Sapta 14
Mi No Gat Poroman na Olsem Wanem Mi Inap Daunim Dispela Bel Hevi Bilong Mi?
Em Sarere long apinun. Manki i sindaun em wanpela tasol long rum slip bilong em.
Em i bikmaus na em i tok: “Mi no laikim Sarere Sande!” Tasol i no gat wanpela man i stap bilong bekim tok long em. Manki i opim wanpela nius na em i lukim piksa bilong sampela yangpela ol i bung wantaim long nambis. Em i tromoi nius i go. Em i laik krai. Em i wok long pasim, tasol em i no inap na aiwara i kamap. Nau em i tromoi skin bilong em i go long bet na em i krai nogut tru na em i tok, “Bilong wanem ol i no save singautim mi i go bung wantaim ol?”
SAMPELA taim yu bel hevi na pilim olsem yu stap wanpis tru na yu no gat poroman na i no gat wanpela i laikim yu? Sapos olsem, yu no ken bel hevi tumas. Tru, sapos yu no gat poroman, bai yu no amamas, tasol i no olsem yu gat wanpela bikpela sik na i no gat rot bilong stretim. Nogat. Taim bel i pilim hangre, yu save yu mas kisim kaikai. Na i olsem tasol long taim yu no gat poroman na yu bel hevi—dispela bel hevi i toksave long yu olsem yu mas kisim sampela poroman, em yu ken pren gut wantaim ol na pas gut wantaim ol. Yumi ken tok piksa olsem: Yumi mas kisim kaikai bambai yumi ken wok gut, na olsem tasol yumi mas kisim ol poroman bambai yumi ken belgut.
Ating yu bin lukim paia i lait. Sapos yu rausim wanpela hap paia, bai em i no lait moa. Tasol taim yu bekim bek dispela hap paia, bai em i lait gen. Na i olsem tasol long yumi ol man—sapos yumi no gat poroman, i no longtaim na bai yumi no “lait” moa o i stap amamas, na bai skin na tingting i no wok gut. God i wokim yumi olsem.
Wanpis, Tasol i No Bel Hevi
Wanpela man bilong raitim buk em i bin tok: “Mi save amamas long i stap wanpela tasol, winim long taim mi stap wantaim wanpela poroman.” (Henry David Thoreau) Yu wanbel long tok bilong dispela man? Yangpela man Bil i gat 20 krismas em i tok: “Mi wanbel long dispela tok. Mi save laikim tru ol samting bilong bus. Sampela taim mi save kalap long liklik bot bilong mi na pul i go namel long raunwara. Inap sampela aua mi sindaun i stap, mi wanpela tasol. Long kain taim olsem mi inap tingim gut ol samting mi laik mekim, na mi save amamas.” Narapela yangpela man i gat 20 krismas, em Stiven, em tu i gat wankain tingting. Em i tok: “Mi save stap long wanpela bikpela haus i go antap. Sampela taim mi save go sindaun antap long rup bilong dispela haus bambai mi inap i stap wanpela tasol. Mi save sindaun i stap na tingim gut ol samting, na mi save beten. Dispela i save givim nupela strong long mi.”
Tru tumas, sapos yu mekim gutpela wok long ol hap taim yu stap wanpela tasol, dispela inap helpim yu long i stap belgut. Jisas i save amamas long i stap wanpela tasol: “Long moningtaim tru Jisas i kirap na em i go ausait na i go long wanpela hap i no gat man, na em i [beten] i stap.” (Mak 1:35) Taim Jehova i wokim man, em i tok: “I no gutpela long dispela man i stap wanpis.” Em i no tok, ‘I no gutpela dispela man i stap wanpis long sampela taim.’ Yu tingim? (Stat 2:18-23) Olsem na sapos sampela taim yumi stap wanpis, em gutpela. Tasol sapos planti taim yumi save stap wanpis na yumi save stap olsem inap longpela taim, em i no gutpela. Ating bai yumi bel hevi. Baibel i toksave olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.”—Sindaun 18:1.
Bel Hevi Bilong Man i No Gat Poroman Em Bilong Liklik Taim Tasol
Sampela taim sampela samting i kamap em yu no inap senisim na nau yu no gat poroman, na inap liklik taim yu bel hevi. Olsem: Sapos yu go sindaun long narapela hap, orait yu mas lusim ol olpela pren bilong yu, na ating inap liklik taim bai yu bel hevi na pilim olsem yu no gat poroman. Stiven i stori olsem: “Mi tupela Jems i bin i stap pren tru, winim brata brata. Tasol mi lusim Jems na mi go sindaun long narapela hap na mi save, bai mi bel hevi.” Stiven i malolo liklik long stori—ating em i tingting bek long taim em i bin lusim Jems. Nau em i stori moa, olsem: “Taim mi laik go antap long balus, bel bilong mi i pas na mi no inap toktok. Mi holim em na em i holim mi, na nau mi lusim em. Mi ting nau wanpela gutpela samting tru bilong mi i lus.”
