Sapta 37

Bilong Wanem Mi No Ken Kisim Amamas Bilong Ol Yangpela Long Sampela Taim?

BIPO long olgeta Fraide long apinun, Polina i save go long ol miting Kristen. Em i amamas long harim ol tok i kamap long miting, tasol sampela taim em i bel hevi long em i stap long miting, long wanem em i save, long dispela taim ol wanskul bilong em ol i raun na kisim amamas.

Taim miting i pinis Polin i wokabaut i go bek long haus, tasol long dispela rot i gat wanpela klap bilong ol yangpela. Em i stori long dispela samting na em i tok: “Mi harim musik i pairap na mi lukim planti lait i wok, na dispela i pulim mi na mi go sanap liklik na nus bilong mi i pas long windo na mi wok long lukim ol; mi ting ol i kisim bikpela amamas tru, na mi tu mi laik kisim dispela amamas.” Bihain Polin i gat bikpela laik tru long kisim amamas wantaim ol poroman bilong em, na dispela laik i kamap olsem nambawan samting long bel bilong em.

Olsem wanem long yu? Ating sampela taim yu kisim tingting olsem bilong Polin. Yu wanpela Kristen na yu ting dispela i pasim yu na yu no kisim gutpela amamas olsem ol wanskul bilong yu i save kisim. Yu laik lukim wanpela piksa i kamap long televisen em ol narapela yangpela i stori long en, tasol papamama i tok, em i piksa nogut bilong pait na bagarapim man, na yu no ken lukim. Yu laik raun wantaim ol wanskul, tasol papamama i tok ol i poroman nogut. (1 Korin 15:33) Yu laik i go long wanpela pati em olgeta wanskul bai go long en, tasol papamama i tok ‘Nogat.’

Yu lukim ol wanskul bilong yu i save go i kam long laik bilong ol na i olsem i no gat tambu long ol. Papamama bilong ol i larim ol i go long ol danis na pati na ol i stap inap biknait na i go moa yet, na klostu tulait ol i kam bek long haus. Olsem na ating sampela taim bel bilong yu i skrap long mekim olsem​—yu laik bai yu tu yu ken raun long laik bilong yu olsem ol narapela yangpela i save mekim. Tasol i no olsem yu laik mekim sampela pasin nogut. Nogat. Yu laik kisim sampela amamas tasol long sampela taim.

Painim Amamas​—God i Ting Olsem Wanem long En?

I no gat rong long kisim amamas. Baibel i tok, Jehova em i “as bilong pasin tru bilong amamas.” (1 Timoti 1:11) Na long maus bilong bikpela saveman, em Solomon, Jehova i tok: “Yupela yangpela manmeri, yupela i mas amamas long taim yupela i yangpela yet. Yupela i ken bihainim tingting na laik bilong yupela yet.” Tasol harim gut narapela tok bilong Solomon, em i tok: “Tasol lukaut, God bai i skelim pasin bilong yupela long kot bilong en.”​—Saveman 11:​9, 10.

Taim yu save God bai i skelim olgeta pasin bilong yu long kot bilong em, bai yu kisim narapela kain tingting long painim amamas. Long wanem bai yu save, God i no tok, amamas em i samting nogut, tasol em i no orait long ol man i ‘laikim tumas ol kain kain amamas bilong dispela graun,’ na ol i tingting tasol long painim ol dispela amamas. (2 Timoti 3:​1, 4) Bilong wanem God i no laikim man i mekim olsem? Orait, tingim King Solomon. Em i maniman stret, na em i gat planti kago samting. Em i tromoi bikpela mani long traim olgeta kain amamas bilong dispela graun. Em i tok: “Mi no bin pasim laik bilong mi liklik. Nogat tru. Long taim mi laikim wanpela samting, orait mi kisim tasol. Na mi bin amamas tru long olgeta wok mi bin mekim.” Orait bihain Solomon i ting olsem wanem long ol dispela amamas em i bin kisim? Em i tok: “Olgeta dispela samting i olsem samting nating tasol na i no inap long helpim mi liklik. I olsem man i ran i go bilong holimpas win.” (Saveman 2:​10, 11) Em nau, God i save pinis, sapos yu tingting tasol long painim ol amamas bilong graun, bihain bai yu pilim olsem ol dispela samting i no bin helpim yu liklik na yu no stap amamas.

