Holimpas Ol Samting God i Tokim Yumi long Wetim i Stap
1, 2. Bilong wanem yu mas tingting strong long holimpas bilip?
APOSEL Pol i tok, “yumi mas holim strong dispela bilip, i go inap long taim bilong yumi dai. Sapos yumi mekim olsem, orait yumi stap manmeri tru bilong Krais.” (Hibru 3:14) Na em i tok, yumi mas “holimpas ol samting God i tokim yumi long wetim i stap.”—Hibru 6:18.
2 Ating nau tasol yu kamap wanpela Witnes Bilong Jehova na yu bilip strong. O ating longtaim pinis yu stap wanpela Witnes Kristen na yu pilim olsem yu holimpas bilip. Maski yumi nupela man o olpela man long lain Kristen, tasol ating yumi olgeta wan wan yumi save long sampela man ol i no bin holimpas bilip. Ol i lusim tok i tru olsem sampela i bin mekim long taim bilong ol Kristen bilong pastaim. (Filipai 3:18; Aposel 20:30) Sampela, isi isi ol i lusim bilip, long wanem ol i kirap long tingim tumas mani kago na ol samting bilong skin. Na sampela ol i pundaun long traim na ol i mekim rong.
3-5. Olsem wanem ol tok bilong Pas bilong Ol Hibru em inap helpim yumi long bilip bilong yumi?
3 Yumi ken mekim wanem na bai dispela samting i no ken painim yumi? Gutpela sapos yumi tingim ol tok Pol i bin raitim long ol Hibru. Na bai yumi ken save olsem wanem dispela tok i stret long dispela taim nau, long wanem planti Witnes long nau ol i bin bihainim ol dispela gutpela tok na dispela samting i helpim ol long karim hevi na winim traim na sanap strong.
4 Pol i raitim dispela pas long ol Kristen em God “i bin singautim” ol. Spirit bilong God i makim ol na i gat as tru long ol i ken bilip na wet long bihainim Krais i go long heven. Dispela samting ol i wetim i stap em i olsem ‘strongpela anka bilong laip bilong ol.’ Tasol Pol i tok, yumi mas “holimpas ol samting God i tokim yumi long wetim i stap.” (Hibru 3:1; 6:18-20) Sapos bipo ol Kristen i mas holimpas bilip, orait ol Kristen bilong nau, lain remnan wantaim ‘bikpela lain’ em ol i wet long winim taim bilong “bikpela hevi tru,” ol i mas wok strong moa yet long holimpas bilip.—Revelesen 7:9, 15.
5 Long Pas bilong Ol Hibru, Jehova kirapim tingting bilong yumi bambai yumi was gut, na yumi no ken “slek long dispela tok” o “pundaun” o “les,” o “surik na lus,” o “sakim tok.” (Hibru 2:1; 6:6, 12; 10:39; 12:25) Dispela pas i givim gutpela tok long yumi bilong helpim yumi bambai yumi ‘holimpas bilip na wetim God i kisim yumi, na yumi mekim olsem i go inap long taim bilong yumi i pinis.’ Na ol dispela tok i helpim yumi bambai yumi no “surik na lus,” yumi “bilip na kisim laip.”—Hibru 6:11; 10:39.
“Yumi No Man Bilong Surik na Lus”
6. Ol Hibru i kamap Kristen, wanem ol hevi i bin painim ol? Tasol ol i mas mekim wanem?
6 Ol man i bin mekim nogut long planti Hibru i kamap Kristen. Ol man i bin “givim bikpela hatwok” long ol na ol i bin “karim planti pen,” olsem long taim ol man i sanapim ol long ai bilong ol manmeri long ples bung bilong ol Rom o long taim ol i helpim ol manmeri i stap long kalabus. (Hibru 10:32-34) Tasol ol i mas wok strong bambai ol i no ken kamap “man bilong surik na lus,” ol i ken “bilip na kisim laip.”—Hibru 10:39.
7. (a) Sapos ol man i laik mekim nogut long Kristen, dispela samting inap mekim wanem long em? (b) Olsem na yu mas tingim wanem askim?
