Mekim Bikpela Long Ol Tineja—Wok Bilong Pasin Bilong Kliagut
Tingim olsem yu raun long narapela kantri na yu no save long tok ples bilong ol. Bai yu hatwok long toktok wantaim ol man, tasol ating yu inap mekim sampela tok. Liklik dikseneri inap helpim yu long lainim sampela tok bilong dispela tok ples. O ating wanpela man inap tanim tok long yu na bai yu ken kliagut long tok ol arapela i mekim, na ol i ken kliagut long tok bilong yu.
OL PAPAMAMA i mekim bikpela long ol tineja inap pilim wankain. Yumi hatwok long kliagut long narapela tok ples, na olsem tasol yumi inap hatwok long kliagut long pasin bilong ol tineja, tasol i gat rot bilong kliagut long en. Ol papamama i mas traim long kliagut long ol samting i wok long kamap long dispela taim we papamama na tineja i amamas long tineja i wok long kamap bikpela, tasol tu kain kain tingting bilong tineja i paulim em yet na papamama.
As Bilong Pasin Ol i Mekim
Taim yangpela i laik kirap bosim wokabaut bilong em yet, i no olsem em i bikhet long papamama. Baibel i tok taim bai kamap we “man i save lusim papamama.” (Stat 2:24) Bilong ol yangpela i ken redi long mekim ol bikpela wok taim ol i bikpela pinis, ol i mas lain long wokim ol disisen.
Nau skelim as bilong pasin ol papamama i save lukim ol tineja i mekim, em mipela i kamapim pinis sampela tok bilong ol long stori i kamap paslain long dispela.
Lia, long Briten, i tok: “Pikinini man bilong mi i senis na i strong long kamapim tingting bilong em yet na i no daun long mipela.”
Olsem ol liklik pikinini, planti taim ol tineja i save askim, “Wai?” Tasol nau, sampela sotpela tok tasol bilong bekim askim bilong ol i no inap long ol. Wanem samting i senis? Aposel Pol i tok: “Taim mi stap pikinini yet, . . . mi save tingting na toktok long pasin bilong pikinini.” (1 Korin 13:11) Taim ol yangpela i kisim pasin bilong wokim tingting, papamama i mas stori gut moa long ol samting na bai dispela i ken skulim gut tingting bilong ol yangpela.—Hibru 5:14.
John, long Gana, i tok: “Tupela pikinini meri bilong mipela i kirap tingting planti long ol samting, na moa yet long lukluk bilong ol.”
Maski ol senis bilong bodi bilong yangpela i kamap long wanem taim, dispela i mekim na planti yangpela i save tingting tumas long lukluk bilong ol. Taim ol senis i kamap long skin bilong ol yangpela meri, ol inap amamas o tingting planti long dispela samting—o tupela samting wantaim. Na tu, ol pimpol i save kamap, na ol i laik kirap yusim lipstik samting, olsem na yumi inap save long as na i luk olsem ol tineja i save lusim bikpela hap taim long stretim skin bilong ol na i no tumas long mekim homwok.
Daniel, long Filipins, i tok: “Ol pikinini bilong mipela i no laik tokim mipela long tingting bilong ol na ol samting ol i mekim, na ol i laik stap long ol yet tasol. Planti taim ol i laik stap wantaim ol pren bilong ol, na ol i no laik stap wantaim mipela.”
Pasin bilong haitim ol samting inap kamapim hevi. (Efesus 5:12) Tasol hap taim bilong stap long yu yet em narapela samting. Jisas tu i save sampela taim i gutpela long go long “wanpela hap i no gat man.” (Matyu 14:13) Taim ol yangpela i wok long kamap bikpela, ol i nidim hap taim bilong stap long ol yet, na papamama i mas larim ol i mekim olsem. Dispela i helpim ol yangpela long tingting na skelim gut ol samting—em wanpela pasin bai helpim ol tru taim ol i bikpela pinis.
Na tu, pasin bilong lain long kamap pren wantaim ol arapela em hap wok bilong yangpela long kamap bikpela. Tru, ‘ol poroman nogut bai bagarapim gutpela pasin.’ (1 Korin 15:33) Tasol Baibel i tok tu olsem: “Pren tru i save laikim yumi long olgeta taim, na em i olsem brata i save sambai long helpim yumi long taim bilong hevi.” (Sindaun 17:17, NW ) Pasin bilong lain long kamap pren na stap pren bilong ol gutpela man, em i wanpela bikpela samting na em bai helpim yangpela taim em i bikpela pinis.
Taim wanpela bilong ol dispela samting mipela i kolim antap i kamap, ol papamama i mas kliagut long ol samting i wok long painim ol tineja, nogut ol i kisim tingting kranki long pasin ol i mekim. Na tu, papamama i mas i gat savetingting, olsem taim sampela samting i kamap, ol i mas i gat save long mekim ol samting long pasin i kamapim gutpela samting. Olsem wanem ol papamama bilong ol tineja inap mekim olsem?
[Blurb on page 5]
Taim ol yangpela i kisim pasin bilong wokim tingting, papamama i mas stori gut moa long as bilong ol lo bilong famili