Na God i tok yu mas klia long ol pasin nogut olsem kisim drak na mekim pasin pamuk. (2 Korin 7:1) Tasol planti samting ol yangpela i save mekim bilong kisim amamas, em inap kirapim ol long mekim ol dispela pasin nogut. Wanpela yangpela meri em i go long wanpela bung bilong ol wanskul na i no gat sampela was bilong ol. Em i tok, “Ol musik i pairap na i gutpela tru, na mipela mekim save danis, na kaikai i gutpela tru, na mipela i lap lap i stap.” Tasol bihain “wanpela i kisim spakbrus i kam, na bihain ol i kirap long dring. Em nau, olgeta samting i paul.” Nau dispela meri i kirap mekim pasin pamuk. Em i tokaut long dispela samting em i mekim na em i tok: “Long dispela taim na i kam inap long nau, mi bel hevi stret long dispela samting mi bin mekim.” Olsem na taim i no gat sampela was bilong ol yangpela, olsem ol papamama samting, ol dispela kain bung inap paul na kamap pati nogut i gat kain kain pasin nogut i kamap long en.​—1 Pita 4:3.

Olsem na ating papamama i tingting planti long ol samting yu save mekim bilong painim amamas, na ol i tambuim yu long i go long sampela hap o poroman wantaim sampela yangpela. Papamama i gat wanem tingting na ol i mekim olsem? Ol i laik helpim yu long bihainim wanpela toksave bilong God, em i tok: “Taim bilong yupela i stap yangpela yet i no longpela taim. Nogat. Em i olsem samting nating. Olsem na . . . yupela i no ken bihainim pasin i givim pen long bodi bilong yupela.”​—Saveman 11:10.

Bel Bilong Yu i Skrap long Painim Amamas Olsem Ol Narapela Yangpela i Mekim?

Ating yu lukim ol narapela yangpela, i olsem ol inap raun long laik bilong ol na painim amamas, na yu bel kaskas na yu laik mekim olsem. Long kain taim olsem, i no hatwok long lusim tingting long dispela tok bilong saveman long Baibel. Polin i mekim olsem, na em i lusim ol miting Kristen na em i kirap poroman wantaim wanpela lain yangpela ol i tingting tasol long painim ol amamas bilong dispela graun. Em i stori long dispela na em i tok: ‘Mi kirap mekim olgeta samting nogut papamama i bin tambuim mi long mekim.’ Em nau, Polin i mekim save long painim amamas na dispela i mekim wanem long em? Bihain ol polis i holim em na ol i putim em long wanpela skul kalabus bilong ol yangpela meri i save mekim ol kain kain pasin bikhet.

Bipo bipo man bilong raitim tok long Buk Song 73, pastaim em tu i gat wankain tingting olsem bilong Polin. Dispela man i tok: “Mi lukim ol man nogut i kamap maniman na mi mangal long ol samting bilong ol dispela bikhetman. . . . Ol i no save karim ol hevi olsem ol arapela man i save karim.” Na em i kisim tingting kranki na em i ting i no gat gutpela samting i kamap long ol man i bihainim stretpela pasin. Em i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?” Tasol bihain em i kisim gutpela tingting olsem: Ol man nogut i “wokabaut long rot i wel moa yet,” na ol i laik pundaun na bagarap olgeta!​—Buk Song 73:​3, 5, 13, 18.