7 Kristen i mas was gut, nogut em i pret long ol man bai mekim nogut long em na em i “surik” o lusim lo bilong God liklik. Orait, olsem wanem long yumi? Ating long ples wok o long skul, sampela taim ol wanwok o ol wanskul i birua long yumi. Na sampela Kristen i marit, poroman bilong ol i bin paitim ol, sampela papamama i no bilip ol i bin paitim pikinini i bilip. Tasol long planti hap ol Witnes i no karim bikpela pen na hevi long bilip bilong ol. Ol man i no mekim nogut tru long ol. No gat hevi na dispela samting inap mekim na bai sampela Witnes long ol dispela hap ol i no redi. Na taim bikpela hevi i kamap, olsem ol man i kirap mekim nogut tru long ol, orait, ating bai ol i “surik” Olsem na gutpela sapos yumi tingim dispela askim, olsem: ‘Mi save stap gutpela, no gat hevi, olsem na sapos bihain ol man i kirap mekim nogut long mi, olsem ol i laik rausim mi long haus o long wok, o mi no inap lukim moa famili bilong mi, o ol i laik kalabusim mi o paitim mi, bai mi pundaun long dispela traim na mi surik?’
8. Pas bilong Ol Hibru i givim wanem gutpela tok long yumi bilong helpim yumi na bai yumi inap karim pen na hevi ol man i givim long yumi?
8 Pol i tok yumi mas sanap strong long traim na hevi, na bilong strongim yumi em i tok, yumi mas tingim Jisas. Jisas i bin karim bikpela pen na hevi, tasol em i sanap strong. (Hibru 12:2, 3) Na Pol i tok, sapos bikpela hevi tru i painim yumi, yumi mas tingim dispela i gutpela samting bilong skulim yumi. Tru, God i no kirapim ol man long givim hevi long yumi. Em i no as bilong dispela samting; tasol em i larim dispela samting i kamap. Tasol taim ol man i mekim nogut long yumi, dispela samting inap lainim yumi na helpim yumi bambai yumi bihainim moa yet ol pasin Kristen, olsem pasin bilong sanap strong, na no ken les kwik, na i stap gut long Jehova na bilip long em.—Hibru 12:4-11; Jems 1:2-4.
9. (a) Olsem wanem yumi inap save, ol manmeri i no gutpela olgeta, ol inap karim hevi na sanap strong? (b) Wanem samting i painim sampela sista long wanpela ples Komyunis namel long 1960 na 1969?
9 Nogut yumi ting man i gutpela olgeta olsem Jisas, dispela kain man tasol inap karim hevi na sanap strong. Nogat. Pas bilong Ol Hibru i stori long planti manmeri ol i wankain olsem yumi, ol i no gutpela olgeta, tasol ol i bilip na dispela samting inapim ol long karim hevi na sanap strong. (Hibru 11:35-40; 12:1) Long nau tu i gat sampela manmeri ol i bilip na sanap strong olsem “ol dispela manmeri bilong bipo” Long wanpela nius bilong Switselan, long Ogas 1982, wanpela meri i stori long gutpela pasin Ol Witnes meri i mekim sampela yia bipo. Ol dispela Witnes i stap long wanpela banis kalabus nogut long wanpela ples Komyunis. Em i tok olsem:
Ol bikpela misin tasol i fri liklik, long wanem ol i save autim ol tok Gavman i tokim ol long autim. Tasol ol liklik lotu i bung long haus bilong ol man, ol i no fri. Gavman i mekim nogut tru long Ol Witnes Bilong Jehova, winim olgeta narapela. Planti Witnes, em polis i lukim Wastaua i stap long haus bilong ol na ol i kisim 10-pela yia long kalabus. Olsem na yumi inap save bilong wanem ol bos bilong kalabus i kros tru long Ol Witnes i save kisim planti buk na nius insait long banis kalabus. Olgeta, taim ol i go insait long kalabus, ol wasman bilong banis kalabus i bin tokim ol long rausim olgeta klos bilong ol, na ol i lukim lukim ol dispela samting na i no gat samting. Na ol kalabus i wok ausait, olsem long gaden, ol wasman i gat gan i save was long ol na taim ol i go bek insait, ol i save painim painim samting i stap hait long klos o long skin bilong ol, tasol nogat. Tasol ol buk na nius bilong ol i save kam insait. I olsem ol ensel i kam long nait na tromoi i kam long ol. Planti bilong ol dispela Witnes ol i yangpela meri. Taim ol i kisim kalabus long namba wan taim, ol i save kalabus inap 5-pela o 7-pela yia; namba tu taim ol i mas kalabus inap 10-pela yia. Ol Witnes i stap nogut tru long dispela banis kalabus. Taim tripela o moa i bung wantaim, ol wasman i save tokim ol long i go nabaut.
