Pas Bilong Ol Man

Ol Laion  Tenkyu tru long stori “Ol Laion​—⁠Ol Bikpela Pusi Bilong Afrika.” (Februeri 8, 1999) Dispela stori i bikpela samting tru long mi, long wanem, inap planti yia mi laikim ol laion. Mi laikim ol tumas, long wanem, ol i naispela na ol i no save pret long wanpela samting. Wanpela taim bihain, mi laik i stap wantaim “ol yangpela laion.”​—⁠Aisaia 11:​6-9.

E. A. S., long Brasil

No Gat Papamama  Tenkyu tru long kamapim wanpela gutpela stori, “Ol Yangpela i Laik Save . . . Olsem Wanem Mi Inap i Stap Gut Sapos Mi No Gat Papamama?” (Janueri 8, 1999) Dispela stori i helpim mi na mekim gut bel bilong mi olsem Jehova i gat save long lukautim mipela ol yangpela sapos papamama bilong mipela i dai. Papamama bilong mi i no dai yet tasol mi save tingting, wanem samting bai painim mi sapos tupela i dai. Stori bilong Horacio i bin strongim mi tru.

M. J., long Trinidat

I Stap Wanpela Tasol  Dispela stori “Baibel i Tok Wanem? I Stap Wanpela Tasol, i Gat Gutpela Samting Bilong En.” (Oktoba 8, 1998), em i stret tru long mi. Pasin bilong i stap wanpela tasol em i bikpela samting bilong helpim mi long stap gut long ol samting bilong spirit na bel. Tasol mi bai tingim dispela tok olsem, pasin bilong i stap wanpela tasol “inap longpela taim, em i no gutpela na yumi inap kisim nogut long en.”

L. G., long Amerika

Ol Misineri i Gat Strongpela Bel  Bihain long mi kaunim pinis stori, ‘Mipela i No Tingting Moa Long Mipela Yet na Wokabaut.’ (Novemba 8, 1998), mi laik tok tenkyu long dispela gutpela stori bilong strongim bilip bilong mipela. Hia long Briten, planti man i no laik harim tok bilong mipela. Tasol dispela i no wanpela bikpela hevi olsem hevi Jack na Linda Johansson i bin karim. Mi pilim tru dispela stori na dispela i mekim mi i amamas tru long sindaun bilong mi.

L. J., long Briten

Inap sampela yia nau mitupela meri bilong mi i mekim wok bilong autim tok long olgeta de, na mipela i save olsem em i hatwok long lain long pasin bilong sindaun long wanpela nupela hap. Jack na Linda i bin tokaut stret long tingting bilong tupela long dispela samting. Stori bilong tupela i soim mitupela olsem ol samting mipela i pilim i no narapela kain, na mipela i mas wok yet long wetim Jehova i helpim mipela.

S. E. C., long Brasil

Pilim Tok i Tru  Mi gat 12-pela krismas na mi bin amamas tru long ritim stori “Ol Yangpela i Laik Save . . . Olsem Wanem Mi Yet Inap Pilim Tok i Tru?” (Novemba 8, 1998) Nau skul i kirap pinis, olsem na i hatwok liklik long redim ol samting bilong ol miting Kristen. Tasol mi mas makim hap taim bilong mekim olsem. Mi ting olsem dispela stori bai helpim planti yangpela long laikim tumas Jehova na bai tok i tru i pas strong long tingting na bel bilong ol.

C. S., long Potugal

Sampela yia i go pinis, mi gat wankain tingting long tok i tru. Mi no klia, mi laikim tok i tru o mi stap insait long en, long wanem, famili bilong mi ol i stap long tok i tru. Orait, mi kirap bihainim ol tok bilong yupela​—⁠mi yet i stadi na skelim skelim ol tok bilong Baibel na long dispela rot mi pilim tok i tru. Nau mi amamas long tok olsem mi pilim tok i tru. Mi tingting nau long mekim wok painia!

H. N., long Amerika