Olsem wanem long i stap bilong Stiven long nupela ples em i go sindaun long en? Em i tok: ‘Pastaim i hatwok. Ol olpela pren bilong mi ol i bin laikim mi, tasol long dispela nupela ples sampela wanwok bilong mi i daunim mi na mi pilim olsem mi no inap mekim gut wok bilong mi. Mi save lukluk long klok na tingting bek long ol samting mitupela Jems i mas mekim long kain taim olsem sapos mi stap yet wantaim em. Na mi bel hevi na pilim olsem mi no gat poroman.’
Taim yumi bel hevi olsem, yumi save tingim gutpela taim bilong bipo taim yumi bin i stap amamas. Tasol Baibel i tok: “Yu no ken tok, ‘Olsem wanem na taim bipo i winim dispela taim nau?’ ” (Saveman 7:10) Bilong wanem Baibel i tok olsem?
Long wanem ol samting inap senis na i kamap gutpela. Olsem na ating dispela bel hevi bilong yu “em bilong liklik taim tasol,” olsem sampela man bilong skelim dispela samting i tok. Olsem na tru, pastaim Stiven i bel hevi na pilim olsem em i no gat poroman, tasol em i bin daunim dispela bel hevi bilong em. Em i mekim olsem wanem? Em i tok: “Mi bin kamapim bel hevi bilong mi long wanpela man i save tingim mi na laikim mi, na dispela i bin helpim mi. Na nogut mi tingim taim bilong bipo tasol. Mi subim skin bilong mi long bung wantaim ol man na mi toktok wantaim ol. Long dispela rot i no longtaim na mi kisim pinis sampela nupela pren.” Na olsem wanem long olpela pren bilong Stiven, em Jems? Stiven i tok: ‘Tingting bilong mi i kranki—maski mi bin lusim em, mitupela i stap pren yet. Hap asde samting mi bin telefon long em na mitupela i toktok toktok inap wanpela aua na 15 minit.’
Bikpela Bel Hevi Bilong Man i No Gat Poroman
Tasol sampela taim dispela kain bel hevi i no pinis kwik. Taim yu no gat poroman, ating bel hevi bilong yu inap i stap longtaim, na bai yu pilim olsem i no gat rot bilong stretim dispela. Roni i stap long haiskul na em i stori olsem: “Mi bin skul long dispela hap inap 8-pela yia pinis na mi no gat wanpela pren. Nogat tru! . . . No gat wanpela man i save long tingting i stap long bel bilong mi, na no gat wanpela man i laik save. Sampela taim mi pilim olsem mi no inap karim moa dispela hevi!”
Planti yangpela manmeri, kain olsem Roni, ol i save bel hevi nogut tru long ol i no gat poroman. Tasol i gat rot bilong stretim kain bikpela bel hevi olsem. Sapos dispela kain bikpela bel hevi i painim yu, orait namba wan samting yu mas mekim, em olsem: Yu mas wok long kisim save long as bilong dispela bel hevi. (Sindaun 1:5) Yangpela meri Ronda, em i gat 16 krismas, em i kamapim wanpela as bilong dispela kain bikpela bel hevi. Em i tok: “Mi bel hevi tru, long wanem mi no gat poroman. Sapos mi amamas long mi yet, ating bai mi gat planti poroman. Tasol mi no laikim mi yet.”—Buk Lonely in America.
Ronda i bel hevi long em yet na dispela samting i pasim em long toktok wantaim ol narapela na kisim sampela poroman. Wanpela man bilong skelim dispela samting em i tok: “Planti man na meri i no gat poroman ol i bel hevi nogut tru na ol i save ting olsem: ‘Mi no gat gutpela skin,’ o ‘Ol manmeri i no inap laikim mi,’ o ‘Mi no inap mekim gut wanpela wok.’ ” Olsem na sapos yu no gat poroman na yu bel hevi long dispela samting, orait wanpela samting yu ken mekim bilong stretim dispela hevi, em olsem: Yu ken wok long mekim ol samting bambai yu amamas long yu yet. (Lukim Sapta 12.) Taim yu wok long kamap “nupela man,” olsem Baibel i tok, na yu kisim pasin bilong mekim gut long ol man, na pasin daun, na pasin isi, orait bai yu laikim yu yet!—Kolosi 3:9-12.