10. Ol tok bilong pas Pol i raitim long ol Hibru i helpim yumi long tingting strong long mekim wanem taim ol man i mekim nogut long yumi?
10 Pas bilong Ol Hibru i stori long sampela manmeri bilong bipo ol i bin karim hevi na sanap strong long bilip, na dispela Pas i tok: “Ol i gutpela manmeri moa, na ol man bilong graun ol i no inap long ol dispela bilipman ol i stap namel long ol.” Jehova bai mekim ol dispela bilipman i “kamap gutpela tru” long Paradais long graun long bihain. Ol bai kisim gutpela pe tru, a? Olsem na yumi mas tingim gut ol bilipman bilong bipo na bilong nau na yumi no ken “surik na lus.” Yumi mas tingting strong long holimpas bilip bambai yumi inap “kisim laip.”—Hibru 11:38, 40; 10:39.
Nogut Yumi “Slek long Dispela Tok”
11. Man i stap Kristen longtaim liklik, olsem wanem em inap “slek long dispela tok”?
11 Pas bilong Ol Hibru i tok yumi mas was gut, nogut yumi “slek long dispela tok.” (Hibru 2:1) Olsem wanem yumi inap “slek long dispela tok”? Taim yumi kamap Kristen ating bel bilong yumi i kirap tru. Yumi amamas long autim tok maski yumi no gat bikpela save long ol tok bilong Baibel. (Aposel 3:1-9; 8:39; 13:48, 49) Yumi wok long kamap strong na bel bilong yumi i pilim tru ol wok yumi mas mekim. Yumi givim bel tru long mekim wok na yumi wok strong. Tasol tru yumi mekim olsem o nogat? Olsem wanem? Yumi tingim wok bilong autim tok em i olsem rot bilong kamapim bel bilong yumi, yumi givim bel long God, na em i rot bilong helpim ol narapela man? O yumi les long mekim dispela wok? Sapos yumi gat pikinini, oltaim yumi save kirapim ol long mekim wok painia? O wan wan taim tasol yumi tokim ol long dispela wok, long wanem yumi laik bai ol i winim bikpela skul na kisim gutpela wok na bikpela pe na bai ol inap baim bikpela haus samting?—Revelesen 2:4.
12. (a) Pas bilong Ol Hibru i tok yumi mas mekim wanem bambai yumi no ken “slek long dispela tok”? (b) Gutpela sapos yumi tingim wanem ol askim na bai yumi ken save, yumi ‘holimpas dispela tok na bihainim’ o nogat?
12 Wanpela samting yumi ken mekim na bai yumi no “slek long dispela tok,” em olsem: “Dispela tok yumi harim pinis, yumi mas holimpas long tingting na bihainim.” (Hibru 2:1) Sampela Hibru i bin kamap Kristen long bipo, ol i no mekim olsem. Ol i kisim save pinis long “as bilong tok bilong Krais,” tasol ol i no “i go moa yet” na kamap olsem “man i bikpela pinis.” Taim inap pinis long ol i “stap tisa,” tasol ol i stap yet long namba wan as bilong tok. (Hibru 5:12-6:2) Orait, olsem wanem long yumi? Yumi ‘stap nating’ tasol? O yumi wok strong long stadi na lainim tok? Yumi wok long kaunim sampela tok bilong Baibel long olgeta de? Yumi yet yumi save stadi? Yumi laik tru long kaunim ol nius na buk Kristen na toktok wantaim ol narapela man long ol tok yumi bin lain long en? Olsem wanem? Yumi helpim ol pikinini bilong yumi bambai ol i no i stap tasol long “susu”? Ol inap opim Baibel na lainim ol narapela man long tok i tru bambai ol dispela man i save yumi no gat tewel, ol man i dai pinis bai ol i kirap bek, i no gat God Triwan, Paradais bai kamap long graun? Ol inap mekim olsem taim ol i autim tok o ol i stap olsem long yia i go pinis?—1 Pita 3:15.
