela Baibel i kisim nem olsem Baibel Longlong. Ol man i prinim dispela Baibel, ol i popaia na senisim wanpela tok long Song 14. Olsem na namba wan ves i tok: ‘Longlong man i save tok long em yet olsem, i gat God i stap.’ Dispela popaia i mekim na ol i mas tromoi inap 12,000 kina bilong baim kot. Long yia 1631, wanpela narapela kampani (Barker and Lucas) i mas tromoi inap 1,200 kina bilong baim kot, long wanem, ol i rausim wanpela tok long Baibel ol i kolim olsem Baibel Pamuk. Dispela i mekim na bisnis bilong ol i bagarap. Baibel bilong ol i tok: ‘Yu mas mekim pasin pamuk.’ Na Baibel Mekim Sin Gen bilong yia 1716 i wankain. Long wanpela ves Jisas i tokim man em i bin oraitim sik bilong em olsem “yu no ken mekim sin gen,” tasol dispela Baibel i tok “mekim sin gen.” Na yumi no ken lusim tingting long Baibel Viniga, em ol i wokim long yia 1717. Het-tok i stap antap long Luk sapta 20 i tok olsem: “Tok Piksa Bilong Gaden Wain.” Tasol ol i popaia na raitim dispela tok olsem “Tok Piksa Bilong Viniga.”
Ol Pikinini na Kofi
Nius The New York Times i tok, maski ol pikinini i no save dring kofi o ti, planti bilong ol i save kisim marasin kafin long rot bilong ol kol dring na sokolat dring, na sapos ol i lusim ol dispela kain dring, skin bilong ol bai krai long en. Dokta Gail A. Bernstein bilong wanpela yunivesiti (University of Minnesota Medical School), em i go pas long wanpela lain dokta long skelim 30 skulmanki na hamas minit ol dispela skulmanki inap putim tingting bilong ol long ol tok taim ol i bin kisim marasin kafin. Ol i apim mak bilong marasin kafin ol pikinini i kisim, na dispela i olsem ol i bin dring inap 3-pela tin koka kola long olgeta de. Bihain long wanpela wik, ol pikinini i no kisim marasin kafin inap wanpela de. Long dispela de stret na inap 7-pela de bihain long en, ol i kisim save olsem ol skulmanki i no inap putim gut tingting bilong ol long ol tok. Dispela lain dokta i tok: “Nambawan rot long abrusim dispela hevi i olsem: Ol pikinini i no ken dring planti dring i gat marasin kafin long en.”
Polis i Raun Long Su i Gat Wil
Ol polis long Not Amerika ol i laik pas gut moa wantaim ol man i stap long ol hap ol i raun long en, olsem na sampela polis ol i pasim su i gat wil. Nius The Toronto Star i tok, sampela polis ol i save wokabaut long lek, o raun long hos o wilwil taim ol i raun mekim wok bilong ol. Ol polis i save mekim wok long su i gat wil long ol biktaun olsem Sikago, Maiami, na Montriol. Wanpela bilong ol polis i go pas long mekim wok long su i gat wil, em Saiden Bill Johnston bilong lain polis Fort Lauderdale, na em i tok: ‘Kirap long taim mipela i kirap mekim wok long ol dispela kain su, ol man i orait long en. Taim mipela i pasim su i gat wil, i olsem mipela i wankain olsem ol narapela man, na ol i no pret long kam toktok wantaim mipela.’ Nius The Toronto Star i tok, ‘taim polis i raun long su i gat wil, dispela i helpim wok bilong ol. Olsem: Ol man i stilim ka long ples bilong putim ka, ol i save kirap nogut taim polis i kam wantu tasol.’
Han Bilong Yu na Ol Sik
Nius The Medical Post bilong Kanada i tok: “Taim wanpela man i kus na karamapim maus long han bilong em, o em i rausim kus long nus, em i mas wasim han bilong em paslain long em i holim telefon o han bilong dua.” Nius The Post i kamapim tok bilong wanpela lain (U. S. Association for Professionals in Infection Control and Epidemiology) na ol i tok, “planti sik kus (80 pesen) i save kalap long ol narapela man long rot bilong han na taim yumi holim wanpela samting—long rot bilong win nogat.” Dokta Audrey Karlinsky bilong Yunivesiti Bilong Toronto em i tok, em i gutpela long wasim han planti taim na rapim sop long han “10 i go inap long 15 sekon, na wasim gut namel long ol pinga na aninit long kapa.” Em i tok, bihain long dispela, yu mas wasim han bilong yu long hatwara na mekim wok long wanpela hap pepa bilong draim han bilong pasim tep. Yu ken mekim wanem bambai ol pikinini i wasim han inap longpela taim olsem? Dokta Karlinsky i tok, tokim ol long kolim ABC taim ol i rapim sop long han.