Polin tu i kisim gutpela tingting olsem, tasol sori! Planti hevi i painim em pastaim na nau em i kisim dispela gutpela tingting. Em i kirap senisim pasin bilong em na lusim olgeta pasin nogut bambai God i ken orait gen long em. Tasol nogut yu bihainim pasin Polin i bin mekim bipo na bai planti hevi i painim yu​—olsem ol polis i holim yu, o sik nogut bilong pamuk i kisim yu, o yu laik lusim drak na yu hatwok na kisim nogut long dispela na nau yu kisim gutpela tingting. Em i no gutpela rot, a? I gat planti gutpela samting yu ken mekim bilong kisim amamas na i no gat ol dispela kain hevi long en. Wanem sampela samting yu ken mekim bilong kisim amamas?

Sampela Gutpela Amamas

Wanpela lain i toktok wantaim planti yangpela bilong Amerika long dispela samting, na ol yangpela i tok ol i ‘laik long raun na kisim amamas wantaim famili long sampela taim na mekim sampela wok wantaim famili.’ Taim famili olgeta i mekim sampela wok wantaim, ol i save kisim amamas long dispela, na em inap helpim famili long pas gut wantaim.

Tasol nogut yu ting, yu ken sindaun wantaim famili na lukim televisen na dispela em inap. Nogat. Wanpela man (Dokta Anthony Pietropinto) em i tok, ‘Tru yumi inap sindaun wantaim na lukim televisen, tasol i no olsem yumi mekim sampela wok wantaim​—olgeta i lukluk tasol long piksa. Tasol i gat planti samting famili i ken mekim wantaim bilong kisim amamas, olsem sampela kain pilai o spot famili i ken mekim insait long haus o sampela spot ol i ken mekim insait long banis bilong ol yet, o ol i ken bung wantaim na kukim sampela gutpela kaikai ol i save laikim, o ol i ken wokim sampela samting olsem basket o kain samting olsem. Ol dispela kain amamas i givim rot long ol na ol i ken toktok wantaim na wok gut wantaim, na narapela i kirapim tingting bilong narapela. Tasol taim famili i sindaun na lukim televisen, ol i no inap mekim olsem.’ Wanpela papa i gat 7-pela pikinini, nem bilong em Jon, em i tok, ‘Sapos famili i wok wantaim long klinim arere bilong haus o penim o stretim haus, o kain wok olsem, ol inap kisim amamas long mekim dispela wok.’

Sapos nau famili bilong yu i no save bung wantaim na mekim ol kain samting olsem, orait yu ken toktok wantaim papamama long dispela. Tingim sampela gutpela hap yupela i ken raun long en, olsem nambis o kain samting olsem, o tingim sampela ol narapela samting famili i ken mekim wantaim, o wanpela samting yupela i ken wokim wantaim, na yu ken kamapim dispela tingting bilong yu long papamama.

Tasol sapos yu laik kisim amamas, i no olsem yu mas bung wantaim ol narapela long olgeta taim. Nogat. Wanpela yangpela meri nem bilong em Maria, em i save skelim gut ol poroman bilong em, na sampela taim em i save stap em yet, na em i kisim amamas. Em i tok, ‘Mi save kisim amamas long paitim musik olsem piano samting.’ Na narapela yangpela meri, em Melisa, em i tok, ‘Sampela taim mi save raitim ol stori samting, na mi kisim amamas long dispela.’ Na yu tu yu ken lain long mekim sampela gutpela wok samting, olsem lain long kaunim gut, o mekim wok kamda, o paitim musik, o kain samting olsem.

Bung Wantaim Ol Kristen

Sampela taim yu ken bung wantaim ol poroman Kristen—em wanpela rot bilong kisim gutpela amamas. Yupela ken pilai volibol o kikbal samting, o kukim sampela kaikai na kaikai wantaim. Na sapos yupela i gat sampela gutpela musik i stap long kaset samting, orait yupela ken bung na harim, o lukim wanpela gutpela samting long televisen i stret long ol Kristen i ken lukim.