13. Ol Sista bilong yumi i stap kalabus ol i makim wanem gutpela pasin bilong stadi? Olsem na gutpela sapos yumi mekim wanem?
13 Dispela nius bilong Switselan i stori long ol sista i stap kalabus, em i tok moa, olsem:
Ol i gat liklik hap taim bilong ol yet na long dispela hap taim ol i save wok long tingim tingim ol tok bilong Baibel bambai ol inap holimpas long tingting. Na ol i lain long mekim ol narapela tok ples, olsem tok Inglis, na tok Frans, na tok Jeman. Sampela buk na nius ol i kisim i stap long ol dispela tok ples, na ol sista i bin lain long ol dispela tok ples, ol inap tanim tok bilong ol dispela buk na nius na helpim ol narapela sista.
Ating yumi no save wok kalabus inap planti aua na kisim liklik skel tasol. Tasol olsem wanem? Yumi save wok strong long ‘holimpas dispela tok long tingting’ olsem ol dispela sista i mekim?
Nogut Yumi “Pundaun”
14. Maski man i stap Kristen longtaim, tasol wanem samting inap painim em?
14 Pas bilong Ol Hibru i kirapim yumi long wok long kamap strong, na i toksave olsem: Sampela man “ol i kisim pinis lait bilong God” ol inap “pundaun,” na ating bihain ol i no ken tanim bel. (Hibru 6:4-8) Sampela Kristen ol i bin mekim wok bilong God longtaim, sampela em “Holi Spirit i stap pinis long ol,” ol inap pundaun. Pasin bilong dispela graun inap pulim ol.
15. Sampela i pundaun na mekim wanem ol pasin i no stret long marit na maritpasin na long wok bisnis
15 Pasin bilong bel i kirap na pasin bilong laikim tumas mani, ol dispela pasin i bin pundaunim sampela. (1 Jon 2:16) Sampela yangpela i bihainim pasin bilong bel i kirap na taim ol i no marit yet ol i mekim maritpasin. Na sampela marit ol i les long poroman bilong ol. Ating ol i bungim narapela man o meri em i save toktok gut wantaim ol o em i gat bikpela nem moa long dispela graun, na bel bilong ol i kirap long laikim em. Na sori tumas, ol i katim marit na maritim dispela narapela poroman, tasol i no stret ol i mekim olsem. Pasin bilong laikim tumas mani i bin pundaunim sampela. Ol i kirap mekim sampela pasin bilong bisnis, em ol dispela pasin i no stret o i kalapim lo bilong gavman long kisim laisens o baim takis. (Matyu 22:21) O ol i kirapim wanpela wok bisnis bilong kisim kwik mani na ol i pulim mani long ol brata. (Lukim Aposel 20:33; 2 Tesalonaika 3:10, 11.) Ol dispela kain wok inap pasim ol na bai ol i no tingim moa ol wok bilong Kingdom, na sampela taim i mekim ol narapela man i bel nogut long ol o i kirapim kros, o bai ol i gat kot long mekim pasin giaman. Tok bilong Baibel i stret, em i tok: “Ol man i ting long kisim planti kago, ol bai i pundaun long traim, olsem long hul bilong kisim abus.”—1 Timoti 6:9.
