Baibel i Tok Wanem?

Husat i As Bilong Wok Marila Samting?

“OL MARILAMERI.” Taim yu harim dispela tok yu tingim wanem samting? Ating yu tingim ol lapun meri i gat longpela gras na pes bilong ol i luk nogut tru na ol i save wokim marila, o ol meri nogut i save wok wantaim Satan. Tasol planti marilameri bilong nau em ol yet i kolim ol olsem marilameri ol i no dispela kain meri, ol i meri nating tasol. Sampela em ol savemeri i gat nem, olsem ol loya, tisa, meri bilong raitim ol buk samting, na ol nes. I gat sampela lotu i kamap gen long olgeta hap, na wok bilong ol i wankain long wok bilong ol spirit nogut, olsem ol lotu i save lotuim ol samting olsem diwai o maunten na ol lotu haiden. Wanpela polisman long Rasia i tok: ‘Maski yu go long olgeta hap bilong Rasia long nau, wok marila samting em wanpela wok planti man i save mekim long olgeta de.’ Long Amerika i gat 50,000 i go inap 300,000 marilameri, o “Wika,”a em sampela i save kolim ol yet olsem.

Long nau taim ol man i kolim dispela tok “marilameri,” ol i tingim narapela narapela samting. Ol pasin bilong wok marila samting i wok long kamap long nau i wankain olsem pasin bilong lotu long ol god meri, na as bilong en em pasin bilong lotuim ol samting bilong graun, na ol i gat strongpela bilip long ol narapela kain strong. Sampela marilameri i stap wanpis​—⁠ol yet i wok marila. Ol i save skelim ol senis i kamap long taim bilong san na ren samting, raun bilong mun, na ol narapela samting i save kamap long skai na graun. Ol narapela i save bung, olsem 13 marilameri long wanpela grup, bilong mekim lotu na wokim marila posin samting.

Tru, long hap bilong Wes, tingting bilong ol man bilong nau long ol wok marila samting i narapela kain tru long tingting bilong ol man i bin stap long yia 500 i go inap long 1500 samting. Long dispela taim bipo ol i save kukim ol marilameri long paia. Tasol sampela taim ol man i pait yet long ol marilameri. Olsem: Long Oktoba 1998, long Indonisia, ol lain raskol bilong pait long bus naip ol i hangamapim 150 samting manmeri em ol i ting ol i marilameri na marilaman na kilim ol i dai. Ol ripot i tok, long Saut Afrika, namel long 1990 na 1998, ol i mekim nogut long 2,000 marilameri na marilaman na ol i kilim i dai 577 bilong ol. Nau long dispela taim bilong pasin nogut i go bikpela tru​—⁠sampela man i save laikim ol samting bilong wok marila na sampela ol i nolaik tru long ol marilameri na man, olsem na ol Kristen i mas ting olsem wanem long dispela samting?

Ol i No Inapim Laik Bilong Ol

Wanem samting i kirapim ol man long mekim wok marila samting long nau? Ol i tok, wanpela as em ol i save tingim tru ol samting bilong graun na ol samting i gat laip. Sampela i tok, pasin bilong mekim ofa long ol animal i no insait long ol wok bilong ol. Ol narapela i tok ol i insait liklik long wok marila samting bilong painim ol man ol inap toktok gut wantaim ol, bilip long ol, na ol i gat wankain tingting long ol samting bilong spirit. Wanpela glasmeri bilong nau i tok: ‘Olgeta man mi save long ol long lotu haiden ol i gat gutpela pasin pren na mi inap toktok gut wantaim ol . . . Ol i gutpela manmeri.’ Na planti ol i tok ol i no insait long ol wok bilong Satan, na ol i tok strong olsem lotu bilong ol i no gat wanpela god nogut long en.