Na sapos papamama i orait long en, yu ken askim tupela long helpim yu long wokim wanpela bung long haus bilong yu na yu ken singautim sampela yangpela i kam. Tingim sampela gutpela liklik pilai samting yupela i ken wokim, na yupela i ken mekim sampela gutpela singsing wantaim. Sapos sampela i save long paitim gita samting, yu ken kirapim ol long mekim. Na yu ken tingim sampela kaikai bilong wokim long dispela bung, olsem sampela kain kaikai ol yangpela i save laikim. Tasol i no olsem yu mas baim ol kaikai i gat bikpela pe. Nogat. Na ating ol tu i ken karim sampela liklik kaikai i kam na yu ken bungim wantaim.

Olsem wanem? I gat wanpela pak samting klostu long haus bilong yu na yupela i ken bung na pilai volibol o kriket o kikbal o sampela kain pilai olsem? O i gat wanpela gutpela wara yupela i ken waswas long en? O ating sampela famili i ken bung wantaim na wokim piknik, na olgeta i ken karim sampela kaikai i go, na i no olsem wanpela tasol i mas baim kaikai bilong olgeta.

Tasol wanpela samting yu mas tingim​—mekim olgeta samting long skel bilong en tasol. Taim yupela i bung wantaim, sapos yu opim redio o kaset o wokim sampela kain musik, i no olsem em i mas pairap strong na bai yupela i ken amamas long en. Nogat. Na sapos i gat sampela kain danis, nogut sampela i mekim ol kain danis nogut. Na sapos yupela i mekim sampela kain pilai olsem spot, nogut narapela i resis long winim narapela. Yupela ken pilai nating tasol na kisim amamas long en. Wanpela papa i tok, sampela yangpela, taim ol i pilai spot ol i save kros na bikmaus, na klostu ol i laik pait. Olsem na taim yupela i pilai spot, yupela mas bihainim tok bilong Baibel i tok, yumi mas abrusim pasin bilong ‘litimapim nem bilong yumi yet.’ Sapos yu abrusim dispela kain pasin bai yupela i kisim gutpela amamas wantaim.​—Galesia 5:26.

Yu ken singautim husat ol i kam bilong kisim amamas wantaim? Baibel i tok, “Yupela i mas . . . givim bel bilong yupela long ol arapela manmeri bilong God.” (1 Pita 2:17) Olsem na yu no ken bung wantaim ol yangpela tasol. Sampela taim yu ken singautim ol manmeri i bikpela pinis na ol lapun tu. (Lukim 2 Korin 6:13.) Wanpela papa i tok, ‘Ol lapun i save amamas long i kam long ol dispela kain bung na lukim ol samting ol yangpela i mekim. Na sapos sampela manmeri i bikpela pinis ol i stap long ol dispela bung, ol i ken was gut na bai ol yangpela i no ken kirap na mekim sampela pasin i no stret. Tasol taim yu singautim “ol arapela manmeri bilong God,” yu no ken ting yu mas singautim olgeta wantaim i kam long bung bilong yu. Yu no inap, a? Na sapos yu wokim liklik bung tasol na i no planti ol i kam long en, i no hatwok long bosim ol samting i kamap long en.

Taim ol Kristen i mekim ol kain bung olsem, em i gutpela taim bilong narapela i ken strongim narapela long ol samting bilong spirit. Tru, sampela yangpela i ting, sapos ol i pulim ol samting bilong lotu i kam insait long bung bilong ol, bai ol i no inap kisim amamas. Wanpela manki Kristen i gat dispela tingting na em i tok, “Taim mipela i mekim wanpela bung, papamama i save tok, ‘Yupela sindaun na kisim Baibel bilong yupela na bai yumi wokim sampela pilai bilong Baibel.’ ” Tasol wanpela man bilong raitim tok long Buk Song long Baibel em i stori long man i save laikim tumas lo bilong God na em i tok, “dispela man i ken amamas tru.” (Buk Song 1:1, 2) Sapos yupela i kamapim sampela stori bilong Baibel, o wokim sampela pilai bilong Baibel, bai yupela inap kisim gutpela amamas. Sapos yu no save tumas long ol stori na tok bilong Baibel, orait yu ken wok long kisim sampela save moa long en na bai yu ken insait tru long ol dispela tok na pilai.