16. Ol sista i stap kalabus ol i makim wanem gutpela pasin long sakim ol traim?
16 Sapos yumi bihainim pasin daun na yumi save, yumi inap pundaun, dispela samting bai strongim yumi na taim wanpela samting i kirap tasol long pulim yumi long mekim pasin i no stret, kwiktaim bai yumi sakim dispela samting. Olsem na bai yumi no ken pundaun long traim. (Rom 12:3; 1 Korin 10:12) Ol sista long dispela banis kalabus ol i makim gutpela pasin yumi ken bihainim, olsem:
Ol i kisim sampela, wan wan, i go long wanpela biktaun i gat ol stua na haus piksa samting. Tupela plisman, olsem ol pren kros, i kisim wanpela sista i go insait long wanpela stua i gat planti kaikai i stap long ai bilong ol man. Ol i tokim em, ‘Kisim long laik bilong yu.’ Em i tok, ‘Mi no sot long wanpela samting.’ Em i bikpela traim, long wanem inap planti yia pinis dispela sista i bin kisim liklik kaikai tasol na nau ol i soim planti nupela bret na kek samting long em. Ol i putim wankain traim long em long ol narapela stua tu na long ol haus piksa. Ol i pasim em i stap long dispela biktaun inap sampela wik na ol i tokim em, sapos em i lusim bilip bai em i stap fri, em i no ken i go bek long kalabus. Tasol sista i sakim olgeta dispela samting. Em i no pundaun long traim. Wanpela sista tasol i pundaun. Planti mun bihain ol i kisim dispela sista i kam bek long dispela banis kalabus na em i mekim tok long ol dispela meri bipo ol i stap sista bilong em. Skin bilong em i go bikpela na em i pasim ol gutpela bilas. Inap tupela aua em i toktok long ol dispela sista, tasol ol i no harim tok bilong em na ol i no gude long em tu. Polis i ting dispela em i gutpela rot bilong pundaunim ol sista na kwiktaim bai ol i lusim bilip, tasol nogat; ol sista i sanap strong.
17. Yumi mas ting olsem wanem long ol traim i save painim yumi?
17 Sapos kain traim olsem i painim yu, ating bai yu sanap strong? Tasol olsem wanem long ol traim i save painim yu? Pol i tok: “O1 brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip. Nau dispela taim God i kolim ‘tude’ em i stap yet, orait long olgeta de yupela i mas givim gutpela tok long ol brata na kirapim tingting bilong ol. Nogut pasin bilong sin i giamanim wanpela namel long yupela na em i pasim strong bel bilong en.” (Hibru 3:12, 13) Sapos yumi no laik pundaun na lusim God, oltaim yumi mas tingim ‘tude.’
“Tude” Yumi Mas Bilip
18. Olsem wanem na ol Isrel i no inap insait long de malolo bilong God?
18 Pol i tingim tok bilong Sam 95:7-11 na em i tok long dispela taim God i kolim “tude.” (Hibru 3:7-11) Sam 95 i tok, long taim bilong Moses, ol Isrel i pasim strong bel bilong ol. Josua na Kelep i go lukim Ples Promis na ol i tokim ol Isrel long ol samting ol i bin lukim, tasol ol Isrel i no bilip. (Nambas 13:17-14:38) Ol inap kisim bel isi na ol blesing long malolo bilong God, em dispela malolo i stap yet, tasol ol i pasim strong bel bilong ol na ol i no bilip. Ol i no laik i go insait long ples promis na sindaun long dispela hap. Olsem na God i mekim ol i raun raun long ples nating inap 40 yia.—Hibru 3:17-19.
19. Wanem taim yumi inap insait long malolo bilong Jehova? Olsem wanem yumi inap insait long en?
19 Bikpela De Sabat o de malolo bilong God i stap yet. (Jenesis 1:31-2:3) Pol i tok, “Promis bilong God i stap yet, na em i tok olsem: ‘Yupela ken i go insait long ples malolo bilong mi.”’ (Hibru 4:1, 9) Olsem na nau yumi ol Kristen inap insait long dispela “malolo,” o sapos yumi insait pinis long en, orait yumi ken i stap yet long en. Olsem wanem yumi inap insait long malolo bilong God? Yumi mas bilip. I no olsem yumi mas bilip long Josua bilong bipo. Nogat. Yumi mas bilip long Bikpela Josua, em hetman bilong yumi Jisas. Yumi mas lusim ol wok ol man i no bilip ol i save mekim. Yumi mas lusim ol wok o pasin i kamapim bel bilong ol manmeri, ol i no bilip tru olsem Nupela Taim bai kamap. Ol dispela manmeri i save tingim amamas tasol. Na ol i laik kisim nem. O ating ol i ting long i stap ‘gutpela man’ long ai bilong ol narapela manmeri.