Na taim yu lain long laikim yu yet, bai ol narapela manmeri i kirap laikim yu, long wanem yu gat ol gutpela pasin. Yumi ken tok piksa long wanpela plaua—plaua i mas op pastaim na bai yu inap lukim gutpela kala bilong en, a? Na olsem tasol yu mas kamapim ol gutpela pasin bilong yu long ples klia pastaim na bai ol manmeri i ken save long en na laikim yu.
Kirap Toktok Wantaim Ol Narapela
Wanpela lain long Amerika ol i gat wok long helpim tingting bilong ol man long i stap gutpela (U.S. National Institute of Mental Health) na ol i bin wokim wanpela nius i tok, ‘Sapos man i bel hevi long wanem em i no gat poroman, orait em i mas kirap helpim ol narapela. Em gutpela rot bilong stretim dispela bel hevi.’ Dispela tok i stret wantaim tok bilong Baibel i tok, yumi mas ‘givim bel moa yet’ long ol narapela man, na yumi mas “sori” long ol. (2 Korin 6:11-13; 1 Pita 3:8) Sapos yu mekim olsem, bai yu kisim planti poroman. Sapos yu wok long tingim ol narapela man, bai yu no tingting tumas long yu yet, na dispela gutpela pasin bilong yu bai kirapim ol long tingim yu.
Yangpela meri Natali i gat 19 krismas na em i tingim dispela samting, olsem na em i no sindaun nating na wetim ol narapela i kam tok gude long em. Nogat. Em i kirap na i go tok gude long ol. Em i tok, ‘Mi yet mi mas kirap mekim gutpela pasin pren; nogut ol narapela i ting mi gat pasin antap na mi no laik toktok wantaim ol.’ Olsem na bilong kirap toktok wantaim narapela, pastaim yu ken amamas na lap, na ating bai dispela i kirapim em long mekim olsem tu.
Nau yu ken kirap toktok wantaim em. Lilian i gat 15 krismas na em i tok: “Pastaim mi pret long i go toktok wantaim ol narapela mi no save gut long ol. Mi tingting planti, nogut ol i no laikim mi.” Orait, Lilian i save mekim wanem bilong kirap toktok wantaim narapela? Em i tok: “Mi save askim em: ‘Yu bilong we?’ O mi kolim nem bilong wanpela man o meri mi save long em na mi tok, ‘Yu save long em?’ Sapos mitupela wantaim i save long em, orait nau i gat sampela samting mitupela i ken toktok wantaim long en.” Na sapos yu mekim gutpela pasin long ol narapela na yu laik long givim samting long ol, dispela tu bai helpim yu long kisim ol gutpela poroman.—Sindaun 11:25.
Na yu mas save, i gat wanpela pren em i no ken lusim yu. Krais Jisas i bin tokim ol disaipel bilong em: “Mi no inap i stap wanpis tru, long wanem, Papa i stap wantaim mi.” (Jon 16:32) Jehova inap kamap pren tru bilong yu tu. Tasol yu mas save gut long Em pastaim. Olsem na yu mas kaunim Baibel, na yu ken lukim ol samting Jehova i bin wokim, na bai yu inap save long pasin bilong em. Na yu mas beten bambai yu ken pas gut wantaim em na em i ken i stap pren tru bilong yu. Sapos God Jehova i stap pren bilong yu, yu no ken bel hevi na ting yu no gat poroman.
Na sapos sampela taim yu pilim olsem yu stap wanpis, yu no ken tingting planti. Dispela samting i save painim planti man. Tasol olsem wanem sapos yu save sem na dispela i pasim yu long i go bung wantaim ol narapela na kisim ol gutpela poroman? Orait, kaunim sapta i kamap bihain long dispela.
Toktok Wantaim long Ol Dispela Askim
◻ Sapos sampela taim yu stap wanpis, em nogut o olsem wanem? Dispela inap helpim yu long sampela rot o nogat?
◻ Sapos yu no gat poroman na yu bel hevi, olsem wanem na ating dispela i bilong liklik taim tasol? Sampela taim yu bin bel hevi olsem inap liklik taim?
◻ Sapos yu no gat poroman na yu bel hevi nogut tru, yu ken mekim wanem bilong stretim dispela?
◻ Kolim sampela samting yu ken mekim bilong kirap toktok wantaim ol narapela. Olsem wanem? Yu bin mekim olsem na nau sampela i kamap poroman bilong yu?
[Ol Piksa long pes 116, 117]
Maski yu stap longwe long ol poroman bilong yu, yupela inap raitim pas samting na i stap pren yet
[Piksa long pes 118]
Yu inap amamas long i stap wanpis long sampela taim