Na i gat narapela samting tu yupela i ken mekim taim yupela i bung wantaim​—sampela i ken stori long olsem wanem ol i bin kamap Kristen; o ating sampela i ken mekim sampela gutpela stori i mekim yupela i lap. Sampela gutpela stori olsem ol inap givim save na tingting long man. Na ating yupela ken kisim sampela tok bilong dispela buk na toktok wantaim long en.

No Ken Tingting Oltaim long Painim Amamas!

Taim Jisas i stap long graun, em tu i laik kisim sampela amamas long wan wan taim. Baibel i tok, wanpela taim Jisas i go long wanpela bung bilong marit long ples Kana. Long dispela bung i gat kaikai na musik na danis samting, na taim ol i toktok wantaim, ating narapela i strongim narapela. Jisas i laik helpim dispela bung long kamap gutpela, olsem na em i tanim wara i kamap wain!​—Jon 2:​3-11.

Tasol Jisas i no tingting oltaim long kisim amamas. Nogat. Em i lusim bikpela hap taim bilong em long autim tok bilong God. Em i tok: “Kaikai bilong mi, em long bihainim laik bilong God. Em i bin salim mi na mi kam, na mi mas pinisim wok bilong em.” (Jon 4:34) Jisas i kisim bikpela amamas tru long mekim wok bilong God, na dispela amamas i stap longtaim​—em i no olsem ol amamas bilong graun ol man i save kisim na i pinis hariap. Long nau tu, bikpela wok bilong God i stap, na yu ken “wok strong long mekim wok bilong Bikpela” olsem Jisas i bin mekim. (1 Korin 15:58; Matyu 24:14) Tasol sampela taim, sapos yu pilim olsem yu laik kisim liklik amamas, orait yu ken mekim ol samting bilong kisim gutpela amamas long en, olsem samting i stret long mekim, na i gat skel bilong en. Olsem wanpela man bilong raitim buk i tok, ‘Yu no ken wok long olgeta taim long mekim ol samting bilong painim amamas​—na sapos yu mekim olsem, bai yu sotwin stret!’

[Ol Futnot]

Toktok Wantaim long Ol Dispela Askim

◻ Bel bilong sampela yangpela Kristen i skrap long mekim wanem samting ol yangpela bilong dispela graun inap mekim? Sampela taim bel bilong yu i skrap long mekim olsem?

◻ God i givim wanem toksave long ol yangpela long pasin ol i mekim? Dispela i mas givim wanem tingting long ol taim ol i tingim sampela amamas ol i laik kisim?

◻ Taim yu lukim sampela yangpela i laik painim amamas na ol i brukim lo bilong God, na bel bilong yu i skrap long mekim olsem, olsem wanem dispela em i pasin krankii?

◻ Wanem samting yu ken mekim bilong kisim sampela gutpela amamas (1) wantaim famili, (2) o taim yu wanpela yu stap, (3) o taim yu bung wantaim ol narapela Kristen?

◻ Jisas i bin mekim wanem na em i makim pasin yumi ken bihainim taim yumi laik kisim amamas?

[Piksa long pes 299]

Ol yangpela i bihainim ol lo bilong Baibel, yu ting ol i lus tru long sampela gutpela amamas?

[Ol Piksa long pes 300]

Taim yu stap nating yu ken lain long mekim wanpela samting yu save amamas long en

[Ol Piksa long pes 301]

Taim ol Kristen i bung wantaim, ol i save kisim gutpela amamas sapos ol i mekim narapela narapela samting na ol yangpela na lapun i bung wantaim