Olgeta Pen na Hevi Klostu Bai Pinis!

Ating long wanpela taim yu bin kamapim askim olsem, ‘Bilong wanem ol man i mas karim ol pen na hevi?’ Inap planti tausen yia yumi man i bin karim hevi long ol woa, pasin bilong stap rabis, ol bikpela bagarap, pasin raskol, ol man i mekim pasin i no stret long ol narapela, sik, na indai. Pen na hevi ol man i karim i go bikpela moa insait long dispela wan handet yia i go pinis. Yu ting ol dispela samting i gat pinis bilong en o nogat?

Yes i gat, na klostu nau em bai pinis! Dispela bekim i mekim gut bel bilong yumi, a? Tok Bilong God, em Baibel, i tok: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Na ol bai i stap olsem inap hamas yia? “Ol stretpela man bai i kisim graun God i givim ol, na bai ol i stap oltaim long en.”​—⁠Song 37:​10, 11, 29.

Taim God i rausim pinis ol pasin nogut na ol pen na hevi, graun bai kamap wanpela paradais. Long dispela taim ol man bai i stap gutpela olgeta na amamas inap oltaim oltaim. Baibel i tok profet olsem: “Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.”​—⁠KTH 21:⁠4.

Long dispela nupela taim, ol man i dai pinis bai kirap bek na ol tu bai kisim ol dispela blesing: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Long dispela as Jisas Krais inap tokim wanpela man nogut i bin tanim bel na i tokaut olsem em i bilip long Jisas, olsem: “Mi tok tru long yu nau, bai yu stap wantaim mi long Paradais.”​—⁠Luk 23:​43, NW.

Wanem As na Pen na Hevi i Kamap?

Ol samting God i tingting pinis long mekim long ol man i gutpela tru, olsem na bilong wanem em i larim pen na hevi i kamap? Bilong wanem em i larim pen na hevi i stap longpela taim tru?

Taim God i wokim Adam na Iv, Em i wokim bodi na tingting bilong ol i gutpela olgeta. Em i putim ol long wanpela naispela gaden olsem paradais na em i givim gutpela wok long ol. Baibel i tok: “God i lukim olgeta dispela samting i gutpela, na em i amamas tru.” (Stat 1:31) Sapos tupela i bin bihainim tok bilong God, orait tupela inap kamapim ol pikinini i gutpela olgeta, na graun olgeta bai kamap wanpela paradais, na ol manmeri inap i stap bel isi na amamas inap oltaim oltaim.

Taim God i wokim Adam na Iv em i givim wanpela gutpela presen long ol olsem ol i stap fri long makim wanem samting ol yet i laik mekim. Ol i no olsem ol masin i no gat tingting. Tasol bilong ol i ken stap amamas ol i mas mekim gutpela wok long dispela pasin bilong ol long makim wanem samting ol i laik mekim​—⁠ol i mas bihainim ol lo bilong God. God i tok: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut.” (Aisaia 48:17) Sapos ol i no mekim gutpela wok long dispela pasin God i givim ol, orait bikpela hevi bai painim ol, long wanem, God i no wokim ol man bilong bosim ol yet na kisim indipendens long God. Baibel i tok: “Mipela man i no inap bosim wokabaut bilong mipela yet na bihainim ol rot mipela i laikim.”​—⁠Jeremaia 10:⁠23.

Sori tru, tumbuna papamama bilong yumi i ting olsem ol i ken kisim indipendens long God na stap gut. Tasol taim ol i lusim wok bos bilong God, God i no lukautim ol moa na bodi bilong ol i no stap gutpela olgeta olsem bipo. Olsem na isi isi ol i go lapun na bihain ol i dai. Yumi ol tumbuna pikinini bilong ol, olsem na yumi kisim sin na indai long rot bilong ol.​—⁠Rom 5:⁠12.

Nambawan Bikpela Tok​—⁠I Stret Husat i Stap Bos?

