Ol Spirit Nogut i Kilman!
Satan na ol spirit nogut i save mekim nogut long ol man na bagarapim ol. Long bipo yet inap nau ol i bin mekim olsem. Bipo Satan i bin kilim i dai ol animal na ol wokboi bilong gutpela man Jop. Bihain em i kirapim “bikpela win” bilong bagarapim haus ol 10-pela pikinini bilong Jop i stap long en na kilim ol i dai. Bihain long dispela, Satan i mekim “ol strongpela sua i kamap long olgeta hap bilong bodi bilong Jop.”—Jop 1:7-19; 2:7.
Long taim bilong Jisas, ol spirit nogut i mekim na sampela man i mauspas o aipas. (Matyu 9:32, 33; 12:22) Ol i mekim nogut long wanpela man na kirapim em long katim skin bilong em yet long ston. (Mak 5:5) Ol i mekim wanpela manki i singaut nogut, na tromoi em i go daun, na mekim skin bilong em “i guria nogut tru.”—Luk 9:42.
Bipo ol spirit nogut i bin mekim nogut long ol man na sampela i gat sik, o skin i guria nogut tru
Long nau Satan na ol spirit nogut i wok yet long bagarapim ol man. Ol i raus pinis long heven na ol i wok strong moa long mekim nogut long ol man, olsem ripot bilong olgeta hap i kamapim klia. Ol i save mekim na sampela man i gat sik. Ol i save mekim nogut long sampela long nait na ol i no inap slip o ol i driman nogut. Ol i mekim pasin sem long sampela, o mekim ol i kamap longlong, o kirapim ol long kilim i dai ol yet o narapela man.
Long nau ol spirit nogut i kirapim sampela man long bagarapim man; na ol i mekim nogut long sampela long nait, ol i givim driman nogut long ol
Wanpela meri i stap long Suriname, em Lintina, em i tok wanpela spirit nogut i bin kilim i dai 16 long famili bilong em, na inap 18 yia dispela spirit i bin bagarapim skin na tingting bilong dispela meri yet. Em yet i save pinis olsem ol spirit nogut ‘i save amamas long mekim nogut long man i go inap long man i dai.’
Tasol Jehova inap lukautim ol wokboi bilong em, na bai Satan i no inap bagarapim ol.—Sindaun 18:10.