Bebi—Bikpela Amamas na Bikpela Wok Moa!
Wanpela nius (Nassauische Neue Presse) bilong Jemani i tok: “Planti yangpela marit ol i no save tingim bikpela wok moa ol bai kisim taim ol i kamapim wanpela pikinini. Planti taim dispela i mekim na taim mama i karim pinis pikinini, ol marit i save pait.” Wanpela ripot bilong Yunivesiti Bilong Groningen, long Netelan, i kamapim klia olsem ol yangpela mama ol i no amamas, long wanem, taim ol i karim pikinini, dispela i senisim tru i stap bilong ol. Long olgeta wik, planti mama i mas lusim 40 aua moa long lukautim pikinini—ol i lusim 6-pela aua bilong mekim sampela wok moa bilong klinim haus, wasim laplap, na kukim kaikai, na ol i lusim 34 aua bilong lukautim pikinini yet. Ol papa i lusim 17 aua tasol bilong lukautim pikinini antap long ol narapela wok bilong ol. Ripot i tok, ol marit i no save tok pait long “husat bai senisim nepi, o kirap long biknait na givim botol susu long bebi, nogat; ol i tok pait long husat bai mekim wanem wanem wok bilong haus.”
Guria i Kamap Long San
Savemeri Valentina Zharkova bilong Yunivesiti Bilong Glasgo long Skotlan, na saveman Alexander Kosovichev bilong Yunivesiti Bilong Stanfot long Kalifornia, ol i glasim ol piksa roket Soho bilong wanpela lain (European Space Agency) i bin kisim long ples antap. Em i namba wan taim bilong ol long lukim guria i kamap long san. Wanpela nius (The Daily Telegraph) bilong Landon i tok: ‘Dispela guria i kamap bihain long taim ges haidrojen na ges hilium i pairap wantaim antap long skin bilong san. Ol i luksave long dispela guria long Julai 1996.’ Em i strongpela guria tru, mak bilong en i olsem 11.3, na em i mekim ges i stap long skin bilong san i kamap olsem biksi i go antap inap 3-pela kilomita, na i meknais wankain olsem liklik raunwara taim man i tromoi ston long en. Dispela ges i meknais na i ran i go inap 120,000 kilomita antap long skin bilong san na i spit inap 400,000 kilomita insait long wanpela aua. Dispela guria i kamap long san, em i kamapim bikpela paua. Bikpela bilong en i wankain olsem paua Yunaitet Stets i save mekim wok long en insait long 20 yia, na em i winim strong bilong guria i bin kamap long San Fransisko long 1906, inap 40,000 taim. Mak bilong dispela guria i bin kamap long San Fransisko i olsem 8.3 long skel Rikta.
Televisen na Ol Bagarap
Ol pikinini i save lusim bikpela hap taim long lukim televisen, ol inap traim bihainim ol narapela kain samting ol i lukim ol man long televisen i mekim, na ol inap kisim bagarap long en. Ripot bilong wanpela dokta bilong Spen, em José Umberos Fernández, i tok, olgeta wan wan aua pikinini i lusim bilong lukim televisen, dispela inap mekim na planti bagarap moa i painim dispela pikinini. Fernández i ting dispela i save kamap, long wanem, televisen i no save stori long ol samting tru i save painim ol man. Ol papamama i ken mekim wanem bambai televisen i no ken giamanim ol pikinini? Niuspepa To Vima bilong kantri Grik i tok, ol papamama i mas helpim ol pikinini long makim wanem program ol bai lukim, na helpim ol long ‘skelim gut’ ol samting ol bai lukim, nogut ol i ting olgeta samting ol i lukim em i samting i save kamap tru.