Bilong wanem God i no bagarapim Adam na Iv na wokim tupela narapela man na meri? Long wanem, wanpela bikpela tok i bin kamap long namba bilong God long bosim olgeta samting long heven na graun. Bikpela askim i olsem: I stret husat i bosim ol man, na wok bos bilong husat i stret? Na tu: Olsem wanem? Ol man bai stap gutpela moa sapos God i no bosim ol? God i larim bikpela haptaim long ol man bilong traim pasin bilong i stap fri olgeta o stap indipenden long God, na long dispela rot God bai kamapim long ples klia olsem ol man bai stap gut moa taim God i bosim ol o taim ol i bosim ol yet. Haptaim God i larim long ol man i mas longpela inap bilong ol i ken traim olgeta kain kain wok politik, sindaun bilong ol man, wok bisnis, na ol lotu, bilong bosim ol yet.

Wanem samting i kamap long dispela? Ol samting ol man i bin mekim insait long planti tausen yia i kamapim klia olsem i gat planti pen na hevi moa yet i bin kamap. Insait long dispela wan handet yia i go pinis, pen na hevi ol man i karim i nogut moa, winim olgeta taim bipo. Lain Natsi i bin kilim i dai planti milion man. Winim 100 milion manmeri i bin dai long ol woa. Pasin raskol na pasin bilong bagarapim ol man i go bikpela. Pasin bilong kisim drak i go bikpela long olgeta hap. Planti man moa i kisim ol sik bilong pamuk. Hangre na sik i kilim i dai planti milion man long olgeta wan wan yia. Long olgeta hap ol famili i bruk na ol man i no bihainim moa stretpela pasin. I no gat wanpela gavman bilong ol man inap stretim ol dispela hevi, na pinisim sik, go lapun, na indai.

Ol man i stap wankain olsem Baibel i bin tok profet long en. Baibel i kolim taim bilong yumi olsem “taim bilong las de” na “planti hevi nogut tru bai i kamap.” Na olsem Baibel i tok, “ol man nogut na ol giaman profet ol bai i wok long giamanim ol manmeri. . . . Na pasin bilong ol bai i kamap nogut tru.”​—⁠2 Timoti 3:​1-5, 13.

Klostu Nau Pen na Hevi Bai Pinis

Olgeta samting i kamap i soim olsem wok bilong ol man long i stap indipenden long God i laik pinis. Em i klia tru, ol man i no inap i stap indipenden long God na bosim ol yet. Wok bos bilong God tasol inap kamapim gutaim, amamas, helt i gutpela olgeta, na laip oltaim. Olsem na taim bilong Jehova long larim pasin nogut na pen na hevi i stap, em i laik pinis. Klostu nau God bai kirap na bagarapim olgeta wok na pasin nogut bilong dispela graun.

Wanpela tok profet bilong Baibel i tok: “Taim ol dispela king [ol gavman bilong ol man bilong nau] i stap yet God bai i kirapim wanpela kingdom [long heven] na dispela kingdom bai i stap oltaim oltaim. . . . Em bai i daunim ol na bagarapim ol arapela king [ol gavman bilong nau] na kingdom bilong en bai i stap oltaim.” (Daniel 2:44) Nambawan bikpela as tok bilong Baibel i olsem: Kingdom long heven bai kamapim klia olsem i stret Jehova i stap nambawan bos. Jisas i tok profet long wanpela bikpela hap bilong mak bilong “las de” olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”​—⁠Matyu 24:⁠14.

Taim pinis i kamap, husat bai abrusim bagarap? Baibel i bekim tok olsem: “Ol gutpela stretpela man bai i stap gut oltaim long graun bilong yumi. Tasol God bai i rausim ol man i save mekim pasin nogut na i no save bihainim em. Em bai i kamautim ol, olsem man i kamautim kaikai long gaden bilong en.” (Sindaun 2:​21, 22) Ol stretpela man em ol man i kisim save long laik bilong Jehova na ol i mekim laik bilong em. Jisas Krais i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” ( Jon 17:⁠3) Tru tumas, “dispela graun bai i pinis, . . . Tasol man i bihainim tok bilong God, em bai i stap oltaim.”​—⁠1 Jon 2:17.

Ol tok bilong Baibel mipela i bin kisim long Buk Baibel em Baibel Sosaiti bilong Papua Niugini i wokim; tasol taim mipela kisim long New World Translation of the Holy Scriptures​​—⁠With References, mipela putim NW bihain long en.