20, 21. (a) Yumi mas klia long wanem ol wok? (b) Yumi mas mekim wanem gutpela wok olsem ol sista i stap kalabus i makim?
20 Sapos yumi bilip long Jisas na long ol samting liklik taim bai lain bilong God i kisim, orait, ol wok yumi mekim i mas kamapim dispela samting. Pol i tok: “Man i go insait long ples malolo bilong God, em i pinisim wok bilong en na i malolo.” (Hibru 4:10) Em i pinisim o lusim ol wok i makim em i no bilip, o em i no wok moa long kamapim stretpela pasin bilong em yet. Yumi mas mekim ol wok i kamapim bilip bilong yumi.
21 Wanpela bikpela wok bilong ol Kristen, em olsem: O1 i mas autim tok na tokim ol man long God Jehova na long Pikinini bilong em. Pol i stori long Jisas na em i tok strong, olsem: “Yumi mas holimpas dispela bilip yumi save telimautim.” (Hibru 4:14) Yumi save mekim olsem long ol miting Kristen, na i stret yumi mas tokaut long bilip bilong yumi olsem. (Hibru 10:23-25) Tasol yumi mas “tokaut long bilip” bilong yumi long ol man ausait tu. Yumi mas pilim olsem yumi mas “givim maus bilong yumi [olsem ofa], na telimautim nem bilong [God].” (Hibru 13:15; 1 Korin 9:16) Meri i raitim dispela tok long nius, em bipo yumi bin stori long en, em i tok em i bin toktok wantaim wanpela sista, olsem:
Mi tokim em, ol gavman i no save tingim bilip bilong yupela na ol i putim yupela olgeta long kalabus; nogat; tasol yupela i save autim tok long ol narapela man. Sapos yupela i sindaun isi long haus na beten tasol, bai ol man i no save. Na em i bekim tok, olsem: ‘Em i stret, tasol mipela i mas autim tok long ol narapela man bilong kisim ol nupela brata na sista. Mipela i no ken tingim mipela yet tasol na redi long sindaun bilong mipela long taim bilong 1,000 yia. Nogat. Olgeta manmeri i mas save long gutpela sindaun yumi inap kisim long dispela taim bihain.’
22. Yu tingim ol tok bilong Pas bilong Ol Hibru na yu bilip olsem wanem?
22 Olsem na bikpela tok bilong Pas Pol i raitim long Ol Hibru, em olsem: “Yumi mas wok strong bilong go insait long dispela ples malolo [bilong God] Nogut wanpela man i … sakim tok, … na em bai i pundaun na i lus.” (Hibru 4:11) Nau yumi inap insait long dispela malolo na i stap amamas, na yumi inap i stap yet long en taim olgeta manmeri long graun ol i lotu long God. Jehova i laik tru long lukautim na mekim gut long ol manmeri “givim gutpela pe long ol man i wok long painim em.” (Hibru 11:6) Tasol olsem wanem long yumi? Sapos yumi bilip na sanap strong na God i helpim yumi, orait, yumi inap tru long “holimpas ol samting God i tokim yumi long wetim i stap.”—Hibru 6:18.
Em i Bin Helpim Yu?
□ Wanem gutpela tok long Pas bilong Ol Hibru em i bin helpim yu?
□ Gutpela pasin bilong sampela sista i stap kalabus em inap helpim yu olsem wanem?
□ Hibru 2:1 i tok yu mas mekim wanem bambai yu no ken “slek long dispela tok”?
□ Olsem wanem yu ken i go insait long malolo bilong God?
[Rait long pes 24]
Planti Witnes, em polis i lukim Wastaua i stap long haus bilong ol na ol i kisim 10-pela yia long kalabus
[Rait long pes 25]
Ol Witnes i stap nogut tru long dispela banis kalabus. Taim tripela o moa i bung wantaim, ol wasman i save tokim ol long i go nabaut
[Piksa long pes 26]
Ol Isrel i harim tok Josua na Kelep i mekim long ol samting ol i bin lukim, tasol ol i no bilip. Olsem na ol i no inap insait long malolo bilong God long Ples Promis