Namba wan as na planti bilong ol i kamap marilameri i olsem: Ol i pilim olsem ol i sot long ol samting bilong spirit, na ol i no laikim ol bikpela lotu. Phyllis Curott, em pris meri bilong lotu haiden Wika, em i tok long lain bilong em olsem: “Mipela olgeta i no amamas long tok na pasin bilong lotu em mipela i bin go bikpela insait long en.” Curott i tok, ol glasmeri bilong nau ol i traim long bekim ol askim olsem, ‘Olsem wanem yumi ken painim gen ol samting i holi?’ Tasol yu ting wok marila em i rot bilong kisim ol samting tru bilong spirit?

Samting Tru Bilong Spirit​—⁠Long Wanem Rot?

Baibel i tok klia olsem Jehova wanpela tasol i God tru na em i King bilong heven na graun. (Song 73:28; 1 Pita 1:​15, 16; KTH 4:​11) Em i singautim olgeta man long painim em “na save tru long em.” (Aposel 17:27) Em nau, wanpela rot tasol bilong yumi ken kisim ol samting tru bilong spirit, em yumi mas kisim stretpela save long trupela God, Jehova. Yumi ken mekim olsem taim yumi stadi long Tok bilong em, em Baibel Holi. Man bilong raitim Baibel, em Jems, em i tok: “Yupela i mas i go klostu tru long God, na em bai i kam klostu tru long yupela.”​—⁠Jems 4:⁠8.

Tasol Baibel i tokim yumi long was gut long wanpela man nogut em i as tru bilong ol samting nogut bilong spirit. (1 Jon 4:⁠1) Na Baibel i tok Satan, em nambawan birua bilong Jehova, na ol spirit nogut bilong em ol i as bilong planti pasin giaman bilong spirit i gat strong tru long pulim planti man long nau.b Baibel i tok, Satan “i bin pasim tingting” bilong planti man. Tru tumas, em i wok long “giamanim olgeta manmeri bilong graun,” na ol man ol i insait long wok marila samting tu, maski ol i tok ol i lotuim Satan o nogat. Bilong wanem i olsem?​—⁠2 Korin 4:⁠4; KTH 12:⁠9.

Planti pasin na wok marila i wankain olsem pasin bilong lotu long Satan. Maski man i laik save liklik long wok marila na em i no tingting long insait tru long en, dispela inap pulim em i go insait long wok bilong ol spirit nogut. Tru tumas, planti man i kamap abus bilong Satan long dispela rot.

Na tu, laik bilong kisim namba o laik bilong bekim pasin nogut long narapela i pulim sampela long insait long wok marila samting. Jennifer, em wanpela glasmeri, em i tok: “I gat ol meri i save kolim ol yet olsem marilameri samting, na ol i mekim wok long dispela nem bilong mekim ol laik nogut bilong ol.” Tasol maski ol marilameri i bekim nogut long man o ol i no save mekim olsem, ol i stap aninit long wok bos bilong Satan na ol spirit nogut bilong em. Sampela marilameri i tok ol spirit nogut i no stap tru, tasol dispela bai mekim na ol spirit nogut i no hatwok long giamanim ol.​—⁠Skelim wantaim 1 Korin 10:​20, 21.

Baibel i tambuim wok bilong glasman, sanguma, pasin bilong wokim majik, marila, na olgeta pasin bilong toktok wantaim ol daiman. Em i tok klia olsem: “Bikpela . . . i no laikim tru ol manmeri i save mekim ol dispela kain pasin nogut.” (Lo 18:​10-12) Tru, ol Kristen i mas tingting strong long “mekim gutpela pasin long [olgeta] manmeri,” na long rot bilong wok autim tok ol i bin helpim planti manmeri long lusim olgeta kain wok bilong ol spirit nogut. (Galesia 6:10; Aposel 16:​14-18) Tasol ol Kristen tru i save sakim olgeta pasin bilong ol lotu giaman, na olgeta kain wok marila samting tu.​—⁠2 Korin 6:​15-17.

[Ol Futnot]

[Piksa Kredit Lain long pes 12]

Picture Book of Devils, Demons and Witchcraft/Ernst and Johanna Lehner/Dover