Taim Bilong Tok Gutbai Long Pait

OL MANMERI long olgeta hap ol i laik tru bai i no gat pait moa. Em wanpela samting i no bin kamap yet. Olsem stori i kamap paslain long dispela i soim yumi, planti ol i bilip olsem gutaim inap kamap tasol long rot bilong wanpela gavman bilong bosim olgeta hap, em wanpela gavman i helpim olgeta lain wantaim. Tasol planti ol i save, long laik bilong ol yet ol hetman bilong graun i no ken givim wok bilong ol long wanpela gavman i bosim olgeta man long graun. Olsem wanem? Dispela i makim olsem wanpela gavman bilong bosim olgeta hap i no inap kamap?

Yumi inap ting olsem, a? Tasol tok profet bilong Baibel i soim yumi olsem, wanpela gavman bilong bosim olgeta hap, klostu nau bai kamapim gutaim long graun. Dispela bai i no ken kamap long rot bilong ol gavman i toktok wantaim o long rot bilong ol kontrak ol i wokim, nogat. Daniel i tok profet olsem: “God bai i kirapim wanpela kingdom na dispela kingdom bai i stap oltaim oltaim.”​—⁠Daniel 2:⁠44.

Em dispela Kingdom Jisas i tokim ol lain bilong em long beten long en na planti milion man i save kolim Beten Bilong Bikpela. Ating yu save long dispela beten i stap long Baibel long Matyu 6:​9, 10. Hap bilong dispela beten i tok olsem long God: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” God bai mekim ol samting olsem dispela beten i tok. Klostu nau dispela Kingdom bai “kam” bilong kamapim laik bilong God long graun. Laik bilong God em long mekim olgeta hap i kamap wanpela paradais i gat bel isi long en.

Gutaim Long Olgeta Hap Graun

Olsem wanem? I gat as na yumi ken bilip olsem Kingdom bilong God bai mekim gutpela wok, winim ol gavman bilong man? Tingim 8-pela samting bilong Kingdom bilong God em ol bai mekim na olgeta lain i stap aninit long Kingdom bai stap bel isi i go inap oltaim oltaim.

1. God i makim Krais Jisas olsem gopas bilong dispela Kingdom. Em “King bilong kamapim gutpela sindaun na bel isi” na man i gat biknem pinis. (Aisaia 9:⁠6) Taim em i stap long graun, Jisas i kamapim klia olsem ol lain bilong em ol i no ken holim bainat samting na pait. Em i tokim Pita: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.”​—⁠Matyu 26:⁠52.

2. Kingdom bai stap olsem wanpela gavman bilong bosim olgeta hap. Daniel i tok profet long namba Jisas i kisim, olsem: “Em i kamap king na [God] i givim em strong na biknem. . . . Na olgeta manmeri bilong olgeta kantri na olgeta lain na olgeta tok ples bai i stap aninit long en.”​—⁠Daniel 7:⁠14.

3. Kingdom bai i gat sampela bilong olgeta lain insait long en. Jisas bai i gat ol wanwok, em ol i bilong “olgeta lain man, na bilong olgeta tok ples, na bilong olgeta kain skin, na bilong olgeta kantri,” na ol bai “stap king na bosim ol manmeri bilong graun.”​—⁠KTH 5:​9, 10.

4. Kingdom bilong God bai pinisim ol gavman bilong man, em ol i save sakim namba bilong en long bosim graun. Kingdom bilong God bai “bagarapim ol arapela king [bilong graun] na kingdom bilong en bai i stap oltaim.”​—⁠Daniel 2:⁠44.

5. Wanpela lo bilong olgeta hap bai bosim ol lain bilong graun. Aisaia i tok profet long dispela taim, olsem: “Jerusalem bai i stap ples bilong Bikpela i skulim ol manmeri na autim tok bilong em long ol. Bikpela bai i stretim tok bilong olgeta lain manmeri na bai ol i sindaun gut wantaim.”​—⁠Aisaia 2:​3, 4.

6. Ol man i stap aninit long Kingdom bai lain long ol rot bilong i stap bel isi. Aisaia i tok moa: “Na bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”​—⁠Aisaia 2:⁠4.

7. Ol lain i laikim pasin bilong pait na bagarapim man bai ol i pinis. “Bikpela i save skelim ol stretpela man na ol man nogut. Em i no laikim tru ol man i sakim lo bilong em. Em i kapsaitim hatpela paia moa antap long ol man nogut. Na em i mekim save boinim skin bilong ol. Dispela em i pe bilong ol.”​—⁠Song 11:​5, 6.

8. Ol samting bilong pait bai pinis olgeta. “Kaman! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.”​—⁠Song 46:​8, 9.

Bilip Long Ol Promis Bilong God​—⁠Bilong Wanem na Olsem Wanem?

Baibel i save kamapim planti tok moa long Kingdom bilong God. Olsem: Em i kamapim klia husat bai bung wantaim Krais Jisas long bosim ol samting bilong graun. Na Baibel i tokim yumi long God i makim ol olsem wanem na wanem ol mak ol i mas winim. Na tu, Baibel i kamapim klia olsem wanem Kingdom bai bosim ol samting long graun bambai olgeta lain i ken stap amamas na kisim gutpela sindaun, na dispela bai pinisim pasin bilong bel nogut long narapela na pasin bilong mangal, em planti pait i save kamap long ol dispela samting.

Olsem wanem? Yumi ken bilip long ol dispela tok profet? Jehova yet i tok: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” (Aisaia 55:11) Dispela tok em i no bilong toksave tasol olsem God i save bihainim ol tok promis bilong em. Nogat. Jehova em God i Gat Olgeta Strong, olsem na em i gat strong bilong kamapim gutaim long olgeta hap graun. I no gat wanpela samting em i no save long en, olsem na gutpela tingting na save bilong em inap helpim ol man long stap bel isi. (Aisaia 40:​13, 14) Na tu, Jehova em i as bilong pasin sori, olsem na i no gat wanpela long heven o long graun i gat bikpela laik olsem Jehova long kamapim gutaim long olgeta hap graun.​—⁠1 Jon 4:⁠8.

Tru, yumi mas i gat bilip bambai yumi ken bilip long ol tok promis bilong God. Save em as bilong bilip na yumi inap kisim bilip sapos yumi stadi long Baibel. (Filipai 1:​9, 10) Taim yumi lain long ol pasin na laik bilong God, bai yumi save olsem Kingdom bilong God i stap tru. Tru tumas, pait bai pinis olgeta​—⁠tasol i no long rot bilong ol man, nogat. Pait bai pinis long rot bilong wanpela gutpela gavman bilong bosim olgeta hap, em God i orait long en​—⁠em Kingdom bilong God.

[Ol Piksa long pes 8, 9]

Aninit long Kingdom bilong God, ol man bai lain long stap bel isi wantaim na ol samting bilong pait bai pinis olgeta