Ol i Strong Long Ol i No Ken Les
LONG Kirap! bilong Novemba 8, 1998, i gat sotpela stori long Matt Tapio, em manki i gat 17 krismas na longpela taim liklik em i gat sik kensa. Het-tok bilong stori: “Em i No Les.” Matt i dai long Epril 19, 1998, taim mipela i redim stori bilong em.
Dispela stori i bin kamapim tok Matt i bin mekim taim ol i givim sampela askim long em na putim ol dispela tok long kaset, na pilaim kaset long taim bilong wanpela miting bilong ol Witnes Bilong Jehova. Ol yangpela i bin ritim stori bilong em ol i pilim tru dispela tok. Mipela bai kamapim nau tingting bilong sampela.
Deseree i gat 20 krismas na em i bilong Kanada. Em i raitim pas na stori long samting pasin bilong Matt long laikim tru Jehova i bin mekim long em na long poroman bilong em, em tupela i save autim tok wantaim long olgeta de. Em i tok: “Mipela i kirap long krai. Mipela i krai inap sampela minit samting. . . . Yumi olgeta, na moa yet ol yangpela, yumi ken bihainim pasin bilong Matt na ‘wok strong nau inap long skel bilong yumi! . . . Maski wanem samting i kamap, yumi no ken tru lusim wok bilong autim tok long Jehova’! ”
Erin i kam long Kentaki, Yunaitet Stets, na pas bilong em i tok: “Mi krai taim mi ritim stori bilong em. Mi gat 16 krismas na mi no gat sik, na taim rot i op yet, mi laik mekim bikpela wok bilong Jehova bambai bihain taim Matt i kirap bek, mi yet mi ken tokim em olsem stori bilong em i bin kirapim mi tru long mekim wok bilong Jehova.” Maria i gat 15 krismas na em i kam long Teksas, Yunaitet Stets, em i kamapim wankain tok: “Mi tingting strong long mekim olgeta samting mi inap mekim long wok bilong Jehova, taim bikpela sik i no kisim mi yet. Tok bilong Matt i bin helpim mi tru.”
Jessica i kam long Saut Karolaina, Yunaitet Stets, em i tok: “Mi gat 13 krismas, na pasin bilong narapela yangpela long givim bel na laikim tru Jehova i kirapim mi tru. Mi ritim stori long sik bilong Matt Tapio, na dispela i mekim na mi save olsem em wanpela gutpela samting tru mi no gat sik. Mi putim nem bilong Matt long lista bilong mi i gat nem bilong ol brata na sista mi laik sekanim ol long nupela taim!”
Sara i kam long San Severino Marke, Itali, em i tok: “Dispela stori i kirapim mi long krai. Mi gat 17 krismas, wankain olsem Matt. Mi no gat sik, olsem na mi no laik lusim pasin bilong toktok long Jehova, olsem Matt i no bin lusim, maski em i karim bikpela hevi tru winim ol narapela hevi long i stap bilong em. Tenkyu tru long kamapim ol kain stori olsem, em ol stori i save kirapim mipela long givim taim, na strong, na ol gutpela samting bilong mipela long Jehova.—Saveman 12:1.”
Bilip Long Kirap Bek i Strongim Ol
Maski man i yangpela o lapun, ol samting nogut bilong indai i save painim planti man long nau. Wanpela yangpela i gat 19 krismas, nem bilong em Heidi, em i tok: “Insait long tupela wik i go pinis, tupela man mi save laikim ol tru ol i dai, na bilip bilong mi long lukim ol taim ol daiman i kirap bek, dispela samting tasol i bin helpim mi long karim dispela hevi.
“Mi amamas tru long Matt na long pasin bilong em long strong long autim tok, maski em i gat bikpela sik. Em i gutpela piksa long yumi olgeta i ken bihainim, na mi amamas long wetim taim em bai kirap bek na mi ken holimpas em.”
Wanpela mama, nem bilong em Nancy, em i tok: “Mi ritim dispela stori na mi krai. Pikinini meri bilong mipela, em Rachelle, em i gat buk nogut long kru bilong em, na em i dai long Janueri 11, 1996, inap tupela de paslain long Matt i kisim baptais. Rachelle i gat 6-pela krismas tasol taim em i dai, tasol olsem Matt, Rachelle em i meri bilong winim hevi, na oltaim em i wok strong long mekim pasin Jehova i laikim.
“Em bai gutpela de tru taim Jehova i mekim gut long mipela, na mipela i ken lukim pikinini meri bilong mipela, em skin bilong em i no gat sik, na em inap i stap gut tru. Olsem Jairus na meri bilong em, bai mipela i amamas nogut tru.”—Mak 5:42.
Shannon i kam long Jojia, Yunaitet Stets, em i tok: “Dispela stori i soim mi olsem man inap strong long stap gut long Jehova maski em i gat bikpela sik. Maski mi no gat wanpela bikpela sik na inap long nau mi no bin sik tumas, bai mi putim gut dispela nius bambai mi ken ritim gen bihain.
“Mi laik tok bilong Baibel long kirap bek i ken mekim gut bel bilong papamama bilong Matt. Long 1995, mi tu mi bin kisim hevi taim wanpela bilong famili bilong mi em i dai—em bubu meri bilong mi. Mi amamas tru long save long Jehova, na long save olsem mi inap lukim gen ol famili bilong mi i dai pinis.”
Wanpela yangpela bilong Spen, em i tok: “Papamama bilong mi ol i skulim mi na 4-pela susa bilong mi olsem, em bikpela samting long i go long ol miting Kristen. Tasol taim mi ritim dispela stori, mi kisim save olsem yumi inap go tasol long ol miting na yumi no pilim tru long bel olsem miting i bikpela samting. Mi laik tok amamas long papamama bilong Matt long ol i bin skulim em gut tru long ol samting bilong spirit. Ol i stap olsem gutpela piksa bilong yumi olgeta i ken bihainim. Mi laik ol i mas save olsem, maski em hatwok long karim hevi taim wanpela bilong famili i dai, oltaim Jehova i stap klostu long yumi.
“Mi laik bungim Matt long nupela taim. Mi laik tokim em olsem em i wanpela gutpela piksa tru na mipela olgeta i tingim em long bel bilong mipela. Jehova em i God bilong ol man i stap laip, na nau Matt i stap long wankain hap olsem susa bilong mi—em i bin dai inap 4-pela yia i go pinis—em long tingting bilong Jehova. (Luk 20:38) Matt na susa bilong mi, em Eva, na planti narapela gutpela wokboi bilong God ol i stap long tingting bilong em. Jehova em i gutpela Man tru, na bai em i no inap lusim yumi.”
Tru tumas, tok promis bilong Baibel long ol daiman bai kirap bek em i wanpela gutpela samting tru. Yumi mas holimpas strong dispela bilip, na tingim God long olgeta de na long dispela rot yumi soim olsem yumi pilim tru long bel dispela gutpela tok promis, olsem gutpela pikinini Man bilong em, Krais Jisas, em i bin mekim.
[Piksa long pes 20]
Deseree
[Piksa long pes 20]
Erin
[Piksa long pes 20]
Maria
[Piksa long pes 20]
Jessica
[Piksa long pes 21]
Sara
[Piksa long pes 21]
Heidi
[Piksa long pes 21]
Nancy wantaim man na pikinini meri bilong em, em Rachelle
[Piksa long pes 21]
Shannon